Jamirooje feere feere
22
1 Si a yiitii daaba sakiike ma lalluɗo, si wo nagge naa mbaalu naa mbeewa fu, taa njeeboɗaa ɗum dilla, ammaa yeccin ɗum to joomum. 2 Si tawii wuro jom daaba oon na woɗɗi naa a anndaa ɗum, ngartiraa daaba oon ley ɓaade maaɗa. O heddoo to maaɗa faa nde joomum o warowi ƴamani o de kokkitaa ɗum. 3 Noon ngaɗataa si wo araawa naa koltal, naa ko sakiike ma lalloraa de njiituɗaa ɗum fuu. Taa njeeboɗaa ndaarande huunde ndeen.4 Si a tawii araawa naa nagge sakiike maaɗa na saami dow laawol fu, taa njeeboɗaa, mballaa mo, o ummina ɗum.
5 Debbo jeyaa ɓornaade kolte gorko. Gorko du, jeyaa ɓornaade kolte debbo. Gaɗuɗo noon fuu, waɗii ko harmi yeeso Laamɗo Joomiraaɗo mooɗon.
6 Si aɗa yaha dow laawol de a tawii suudu foondu dow lekki naa dow leydi na wondi e ɓikkoy mum naa ɓoccooɗe muuɗum naa na fukkii dow muɓɓen fu, taa kooƴidaa inniiwo oon e ɓikkoy kooy. 7 Njoppaa inniiwo oon dilla de kooƴaa ɓikkoy kooy tan. Noon waɗata faa keɓaa jam wooɗi du njuutaa balɗe.
8 Si on nyiɓii suudu heyru on kippirii ɗum maadi fu, sey piiltinon ɗum kokuwel hono hoggo dow toon taa goɗɗo ƴuura dow toon saama de maaya, laatoo wo onon caabanii ɗum maayde.
9 Taa aawon goɗɗum feere ley ngesa mon inabooje sabo ɗum fuu ɗum laatoto ko senii. Inabooje ɗeen e ko aawuɗon ɗuum fuu laatoto ko senndantee Joomiraaɗo. 10 Taa kawrondinon ngaari e araawa faa ndemida. 11 Taa ɓornoɗon saayo nyootiraango leppi leeɓi e polli.
12 Ngattanon cuddamaaje mon bukki dow coɓɓuli nay ɗiin fuu.
Sariya dow gondal hakkunde gorko e debbo
13 Si gorko ɓaŋii debbo, fukkodake e muuɗum de wanyi ɗum, 14 de ummii na fenana ɗum na bonna innde muuɗum na wi'a:
— Mi ɓaŋii debbo o, pukkodiimi e makko de tawumi wo o anndunooɗo gorko.
15 Ndeen inna debbo oon e bammum kooƴa ko hollata debbo oon anndaano gorko de njaara ɗum dammbugal galluure ndeen to mawɓe. 16 Baabiiwo oon wi'a mawɓe ɓeen:
— Mi adii ɓiyam debbo kokkumi gorko o faa laatoo deekum ammaa o yiɗaa ɓiyam debbo oon. 17 Saabe ɗuum de imo fenana ɗum, imo wi'a o tawii suka am oon na anndunoo gorko. Ammaa inan maande holloore wo goonga ɓiyam debbo oon anndaano gorko.
Ndeen ɓe peerta kaddungal ngaal yeeso mawɓe galluure ndeen. 18 Wakkati oon mawɓe ɓeen nannga gorko oon piya ɗum looci. 19 Ɓe njoɓnoo ɗum buuɗi cardi 100, ɓe kokka ɗi baaba suka debbo oon sabo gorko oon bonkake surbaajo Israa'iila mo anndaano gorko. Debbo oon heddoo wo deekiiko. O walaa laawol seerude ɗum haddi nguurndam makko fuu.
20 Ammaa si ko gorko oon wi'ii dow makko ɗuum wo goonga, o wanaa debbo mo anndaano gorko fu, 21 sey o wurtinee o darnee dammbugal ɓaade baabiiko de yimɓe galluure ndeen ngara paɗɗa mo kaaƴe faa o maaya sabo o waɗii ko boni ley Israa'iila. O waɗii woykuraaku ley ɓaade baabiiko. Noon ittirton ko boni hakkunde mooɗon.
22 Si gorko tawaama na fukkodii e debbo ɓaŋaaɗo fu, sey ɓe ɗiɗo fuu ɓe mbaree. Gorko oon e debbo oon fuu wo wareteeɓe. Noon ittirton ko boni ley Israa'iila.
23 Si ɓiɗɗo debbo mo anndaa gorko haɓɓanaama de gorko goɗɗo hawrii ɗum ley galluure de fukkodake e muuɗum fu, 24 sey suka debbo oon e gorko oon fuu mburtinee ndarnee dammbugal galluure ndeen de paɗɗee kaaƴe faa maaya, surbaajo oon kaa, saabe halɓaay ley galluure ndeen wakkati majjum, gorko oon du, saabe semtinii dee sakiike muuɗum. Noon ittirton ko boni hakkunde mooɗon.
25 Ammaa si wo ley ladde gorko oon hawri e makko de nanngiri o doole fukkodii e makko fu, gorko oon tan waretee. 26 Surbaajo oon kaa, taa ngaɗon ɗum faa'e sabo waɗaay hakke kewtuɗo warude ɗum. Iɗum nanndi e gorko ummaniiɗo sakiike muuɗum faa wara ɗum. 27 Wo ley ladde gorko oon hawri e makko. Surbaajo oon halɓii ammaa heɓaay balloowo ɗum.