No laamu Oga jaaloraa
3
1 Gaɗa ɗuum, ooncoriɗen laawol Basan. Oga, kaananke leydi ndiin e konunkooɓe muuɗum fuu mburtii kawridi en e konu ley wuro Edirey. 2 Joomiraaɗo wi'i kam:— Taa hulu o sabo mi wattii o e juuɗe maaɗa kanko e yimɓe makko e leydi makko fuu. Ngaɗaa o hono no ngaɗuɗaa Sihon, kaananke Amorinkooɓe jooɗinooɗo Hesbon noon.
3 Laamɗo Joomiraaɗo meeɗen wattii Oga, kaananke Basan e yimɓe muuɗum fuu e juuɗe meeɗen. Kalkuɗen ɓe faa buurɗo fay gooto heddaaki. 4 Wakkati oon teetuɗen galluuje makko fuu, en keddaay galluure fay wootere. Ɗe galluuje 60, tawti leydi Arigob, leydi Basan laamu Oga ndiin fuu. 5 Galluuje ɗeen fuu wo cemmbiniraaɗe kokuuji toowɗi e gampuuje coketeeɗe. Na woodunoo du, gure ɗuuɗɗe ɗe kowiraaka kokuuji. 6 Kalkuɗen galluuje maɓɓe e worɓe e rewɓe e sukaaɓe fuu hono no ngaɗuɗen Sihon kaananke Oga noon. 7 Ndeen kooƴuɗen mardi maɓɓe e jawdi ngonnoondi ley galluuje ɗeen fuu.
No leydi Galaad yeɗiraa
8 Noon teetirɗen leyɗe kaanankooɓe Amorinkooɓe ɗiɗo ɓeen gilla lettugal Urdun, daande Arnon faa hewti waamnde Hermon. 9 (Sidoninkooɓe na noddira Hermon Siriyon, Amorinkooɓe du, Senir.) 10 Teetuɗen galluuje gonɗe dow nokkuuje Galaad e Basan toowɗe faa hewti Salka e Edirey, galluuje laamu Oga ley leydi Basan fuu. 11 Tawi ley lenyol Refayinkooɓe fuu, Oga kaananke Basan tan heddinoo na wuuri. Leeso makko, wo njamndiiwo. Njuuteefi muuɗum na ɓura piyanɗe jeetati, njaajeefi muuɗum du hono piyanɗe nay. Ingo woni wuro Rabba leydi Amoninkooɓe faa warde hannden.
12 Wakkati oon, njeytuɗen leydi ndiin. Kokkumi ndi yimɓe Ruben e ɓe Gad gilla Aro'er yaade gooruwol Arnon e feccere baamle Galaad e galluuje gonnooɗe toon fuu. 13 Feccere lenyol Manasa du, kokkumi ɗum ko heddii e Galaad, leydi laamu Oga kaananke Basan, tawti ngenndi Arigob e leydi Basan fuu. Toon wi'etee leydi Refayinkooɓe. 14 Ya'iir, ɓii Manasa hooƴi ngenndi Arigob ley leydi Basan faa hewti keerol Gesurinkooɓe e Makatinkooɓe. O inndiri ndi Ya'iir, innde makko. Ɗum saabii de na wi'ee hoɗorde Ya'iir faa warde hannden. 15 Mi hokkii Makir leydi Galaad. 16 Yimɓe Ruben e ɓe Gad du, mi hokkii ɗum'en gilla Galaad yaade gooruwol Arnon, hakkunde maggol woni keerol leydi ndiin, faa hewta ngol Yabok, keerol leydi Amoninkooɓe. 17 Faro gorgal du, njaayri Araba e Urdun na laatii keerol leydi ndiin gilla maayo Kinaret faa hewti maayo Araba, ɗum woni ngo Lamɗam yaade jippitorɗe Pisiga faro lettugal.
18 Ndeen kokkumi on yamiroore ndee, mbiimi on:
— Laamɗo Joomiraaɗo mooɗon wattii leydi ndii e juuɗe mooɗon faa njeyton ndi. Ndelle onon konunkooɓe semmbiɗinɓe ɓeen fuu, sey kooƴon kaɓitirɗe mooɗon de ardoɗon sakiraaɓe mon Israa'iilankooɓe. 19 Deekiraaɓe mon e ɓiɓɓe mon e cogge mon fuu keddoo ley galluuje ɗe kokkumi on ɗeen, sabo miɗo anndi oɗon njogii cogge ɗuuɗɗe. 20 Ɓe keddoo ɗoon faa wakkati Joomiraaɗo hokkowi sakiraaɓe mooɗon ɓeen powtiri hono no mooɗon noon. Keddodoɗon e maɓɓe faa nde ɓe kewtowi leydi ndi Joomiraaɗo Laamɗo mooɗon hokkata ɓe faro gorgal Urdun ndiin. Caggal ɗuum, oɗon mbaawi yeccaade mono fuu jooɗoo ley nokkuure nde kokkumi ɗum.
21 Wakkati oon mi hokkiino Yoosuwa jamirooje mbiimi ɗum:
— Gite maaɗa nji'i no Laamɗo Joomiraaɗo mooɗon waɗi kaanankooɓe ɗiɗo ɓeen; wo noon pay o waɗata laamuuji ɗi kawroton nde peƴƴoyɗon Urdun fuu. 22 Ndelle taa kulon ɓe sabo Laamɗo Joomiraaɗo mooɗon kam e hoorem honanta on.
No Muusaa heɓirtaa laawol naatude leydi Kanaana
23 Ndeen ŋaariimi Joomiraaɗo mbiimi:
— 24 Laamɗo Joomiraaɗo, a fuɗɗii hollude kam miin maccuɗo maaɗa manngu ma e semmbe maaɗa mawɗo. Yalla alla oye dow kammu e dow leydi waawi waɗude golleeji maaɗa e kaayeefiiji hono ɗii? 25 Accu mi faltoo, mi yi'a leydi lobbiri ngonndi faro gorgal Urdun ndiin. Mi heɓa mi yi'a baamle lobbe e leydi Liban.
26 Ammaa Joomiraaɗo tikkanii kam saabe mooɗon, o hettindanaaki kam. O wi'ii kam:
— Heƴii, taa haaldam haala ɗuum katin! 27 Ƴeenyu faa dow waamnde Pisiga, ndaaraa faro gorgal e soɓɓirre e horɗoore e lettugal. Njiiraa ndi gite maaɗa, ammaa a faltataako maayo Urdun ngo'o. 28 Kokkaa Yoosuwa jamirooje e ngorgu, cemmbinɗinaa ɗum sabo wo kam ardotoo jamaare ndeen faa ronna ɗum leydi ndi kokkammi ɓe ndi nji'ataa ndiin.
29 Gilla ndeen keddiɗen ley naɗɗol yeeso Bayti-Peyor.