2
1 Ndeen njecciɗen ladde yoornde, ƴuuruɗen faro Maayo Maaliya fodde no Joomiraaɗo yamirnoo kam. En ɓooyii e fiilaade baamle Seyiir ɗeen.No Israa'iilankooɓe peccitiri leyɗe Edom e Mo'ab e Amon
2 Joomiraaɗo wi'i kam:
— 3 On ɓooyii e fiilaade baamle ɗee, joonin le, ooncoree faro soɓɓirre. 4 Inan yamiroore nde kokkataa ɓe: On ndewan ɗakkol keerol leydi sakiraaɓe mooɗon, ɓiɓɓe Isuwa jooɗiiɓe Seyiir ɓeen. Ɓe kulan on ammaa kakkilon sanne, 5 taa toonyoɗon ɓe sabo mi hokkataa on fay ɗo koyngal yaaɓa. Wo Isuwa kokkumi nokkuure baamle Seyiir ndeen faa laatoo jeyal muuɗum. 6 Ko nyaamoton e ko njaroton fuu sey coodiron ɗum ceede to maɓɓe. 7 Sabo Laamɗo Joomiraaɗo mooɗon barkinii golle mon fuu. O haybanii yaadu mooɗon ley ladde mawnde yoornde ndee. Duuɓi 40 hikka woni ko Laamɗo Joomiraaɗo mooɗon wondi e mooɗon. Faa'e nyakaay on.
8 Ndeen njoppuɗen laawol peccitoowol hakkunde sakiraaɓe meeɗen ɓiɓɓe Isuwa jooɗiiɓe leydi Seyiir ɓeen. Ɗum woni laawol njaayri Araba ƴuuroowol Eylat e Esiyon-Geber. Njecciɗen ndewuɗen ladde Mo'ab yoornde.
9 Joomiraaɗo wi'i kam:
— Taa toonyoɗon Mo'abinkooɓe, taa kaɓdon e maɓɓe sabo mi hokkataa on ngeɗu e leydi maɓɓe. Wo ɓiɓɓe Luudu kokkumi leydi Ar faa laatoo jeyal muɓɓen.
10 Eminkooɓe njooɗinoo toon arannde. Wo ɓe tagaako ɗuuɗko mawko ko darɗe toowɗe hono no Anakinkooɓe ni. 11 Eminkooɓe e Anakinkooɓe fuu na noddiree Refayinkooɓe. Ammaa Mo'abinkooɓe na noddirannoo ɓe Eminkooɓe. 12 Arannde Horinkooɓe na njooɗinoo Seyiir. Ammaa ɓiɓɓe Isuwa ngari njeyti leydi maɓɓe, kalki ɓe de njooɗii nokkuuje maɓɓe hono no Israa'iila waɗiri e leydi ndi jooɗii e muuɗum hannden, ndi Joomiraaɗo hokki ɗum ndiin noon.
13 Saabe majjum de Joomiraaɗo wi'i:
— Ummee peƴƴon naɗɗol Jered.
Ndeen peƴƴuɗen naɗɗol ngool.
14 Njahaɗen yaadu duuɓi 38 hakkunde Kades-Barneya e naɗɗol Jered. Ley duuɓi ɗiin, jamaanu worɓe hewtunooɓe yaade konu fuu maayi fodde no Joomiraaɗo hunorinoo noon. 15 Junngo Joomiraaɗo na halkannoo ɓe ley hoɗorde ndeen faa ɓe fuu ɓe timmi.
— 18 Hannden on ndewan Ar pecciton keerol leydi Mo'ab. 19 On njottoto yeeso Amoninkooɓe. Ammaa taa toonyoɗon ɓe, taa kaɓdon e maɓɓe sabo mi hokkataa on ngeɗu ley leydi maɓɓe ndiin. Wo ɓiɓɓe Luudu kokkumi ndi faa laatoo jeyal muɓɓen.
