Dewtere Fillitagol Tawreeta
Konngol Muusaa go'aɓol
1
1 Inan haalaaji ɗi Muusaa haaldi e jamaare Israa'iilankooɓe nde ngonnoo lettugal Urdun ley ladde yoornde, nder njaayri Araba yeeso Suuf, hakkunde Paran e Tofel e Laban e Hajerot e Di-Jahab. 2 Yaadu nyalaaɗe 11 neɗɗo yahata hakkunde Sinayi* e Kades-Barneya si tokkii laawol dewoowol waamnde Seyiir. 3 Ley hitaande capanɗe nayaɓerde wurtagol Israa'iilankooɓe leydi Misira, nyannde go'o lewru sappo e go'aɓurdu, Muusaa haaldi e maɓɓe dow ko Joomiraaɗo yamiri fuu. 4 Ɗum waɗii gaɗa ko ɓe njaalii Sihon, kaananke Amorinkooɓe jooɗinooɗo Hesbon e Oga kaananke Basan, jooɗinooɗo Astarot e Edirey.5 Wo lettugal Urdun, ley leydi Mo'ab Muusaa fuɗɗi laaɓinande ɓe jamirooje Tawreeta Joomiraaɗo. Inan ko o wi'i ɓe:
No Joomiraaɗo yamiri ɓe ndillira Sinayi
6 Nde njooɗinoɗen ɗakkol waamnde Sinayi ndeen, Laamɗo Joomiraaɗo men haaldii e meeɗen wi'i:
— Joonnde mon ɗakkol waamnde nde heƴii joonin. 7 Ndelle ummee ƴeenyowon baamle Amorinkooɓe, naaton leyɗe piiliiɗe ɗum'en e njaayri Araba e leydi baamle e jaayri sera baamle e Negeb mo horɗoore e daande maayo, leydi Kanaana e Liban faa yottoo maayo Efrat. 8 Ndaaron, mi hokkii on ndi. Njehee njeytowee ndi. Kayri woni ndi Joomiraaɗo huninoo hokkan maamiraaɓe mon Ibrahiima e Isiyaaka e Yaakuuba laatoo ndongu muɓɓen, kam'en e ƴuwdi muɓɓen fuu.
No Muusaa suɓorii ardotooɓe
9 Wakkati oon mi wi'iino on:
— Mi waawataa donngal ardaade on miin tan. 10 Laamɗo Joomiraaɗo mooɗon barkinii on, ɗuuɗinii on faa inan hannden oɗon nanndi e koode kammu. 11 Laamɗo Joomiraaɗo maamiraaɓe mooɗon ɓeyda on kile ujunere de barkina on hono no wiirunoo noon. 12 Noy miin tan mbaawirmi ronndaade donngal teddungal ngal laataniɗon kam ngaal e bolwole mon ɗeen? 13 Ndelle cuɓee hakkunde lenyi mooɗon worɓe saahiiɓe, wooduɓe hakkillo, anndaaɓe faa mi waɗa ɗum'en mawɓe mon.
14 Wakkati oon njaabiɗon kam mbiiɗon:
— Ko mbiiɗaa min ngaɗa ɗuum na wooɗi.
15 Ndeen kooƴumi hooreeɓe lenyi mooɗon, worɓe saahiiɓe, anndaaɓe ɓeen, ngattumi ɗum'en e ardaade on faa laatoo hooreeɓe yimɓe ujune ujune e hemre hemre e capanɗe joy joy e sappo sappo e ardiiɓe lenyi mooɗon.
16 Wakkati oon inan yamiroore nde kokkumi sarotooɓe mooɗon ɓeen: kettindanoɗon sakiraaɓe mooɗon de cariron laaɓal hakkunde neɗɗo e sakiike muuɗum naa janano. 17 Taa wooda mo njinnganton ley sariya. Kettindanoɗon lokkaajo e jom semmbe fuu. Taa kulon fay gooto sabo wo Joomiraaɗo jeyi sariya. Si woodii ko tiiɗi on fu, ngaddon haala kaan yeeso am faa mi hettindoo.
18 Noon njamirnoomi on ngaɗon wakkati oon.
Muurtere Israa'iilankooɓe naarude leydi ndi podanaa ndiin
19 Caggal ɗuum, ndilluɗen Sinayi, peccitinɗen ladde yoornde mawnde hulɓiniinde nde njiiɗon ndeen. Aduɗen laawol baamle Amorinkooɓe fodde no Laamɗo Joomiraaɗo meeɗen yamirnoo en faa njottiɗen Kades-Barneya. 20 Ndeen mbiimi on:
— On njottake waamnde Amorinkooɓe nde Laamɗo Joomiraaɗo meeɗen hokkata en ndeen. 21 Ndaaree: Laamɗo Joomiraaɗo mooɗon wattii leydi ndiin e juuɗe mooɗon. Njahon njeytowon ndi hono no Laamɗo Joomiraaɗo maamiraaɓe mon wi'iri noon. Taa kulon, taa nesi mooɗon taƴa.
