Dewtere Fillitagol Tawreeta
Hoore Haala
Dewtere Fillitagol woni joyaɓerde e dewte Tawreeta Muusaa. Wo kayre resi ekintinooje ɗe Muusaa janngini Israa'iilankooɓe fadde muɓɓen e naatude leydi Kanaana, ndi Laamɗo aadaninoo maamiiɓe Ibrahiima ndiin. Wo ley dewtere ndee Muusaa fillitanii ɓe amaana binndaaɗo ley Tawreeta oon.
Laamɗo wurtinii Israa'iilankooɓe leydi Misira, ammaa ɓe keɓaay naatude Kanaana wakkati oon saabe muurtere maɓɓe. Ndelle jamaanu oon heddake ley ladde yoornde na yiiltoo faa hewti duuɓi 40, tawi mawɓe maɓɓe fuu maayii si wanaa Kaalibu e Yoosuwa. Fay Muusaa e hoore muuɗum heɓaay laawol naatude leydi Kanaana ndiin.
Wakkati ɓiɓɓe maɓɓe podinoo naatude leydi ndiin ndeen, Muusaa kaa, na anndunoo maayan. Imo muuyi ɓe miccitoo no Laamɗo hisinirnoo maamiraaɓe maɓɓe e maccangaaku ley leydi Misira, taa ɓe njeggita amaana mo Joomiraaɗo haɓɓidinnoo e maɓɓe dow waamnde Sinayi. Ndelle o janngini ɓe faa laaɓi, o holli ɓe nguurndam keewɗam barke ɗam ɓe mbaawi heɓude si ɓe kaybii amaana Laamɗo oon. O sappani ɓe du, kuddi e maayde saaman dow maɓɓe si ɓe mbonnii amaana oon. O tindini ɓe, o wi'i «cuɓee nguurndam!». O yamiri ɓe njanngina Tawreeta oon sukaaɓe maɓɓe e taaniraaɓe maɓɓe faa lenyol ngool heɓa barke Laamɗo ley jamaanuuji ɗuuɗɗi.
Nde njanngeten dewtere Fillitagol Tawreeta ndee fu, na haani miccitoɗen ko Laamɗo hokkii Tawreeta oon lenyol feerewol wakkati feereejo. Sariyaaji ɗiin ngorraa e meeɗen hono no ngorrunoo e Israa'iilankooɓe wakkati oon noon. Ammaa na janngina en ko heewi e dow Laamɗo mo wattitataako oon. Iɗi kokka en misaalu lenyol buurngol ley semmbe Laamɗo, e ekintinooje ɗuuɗɗe ɗe mbaawɗen wuurdude hannden.
Dewtere Fillitagol Tawreeta