Haala gaɗuɗo war-hoore de annditaaka
21
1 Si ley leydi ndi Laamɗo Joomiraaɗo mooɗon hokkata on faa laatoo jeyal mon ndiin, ɓanndu baraaɗo tawaama na waalii ley gese de faamaaka moy wari joomum fu, 2 mawɓe mon e sarotooɓe njaha ponndowa hakkunde to joomum waraa toon e galluuje piiliiɗe ɗum. 3 Nde ɓe paami galluure ɓurnde ɓattaade baraaɗo oon fu, mawɓe galluure ndeen kooƴa nyalohol kol remnaaka, kol gollinaaka goɗɗum abada. 4 Mawɓe ɓeen njaara kol daande ndiyam iloojam wakkati fuu, ley nokkuure nde remaaka wooɗi aawaaka. Ɓe kela hoƴƴudu makkol ɗoon.5 Ndeen almaami'en, ɓiɓɓe Lewi ɓattoo sabo wo kam'en Laamɗo Joomiraaɗo mooɗon suɓii faa ngolla golle muuɗum wooɗi mbarkinira e innde muuɗum. Wo kamɓe carotoo kabaaru kalala naa barmere fuu. 6 Mawɓe galluure ɓurnde ɓattaade maayɗo oon ɓeen loota juuɗe muɓɓen dow nyalohol kol hoƴƴudu muuɗum helaa daande ndiyam kool. 7 Ɓe ceedoo, ɓe mbi'a:
— Juuɗe amin ndufaay ƴiiƴam ɗaam, wooɗi gite amin du nji'aay na ɗam rufee. 8 Yaa Joomiraaɗo, mooytu hakke yimɓe maaɗa, Israa'iilankooɓe ɓe ndimɗinɗaa ɓeen. Taa ƴiiƴam laaɓuɗo baraaɗo ɗaam saama dow Israa'iilankooɓe.
Ndeen ɓe mooytante hakke ƴiiƴam ɗaam.
9 Si on ngaɗii noon fu, on ittii hakke ƴiiƴam laaɓuɗo ndufaaɗam ɗaam sabo on ngaɗii ko dartii yeeso Joomiraaɗo.
Haala ɓangal debbo konaaɗo
10 Nde njaaton faa kaɓdowon e wayɓe mon de Joomiraaɗo watti ɗum'en e juuɗe mon faa ngaɗon ɓe kasunkooɓe fu, 11 si gooto mon taykake hakkunde maɓɓe debbo ŋarɗuɗo de na haajaa ɓangude ɗum fu, 12 yaara debbo oon ley suudu muuɗum. Debbo oon femmba ngaasam de helnya peɗeeli muuɗum, 13 ɓortoo saayo ngo ɓorninoo wakkati nanngeede muuɗum ngoon de heddoo ley ɓaade gorko oon. Debbo oon wulla innum e bammum faa waɗa lewru. Gaɗa ɗuum, gorko oon ɓaŋa o, o laatoo deekum. 14 Si warowi debbo oon welanaa o katin fu, o acca ɗum yaha to haajaa fuu. Gorko oon walaa laawol sonnude mo de jaɓa ceede naa waɗude o korɗo sabo semtinii o.
Ngeɗu hammadiiɓe
15 Si gorko jom rewɓe ɗiɗo na yiɗi debbo gooto de yiɗaa gooto, si tawii heɓdiino e maɓɓe ɓe ɗiɗo fuu ɓiɓɓe de hammadiijo oon wo ɓii debbo mo o yiɗaa oon fu, 16 nyannde o senndirta jawdi makko hakkunde ɓiɓɓe makko ɓeen fu, o waawaa hooƴude ngeɗu hammadiijo oon o hokka ɓii debbo mo o yiɗi oon lunnde hammadiijo makko oon sabo wo kam woni artiiɗo rimeede. 17 Na tilsi o jaɓa ɓii debbo mo o yiɗaa oon laatoo hammadiijo makko sabo wo kam artii rimeede. Saabe ɗuum de tilay o hokka ɗum ngeɗu muuɗum nguun kile ɗiɗi sabo wo oon woni puɗɗam ɓeyngu makko, oon jeyi ngeɗu hammadiijo.
No ɓiɗɗo bonɗo jukkortee
18 Si neɗɗo na woodi ɓiɗɗo gorko dundaro, muurtoowo, mo hettindantaako innam e bammum, fay si iɓe tinndina ɗum fu, 19 ɓe nannga suka oon ɓe njaara ɗum dammbugal galluure yeeso mawɓe galluure ndeen. 20 Ɓe mbi'a mawɓe ɓeen:
— Inan ɓii amin gorko yoora hooreejo, muurtoowo. O hettindantaako min. O laaliiɗo, culotooɗo.
21 Ndeen worɓe galluure ndeen fuu kawrita paɗɗa mo kaaƴe faa o maaya. Noon ittirton ko boni hakkunde mooɗon. Israa'iilankooɓe fuu nanan kabaaru oon de kula.
Sariya dow baraaɗo de ɓilaa dow leggal
22 Si neɗɗo waɗii hakke gaddanoowo ɗum wareede de mbaruɗon ɗum, ɓiluɗon ɓanndum dow leggal fu, 23 taa joomum waala dow leggal ngaal. Na tilsi uwon joomum nyannde ndeen pay, sabo ɓilaaɗo dow leggal wo kuɗaaɗo yeeso Laamɗo. Taa tuuninon leydi ndi Laamɗo Joomiraaɗo mooɗon hokki on laatoo jeyal mooɗon ndiin.