20 Leydi ndiin du, na ndaardenoo wo leydi Refayinkooɓe. Wo ɓeen njooɗinoo toon arande. Amoninkooɓe na noddira ɓe Jamjuminkooɓe. 21 Wo ɓe tagaako ɗuuɗko mawko sanne ko darɗe toowɗe hono Anakinkooɓe ni. Joomiraaɗo halki ɓe yeeso Amoninkooɓe de ɓeen njeyti leydi maɓɓe, jooɗii ley mayri. 22 Wo noon Joomiraaɗo waɗirannoo ɓiɓɓe Isuwa jooɗiiɓe Seyiir nde halkunoo Horinkooɓe yeeso muɓɓen ndeen. Ɓe njeyti leydi ndiin ɓe njooɗii e mayri faa warde hannden. 23 Awinkooɓe jooɗinooɓe ley gure faa hewti Gaaja du, Kaftorinkooɓe ƴuuruɓe Kaftor kalki ɗum'en de njooɗii nokkuuje muɓɓen.
24 Ndelle ummee, peƴƴowon gooruwol Arnon. Ndaaron, mi wattii Sihon kaananke Hesbon Amorinke oon e leydi muuɗum fuu e juuɗe mooɗon. Puɗɗee honude ɓe, njeyton leydi ndiin. 25 Gilla hannden puɗɗammi waɗude lenyi gonɗi ley duuniyaaru fuu kula on kulol manngol. Nde ɓe nani kabaaru mooɗon fu, nesi maɓɓe taƴan, ɓe ndiwnan saabe mooɗon.
No Israa'iilankooɓe njeytiri leydi Sihon
26 Muusaa wi'i: Nde njooɗinoɗen ladde Kedemot ndeen, mi waɗii nelaaɓe njaha to Sihon, kaananke Hesbon, kaaldira ɗum jam, mbi'a ɗum:
— 27 Accaa min peccita leydi maaɗa min paltoo. Wo laawol tan min tokkata. Min celirtaa nano naa nyaamo. 28 Ko min nyaamata e ko min njarata fuu min njoɓiran buuɗi cardi. Ko min kaajaa woni accaa min paltoo e koyɗe amin tan. 29 Wo noon ɓiɓɓe Isuwa jooɗiiɓe Seyiir e Mo'abinkooɓe jooɗiiɓe Ar ngaɗani min. Accaa min paltoo faa min njottoo maayo Urdun, min naata leydi ndi Joomiraaɗo Laamɗo amin hokkata min ndiin.
30 Ammaa Sihon kaananke Hesbon oon jaɓaay pecciten leydi muuɗum paltoɗen sabo Laamɗo Joomiraaɗo mooɗon waɗii o yoornii hoore makko, o sattinii ɓernde makko faa watta o e juuɗe mooɗon no worri hannden noon.
31 Joomiraaɗo wi'i kam:
— Ndaar mi wattan Sihon e leydi muuɗum fuu e juuɗe maaɗa. Ndelle fuɗɗu teetude leydi makko gilla hannden, njeytaa ndi.
32 Ndeen kaananke Sihon e yimɓe muuɗum fuu mburtii kawridi en e wolde ley wuro Yahas. 33 Laamɗo Joomiraaɗo meeɗen watti o e juuɗe meeɗen de tappuɗen o kanko e ɓiɓɓe makko e yimɓe makko ɓeen fuu. 34 Wakkati oon teetuɗen galluuje makko fuu, kalkuɗen ko woni e majje fuu, worɓe e rewɓe e sukaaɓe, en njoppaay buurɗo fay gooto. 35 Ndeen kooƴuɗen mardi maɓɓe e jawdi ngonnoondi ley galluuje maɓɓe ɗe njeytuɗen ɗeen fuu. 36 Gilla Aro'er gonɗo daande gooruwol Arnon e galluure wonnde daande muuɗum faa hewta Galaad fuu, en kawraay galluure ɓurnde en semmbe. Laamɗo Joomiraaɗo meeɗen watti ɗe ɗe fuu e juuɗe meeɗen. 37 Ammaa on meemaay leyɗe Amoninkooɓe gonɗe naɗɗol Yabok e galluuje gonɗe dow baamle e nokkuuje ɗe Laamɗo Joomiraaɗo meeɗen haɗunoo en ɗeen fuu.