22 Ndeen on fuu ɓattiɗon kam mbiiɗon:
— En nela woɓɓe meeɗen artoo korowa leydi ndiin. Ɓe ngarta ɓe kolla en no ndi worri e laawol ngol tokketen, e galluuje ɗe naateten fuu. 23 Haala kaan fotani kam de ittumi worɓe 12 hakkunde mooɗon, lenyol fuu gorko gooto. 24 Ɓe ndilli, ɓe ƴeenyowi baamle faa ɓe njottii naɗɗol Eskol, ɓe kori nokkuuje ɗeen. 25 Ɓe itti ɓiɓɓe leɗɗe leydi ndiin ɓe ngaddani en. Ɓe kolli en kabaaru mayri ɓe mbi'i:
— Leydi ndi Laamɗo Joomiraaɗo meeɗen hokkata en ndiin wo lobbiri.
26 Ammaa on calake yottaade ndi. On muurtanii jamirooje Laamɗo Joomiraaɗo mooɗon. 27 Oɗon ŋurŋurta ley hukumuuji mon oɗon mbi'a:
— Wo saabe nganyaandi de Joomiraaɗo wurtini en Misira faa watta en e juuɗe Amorinkooɓe de kalka en. 28 Toy njahaten? Sakiraaɓe meeɗen taƴii nesiiji men na mbi'a: «Yimɓe ɓeen na ɓuri en semmbe e manngu, galluuje ɗeen du, wo mawɗe cemmbiɗinɗe piilniraaɗe kokuuji toowɗi faa na tikowi kammu. Min nji'ii fay yimɓe Anakinkooɓe toon, tagaako mawko koon.»
29 Ndeen mbi'imi on:
— Taa kulee ɓe, taa nesiiji mon taƴa. 30 Laamɗo Joomiraaɗo mooɗon ardoto on, kam e hoorem haɓanan on hono no waɗirnoo e gite mon leydi Misira noon. 31 Ley ladde yoornde on nji'i no Joomiraaɗo wuundorii on hono no neɗɗo wuundortoo ɓiyum dow laawol ngol tokkuɗon faa kewtuɗon nokkuure ndee.
32 Ammaa e ɗuum fuu on koolaaki Laamɗo Joomiraaɗo mooɗon, 33 laatinooɗo ardo mooɗon dow laawol faa filanoo on to koɗoton oon. Jemma fuu imo ɗowirannoo on foyre yiite faa o holla on laawol, nyalooma du, e ruulde. *
34 Joomiraaɗo nanii haalaaji mon ɗiin de tikki sanne faa hunii wi'i:
— 35 Fay gooto hakkunde jamaanu bonɗo oo yi'ataa leydi lobbiri ndi kuninoomi mi hokkan maamiraaɓe maɓɓe ndiin, 36 si wanaa Kaalibu ɓii Yefune. Kam kaa, yi'an ndi wooɗi du, mi hokkan ɗum leydi ndiin, kam e ɓiɓɓe muuɗum. Mi hokkan o leydi ndi koyɗe makko njaaɓi ndiin saabe o njokkii Joomiraaɗo e ɓernde makko fuu.
37 Fay miin, Joomiraaɗo tikkanii kam saabe mooɗon faa wi'ii kam:
— Fay aan, a naatataa leydi ndiin. 38 Ammaa Yoosuwa ɓii Nuun, golloowo maaɗa oon kaa, cemmbinɗinaa ɗum sabo wo kam ronnata Israa'iila leydi ndiin. 39 Ɓiɓɓe mooɗon ɓe mbiiɗon nanngete, sukaaɓe ɓe kewtaay senndude ko boni e ko wooɗi ɓeen, kam'en naatata ndi. Wo ɓeen kokkumi leydi ndiin, kamɓe njeytata ndi. 40 Ammaa onon kaa, njeccee ley ladde yoornde, ndewon Maayo Maaliya.
41 Ndeen njaabiɗon mbiiɗon:
— Min ngaɗii hakke yeeso Joomiraaɗo. Min njahan min konowa fodde no Laamɗo Joomiraaɗo amin yamiri min noon.
Mono e mooɗon fuu adi kaɓitirɗe muuɗum, miiliɗon oɗon mbaawi ƴeenyude baamle ɗeen batala. 42 Ndeen Joomiraaɗo wi'i kam:
— Mbi'aa ɓe taa ɓe ƴeenya, taa ɓe kona sabo mi waldaa e maɓɓe. Taa ɓe ngaɗa wayɓe maɓɓe keɓa jaalorgal dow maɓɓe.
43 Kaaldumi e mooɗon ammaa on kettindaaki, muurtanɗon jamirooje Joomiraaɗo de mawninkinaare mooɗon waɗi ƴeenyuɗon dow baamle ɗeen. 44 Noon Amorinkooɓe jooɗinooɓe ley baamle ɗeen mburtorii kawri e mooɗon, ndiiwi on hono nyaaki, puɗɗi warude on gilla Seyiir faa hewti Horma. 45 Nde ngartunoɗon ndeen, mboyuɗon yeeso Joomiraaɗo ammaa o hettindaaki bullaali mon ɗiin, o saanaay gonɗi mooɗon. 46 Saabe majjum de keddiɗon Kades faa ɓooyi.