23
1 Haanaa gorko ɓaŋa dee bammum. Taa semtina bammum.Sariya dow ɓe ngalaa laawol naatude kawrital Joomiraaɗo
2 Gorko mo ɓoccooɗe muuɗum pusaa naa mo ngoraaku muuɗum taƴaa fuu walaa laawol naatude ley kawrital yimɓe Joomiraaɗo.
3 Njaalu du walaa laawol naatude ley kawrital yimɓe Joomiraaɗo. Fay taaniraaɓe taaniraaɓe muuɗum ngalaa laawol naatude ngal faa hewta jamaanuuji sappo.
4 Amoninke e Mo'abinke fuu naatataa ley kawrital yimɓe Joomiraaɗo. Fay taaniraaɓe taaniraaɓe muɓɓen ngalaa laawol naatude ngal faa hewta jamaanuuji sappo. Noon heddortoo faa abada. 5 Noon ɗum laatortoo sabo ɓe ngaddanaay on ndiyam e nyaamdu dow laawol wakkati mburtinoɗon leydi Misira ndeen, ammaa ɓe njoɓii Balaama ɓii Beyor mo Petor ƴuuri leydi Mesopotamiya faa wara huɗa on. 6 Ammaa Laamɗo Joomiraaɗo mooɗon salake hettindanaade Balaama. O loomtinirii kuddi ndiin e barke saabe imo yiɗi on. 7 Ndelle taa pilanoɗon ɓe ɓeydaari naa joonnde e jam haddi nguurndam mon fuu.
8 Taa mbanyon Edominkooɓe kaa sabo wo sakiraaɓe mooɗon. Taa mbanyon Misirankooɓe du sabo on laatakeno weerɓe ley leydi muɓɓen. 9 Taaniraaɓe maɓɓe jamaanu tataɓo na mbaawi naatoyde ley kawrital yimɓe Joomiraaɗo.
Haala no hoɗorde haani laaɓira
10 Nde ummoyɗon faa konon wayɓe mooɗon fu, kakkilon e ko boni fuu.
11 Si tawaama hakkunde mooɗon gorko koyɗitiiɗo ley jemma fu, sey joomum dilla ley hoɗorde ndeen nyalooma oon fuu. 12 Nde hiiri fu, joomum lootoo, si naange saami fu o yeccoo ley hoɗorde ndeen.
13 Itton nokku sera hoɗorde ndeen to njaaton ladde. 14 Gooto mon fuu na haani tawree ley gineeji muuɗum ko waawi wasirde. Nde joomum yehi ladde fuu, wasa de uwa. 15 Ngaɗon noon sabo Laamɗo Joomiraaɗo mooɗon na woni hakkunde mooɗon ley hoɗorde ndeen faa danna on de watta wayɓe on ɓeen e juuɗe mooɗon. Ndelle sey hoɗorde ndeen laatoo seniinde taa o yi'a ko newnii de o tottitoo on.
Haala maccuɗo dogguɗo joomum
16 Si maccuɗo doggii joomum warii moolake on fu, taa njeccinon ɗum to joomum oon. 17 Accon o jooɗoo to mooɗon, o wona hakkunde mooɗon ley wootere e galluuje mon nde o muuyi fuu. Taa torron o.
Haala waɗooɓe woykuraaku saabe diina
18 Israa'iilanke debbo e gorko fuu kaanaa taweede hakkunde waɗooɓe woykuraaku saabe diina. 19 Taa ngaddon ceede woykuraaku ley suudu Laamɗo Joomiraaɗo mooɗon saabe on aadakeno hokkude goɗɗum sabo ɗuum na laatii ko harmi e gite Joomiraaɗo.
Haala nyamaale tinorteeɗe
20 Taa njaɓon tino to sakiike mooɗon dow ko nyamliɗon ɗum, nde wo ceede, naa nyaamri, naa ko waawi nyamleede de heɓiree tino fuu. 21 Oɗon mbaawi jaɓude tino to janano si nyamlake on, ammaa sakiike mon kaa, taa ngaɗon ɗum noon faa Laamɗo Joomiraaɗo mooɗon barkina on ley ko ngolloton fuu nde njooɗoyiɗon ley leydi ndi o hokkata on laatoo jeyal mooɗon ndiin.
Haala aadi
22 Si on adii aadi waɗude goɗɗum saabe Laamɗo Joomiraaɗo mooɗon fu, taa kanndinon waɗude ko anniyiɗon ɗuum sabo o ƴamtan on ɗum de ɗum laatanoo on hakke. 23 Si on adaay aadi waɗande mo goɗɗum du, hakke walaa dow mooɗon. 24 Ammaa ko wurtii e kunnduɗe mon ɗuum kaa, sey kakkilanon ɗum de ngaɗiranon Laamɗo Joomiraaɗo mooɗon ko anniyiɗon ɗuum e yardamuye. Ngaɗon ko mbiiɗon ɗuum.
Haala ngesa goɗɗo