Keeri leydi Kanaana
34
1 Joomiraaɗo haaldi e Muusaa wi'i:— 2 Njamiraa Israa'iilankooɓe mbi'aa: Nde njottoyɗon leydi Kanaana ndiin fu, inan leydi ndi ndoninammi on ndiin kam e keeri muuɗum.
3 Keerol mayri faro horɗoore fuɗɗan gilla ladde Sin faa yotto leydi Edom. Keerol ngool ƴuura faro lettugal faa hewta maayo Lamɗam. 4 Keerol mooɗon faro horɗoore du, ƴuura ƴeenyirde Jahe yaade ladde Sin rewa horɗoore Kades-Barneya, fanta Hasar-Addar wittoro Asimon. 5 Ngol ƴuura Asimon ngol fiiltoro pogowol Misira faa yotto hunnduko maayo Manngo.
6 Faro gorgal du, maayo Manngo laatoo keerol leydi mooɗon.
7 Inan keerol leydi mooɗon faro soɓɓirre: ndiidon ngol gilla daande maayo Manngo faa yottoo waamnde Hor. 8 Ndiidon keerol ngool gilla waamnde Hor faa yottoo Lebo-Hamat de ngol wittoroo Sedad. 9 Ngol ƴuura Jifron, ngol fanta Hasar-Eyinan. Ɗoon woni keerol mooɗon faro soɓɓirre.
10 Faro lettugal du, ndiidon ngol gilla Hasar-Eyinan faa yotto Sefam. 11 Keerol ngool, ƴuwa Sefam jipporo Ribila, lettugal Ayin. Ngol jippoo faa daande weendu Kinaret faro lettugal. 12 Katin ngol jipporo Urdun faa yotto maayo Lamɗam. Ɗum woni leydi mooɗon e keeri muuɗum.
13 Muusaa yottini Israa'iilankooɓe jamirooje ɗeen, wi'i ɗum'en:
— Inan leydi ndi peccirton cumnal hakkunde mooɗon. Joomiraaɗo yamirii ndi hokkee lenyi Israa'iila jeenay e feccere ɗiin. 14 Lenyol Ruben e Gad e feccere lenyol Manasa keɓii ngeɗu muɓɓen, fodde cuuɗi muɓɓen. 15 Yimɓe lenyi ɗiɗi ɗiin tawti feccere lenyol Manasa keɓii ngeɗu muɓɓen faro lettugal Urdun ƴeenyirde Yeriko.
Inɗe Ardiiɓe Lenyi
16 Joomiraaɗo wi'i Muusaa:
— 17 Inan inɗe worɓe feccooɓe leydi ndiin hakkunde mooɗon: almaami Eliyajar e Yoosuwa ɓii Nuun. 18 Wooɗi du, ngaɗon ardiiɓe lenyi Israa'iila, lenyol fuu neɗɗo gooto. Ɓeen mballa on e feccugol leydi ndiin. 19 Inan inɗe maɓɓe:
Lenyol Yahuuda wo Kaalibu ɓii Yefunne.
20 Lenyol Simeyon wo Samuwiila ɓii Amihud.
21 Lenyol Benyamin wo Elidad ɓii Kislon.
22 Lenyol Dan wo Bukki ɓii Yogali.
23-24 Lenyi ɓiɓɓe Yuusufi:
— Lenyol Manasa wo Haniyel ɓii Efod;
— Lenyol Efrayim wo Kemuwel ɓii Siftan.
25 Lenyol Jabulon wo Elisafan ɓii Parnak.
26 Lenyol Isakar wo Paltiyel ɓii Ajjan.
27 Lenyol Aser wo Ahihud ɓii Selomi.
28 Lenyol Naftali wo Pedahel ɓii Amihud.
29 Ɓee ngoni ɓe Joomiraaɗo yamiri pecca leydi Kanaana hakkunde Israa'iilankooɓe.