25
1 Si jeddi ngaɗii hakkunde yimɓe ɗiɗo fu, njaaree to sarotooɓe. Gooduɗo goonga oon hokkee goonga. Toonyiiɗo oon du, jukkee fodde gacce muuɗum. 2 Si toonyiiɗo oon wo piiɗe jukkortee fu, carotooɗo mo oon waɗa o fukkinee e leydi yeeso muuɗum de limee guƴƴe ɗe o haani guƴƴeede fodde boofol makko ngool. 3 Taa sakiike mon oon guƴƴee ko ɓuri kile 40 sabo si o fiyaama ko ɓuri noon fu, o laatoto jawniiɗo e gite mon.4 Taa kaɓɓon hunnduko ngaari faa kaɗon ɗum nyaamude wakkati dampata butaali faa sennda gabbe e nya'ande.
Sariya dow debbo janteteeɗo
5 Si yaaye-gootooɓe ɗiɗo na mbuurdi ley ɓaade wootere de gooto muɓɓen maayii, tawii heɓaayno ɓiɗɗo gorko fu, taa deekum dilla ɓangowee janano. Sakiike goriiko oon janta o, o laatoo deekum faa heɓana maayɗo oon donoowo. 6 Ɓiɗɗo gorko mo debbo oon artii rimude fu, wo oon laatotoo hammadiijo maayɗo oon faa taa innde muuɗum yeggitee hakkunde lenyol Israa'iila.
7 Si gorko oon muuyaay hooƴude dee maayɗo oon waɗa deekum fu, debbo oon yaha dammbugal galluure ndeen to mawɓe de wi'a ɗum'en: «Sakiike jom ɓaade am salake jantude kam faa mi rimana goram maayɗo oon ɓiɗɗo gorko taa innde muuɗum lalla hakkunde Israa'iila. O muuyaay tabintinde innde sakiike makko oon.» 8 Ndeen mawɓe galluure ɓeen nodda gorko oon de kaalda e muuɗum. Si o heddake e wi'ude: «Si goonga mi haajaaka o laatoo deekam» fu, 9 debbo oon ɓattoo mo yeeso mawɓe ɓeen, ɓorta faɗo makko, tutta dow yeeso makko de ɓanta daande muuɗum wi'a: «Inan no gorko caliiɗo heɓande sakiike muuɗum maayɗo donoowo waɗetee.»
10 Noon suudu joomum inndirtee «suudu mo faɗo muuɗum ɓortaa» ley Israa'iila.
Haala jamirooje feere feere
11 Si wolde waɗii hakkunde worɓe ɗiɗo de dee gooto maɓɓe warii faa teeta gorum e juuɗe piyoo ɗum oon, si debbo oon foortii junngo muuɗum nanngii kente kaɓdoowo e gorum oon fu, 12 taƴon junngo muuɗum, taa njurmoɗon ɗum.
13 Taa ponndirɗe ɗiɗi ɓurduɗe teddeefi tawee ley bootooru mooɗon, ngal manngal de ngel pamarel. 14 Taa etirɗe ɗiɗi ɓurduɗe tawee ley ɓaade mooɗon, ngal manngal de ngel pamarel. 15 Ko haani tawreɗon woni ponndirɗe e etirɗe kiɓɓuɗe potuɗe faa balɗe mon njuuta ley leydi ndi Laamɗo Joomiraaɗo mooɗon hokkata on ndiin. 16 Sabo gaɗuɗo noon, gollirɗo jammba fuu, laatake karmuɗo yeeso Laamɗo Joomiraaɗo mooɗon.
17 Miccitoɗon ko Amalekinkooɓe ngaɗi on dow laawol nde mburtinoɗon leydi Misira. 18 Ciwtoron no ɓe kalkiri yimɓe mon sakitinooɓe na ngara sabo wakkati oon on tampiino sanne faa kunngiɗon semmbe. Ɓe ngaɗii noon saabe ɓe kulataa Laamɗo. 19 Nde Laamɗo Joomiraaɗo mooɗon hokkowi on powtiri tawi riiwii lenyi piiliiɗi on ley leydi ndi hokkata on faa laatoo ndongu mon ndiin fu, ngaɗon innde Amalek lalla ley adunaaru. Taa njeggiton.