Sariya dow debbo ceeraaɗo
24
1 Si gorko ɓaŋii debbo, wondii e muuɗum de wakkati gomma warowi haajaaka ɗum katin saabe yiirii ɗum ko semtinii fu, sey winndana debbo oon talkuru ceergal. Nde o hokki ɗum talkuru nduun fu, dilla ɓaade makko. 2 Si debbo oon dillii e junngo makko fu, gorko goɗɗo na waawi ɓaŋude ɗum. 3 Si gorko oon du tawii yiɗaa o, winndanii o talkuru ceergal, hokkii o faa o dillii ɓaade muuɗum, naa du si tawii gorko oon wo maayu fu, 4 gorko artinooɗo ɓaŋi o de seeri o oon waawaa adude o waɗa deekum katin gaɗa ko o tuuninaa ɗuum. Ɗuum wo ko nyiddinii yeeso Joomiraaɗo. Taa paɗɗon leydi ndi Laamɗo Joomiraaɗo mooɗon hokkata on laatoo ndongu mon ndiin ley hakke.Haala jamirooje feere feere
5 Si gorko ɓaŋii kesum fu, taa yaha konu. Taa o tilsinanee waɗude goɗɗum. O accee o wonda e deekiiko faa waɗa hitaande muɓɓere faa o welna ɓernde muuɗum.
6 Taa njaɓon kaaƴe niisirɗe, mawnde e famarde to goɗɗo saabe nyamlake goɗɗum to mooɗon sabo ɗuum wo hooƴude nguurndam joomum jaati.
7 Si Israa'iilanke happii sakiike muuɗum waɗii maccuɗo naa sonnii ɗum fu, wo bareteeɗo. Noon ittirton ko boni hakkunde mooɗon.
8 Kakkilon sanne e nyawuuji nguru bonɗi. Ngaɗon ko Lewinkooɓe almaami'en njanngini on dow majjum fuu. Tinnoɗon ngaɗon ko mbiimi ɓe njanngina on ɗuum. 9 Miccitoɗon ko Laamɗo Joomiraaɗo mooɗon waɗunoo Mariyama dow laawol wakkati mburtinoɗon leydi Misira.
10 Si a hokkii sakiike maaɗa nyamaande fu, taa naataa ley ɓaade muuɗum kooƴaa goɗɗum ko fotata e nyamaande ndeen. 11 Keddoɗaa yaasin faa o tawre ko o hokkitete ɗuum yaasin toon. 12 Si tawii neɗɗo oon wo talkaajo fu, taa mbaaldaa e huunde muuɗum ndeen. 13 Kokkitaa ɗum huunde ndeen wakkati caamal naange faa nde fukkowi na suddii saayo muuɗum fu, ŋaaroo mbarkineɗaa de laatoo a waɗii ko dartii yeeso Laamɗo Joomiraaɗo maaɗa.
14 Taa torron golloowo mon talkaajo nde wo sakiike mon naa janano gonɗo ley leydi mon, jooɗiiɗo nder galluuje mon fuu. 15 Kokkon mo njoɓdi makko gilla naange saamaay sabo wo o talka, imo heppi jaɓude buuɗi makko. Si a waɗaay noon fu, o wullan yeeso Joomiraaɗo saabe maaɗa de ɗuum laatane hakke.
16 Baabiraaɓe mbarataake saabe hakke ɓiɓɓe muɓɓen. Ɓiɓɓe du mbarataake saabe hakke baabiraaɓe muɓɓen. Mono fu warete saabe hakke muuɗum.
17 Taa oonyon sariya de ɗalon janano naa atiime goonga, wooɗi du taa njaɓon kaddungal debbo mo gorum maayi saabe jaɓii nyamaande to mooɗon. 18 Miccitoɗon on laatakeno maccuɓe leydi Misira de Laamɗo Joomiraaɗo mooɗon rimɗini on. Wo saabe ɗuum de miɗo yamira on ngaɗon noon.
19 Wakkati tayri gese mon, si on njeggitii haɓɓere ley ngesa fu, taa njeccanoɗon nde. Njoppanon nde janano e atiime e debbo mo gorum maayi. Ndeen Laamɗo Joomiraaɗo mooɗon barkinan golleeji mon fuu.
20 Nde ɓoroyton ɓiɓɓe leɗɗe mon jaytun fu, taa njeccanoɗon ko hedditii e leɗɗe ɗeen. Njoppanon ɗe janano e atiime e debbo mo gorum maayi. 21 Nde ɓoroyton inabooje mon fu, taa njeccanoɗon ko hedditii e leɗɗe ɗeen. Ɗum laatanoo janano e atiime e debbo mo gorum maayi. 22 Miccitoɗon on laatakeno maccuɓe leydi Misira. Wo saabe ɗuum de miɗo yamira on ngaɗon noon.