Jamirooje dow ndongu rewɓe
36
1 Ndeen ardiiɓe cuuɗi ɓiɓɓe Galaad ɓii Makir taan Manasa gooto e ɓiɓɓe Yuusufi ngari to Muusaa e ardiiɓe lenyi Israa'iila mbi'i:— 2 Joomiraaɗo yamirii ma pecciranaa ɓiɓɓe Israa'iila leydi ndii e cumnal. Wooɗi du, Joomiraaɗo yamirii joomam, ndongu sakiike amin Selofehad hokkee ɓiɓɓe muuɗum rewɓe. 3 De si ɓe ɓaŋaama lenyol gonngol hakkunde lenyi Israa'iila fu, ndongu maɓɓe ittete de ɓeydee e ndongu lenyol ngol ɓe ɓaŋaa ngool. Ndeen ndongu amin ɓuytete de ɓeydane cuuɗi goɗɗi. 4 Nde Hitaande Hokkitingol* hewti fu, ndongu maɓɓe ittete ley ndongu baabiraaɓe amin de ɓeydane lenyol ngol ɓe ɓaŋaa.
5 E dow yamiroore Joomiraaɗo, Muusaa wi'i jamaare Israa'iila:
— Lenyol ɓiɓɓe Yuusufi na woodi goonga. 6 Ndelle inan yamiroore nde Joomiraaɗo hokki dow ɓiɓɓe Selofehad: ɓe ɓaŋee gorko mo ɓe njiɗi fuu, ammaa tawa gorko oon wo jeyaaɗo e lenyol baabiiɓe. 7 Noon waɗata de ndongu lenyol ittataake ɓeydane lenyol gonngol. Israa'iilanke fuu, heddodoo e ndongu baabiraaɓe muuɗum. 8 Ɓiɗɗo debbo gooduɗo ndongu e leydi bammum fuu, tilay ɓaŋee gorko jeyaaɗo e lenyol bammum. Noon waɗata de Israa'iilankooɓe fuu keddodoo e leydi baabiraaɓe muɓɓen, mono fuu e ndongu muuɗum. 9 Sabo ndongu leydi waawaa itteede de ɓeydane lenyol gonngol. Ammaa lenyi Israa'iila fuu keddodoo e ndongu baabiraaɓe muɓɓen.
10 Ɓiɓɓe Selofehad rewɓe ɓeen ngaɗi ko Joomiraaɗo yamiri Muusaa dow muɓɓen ɗuum. 11 Mahala e Tirsa e Hogila e Milka e No'a ɓiɓɓe Selofehad rewɓe ɓeen fuu ɓaŋaa ɓiɓɓe bappayɓe muɓɓen. 12 Ndelle wo worɓe lenyol Manasa ɓii Yuusufi tan ɓaŋi ɓe. Noon ndongu maɓɓe leydi heddorii ley lenyol baabiiɓe.
13 Ɗee ngoni jamirooje ɗe Joomiraaɗo hokki Israa'iilankooɓe e hunnduko Muusaa ley njaayri Mo'ab, daande Urdun yeeso Yeriko.