Sariya dow wolde
20
1 Nde njahoyɗon faa kaɓdon e wayɓe mon de njiiɗon pucci ɗuuɗɗi e torkooji ɗuuɗɗi e ori sordaasiiɓe ɓurɓe on fu, taa kulon sabo Laamɗo Joomiraaɗo mooɗon burtinɗo on leydi Misira oon na wondi e mooɗon. 2 Wakkati cegiliɗon faa puɗɗon wolde ndeen, almaami ɓattoo haalda e sordaasiiɓe ɓeen, 3 wi'a ɓe:— Kettindee, onon yimɓe Israa'iila. Hannden on kawran e wayɓe mon ley wolde. Taa ɓerɗe mon ndiwna. Taa kulon ɓe, taa nesi mon taƴa yeeso maɓɓe. 4 Laamɗo Joomiraaɗo mooɗon na yaada e mooɗon faa haɓda e wayɓe mon de hisina on.
5 Caggal ɗuum mawɓe ardiiɓe ɓeyda mbi'a:
— Yalla na woodi hakkunde mooɗon nyiɓuɗo suudu muuɗum de naataay ndu tafon naa? Sey joomum hoota suumtowa suudu nduun taa maaya ley wolde ndee de goɗɗo lutta suumta ndu. 6 Yalla na woodi aawuɗo ngesa mum inabooje de heɓaay barke magga tafon naa? Sey joomum hoota wuro muuɗum taa maaya ley wolde ndee de goɗɗo lutta nawtoroo inabooje ɗeen. 7 Yalla na woodi kaɓɓanɗo debbo de wartiraay ɗum ley ɓaade muuɗum tafon naa? Sey joomum hoota taa maaya ley wolde ndee de gorko goɗɗo hooƴa debbo oon.
8 Mawɓe ɓeen keddoo na kaalda e sordaasiiɓe ɓeen na mbi'a:
— Moy wondi e kulol? Moy faamata ɓernde muuɗum na diwna? Joomum hoota taa bonnu ɓerɗe sakiraaɓe muuɗum heddiiɓe hono no muuɗum noon.
9 Nde mawɓe ɓeen timmini haaldude e sordaasiiɓe ɓeen fu, ndarna hooreeɓe maɓɓe yeeso jamaare ndeen.
10 Nde njottiɗon galluure faa konon ɗum fu, artoɗon kokkon ɓe laawol ɓe paamira e mooɗon. 11 Si ɓe njaɓii jam mooɗon ɓe omtanii on dammbuɗe maɓɓe e jam fu, ngaɗon tawaaɓe ley mayre fuu laatoo gollanooɓe on golle tilsuɗe. 12 Si ɓe calake faamrude e mon, ɓe muuyii haɓdude e mooɗon du, piilnon galluure maɓɓe. 13 Laamɗo Joomiraaɗo mooɗon wattan ɓe e juuɗe mon. Mbardon worɓe galluure ndeen fuu e kaafaaje. 14 Rewɓe e sukaaɓe e daabaaji e ko woni ley galluure ndeen fuu, njeyton ɗum. Nawtoroɗon jawdi ndi teetuɗon e juuɗe wayɓe mon ndi Laamɗo Joomiraaɗo mooɗon hokki on ndiin. 15 Noon ngatton galluuje boɗɗuɗe on sanne ɗeen. Ɗum woni galluuje ɗe njeyaaka e leyɗe lenyi ɗiin.
16 Ammaa galluuje gonɗe ley leydi ndi Laamɗo Joomiraaɗo mooɗon hokkata on laatoo ndonngu mooɗon ɗeen kaa, taa accidon fay gooto e yonki. 17 Kalkon Hitiyankooɓe e Amorinkooɓe e Kanaaninkooɓe e Perisinkooɓe e Hewinkooɓe e Yebusinkooɓe, piɗɗon ɓe fodde no Laamɗo Joomiraaɗo mooɗon yamiri on noon. 18 Noon waɗata taa ɓe ekintina on waɗude ko harmi ko ɓe ngaɗanta allaaji maɓɓe ɗiin de ngaɗon hakke yeeso Laamɗo Joomiraaɗo mooɗon.
19 Si ɓooyii oɗon piilnii galluure faa kippoɗon ɗum fu, taa kalkiron leɗɗe mayre jammbere. Nyaamon ɓiɓɓe majje ammaa taa coppon ɗe. Yalla leɗɗe gese ɗeen wo tagaaɓe sakko kippoɗon ɗe naa? 20 Ammaa leɗɗe ɗe annduɗon ɓiɓɓe muɓɓen nyaamataake fuu nawtoroɗon ɗum'en faa ƴeenyiron kokuuji galluure nde kaɓdoton ndeen faa nde saama.