Haala ko artii ɓenndude ley gese
26
1 Nde njottoyɗon leydi ndi Laamɗo Joomiraaɗo mooɗon hokkata on faa laatoo jeyal mon ndiin, wakkati jeytuɗon ndi faa njooɗiɗon e mayri fu, 2 itton ko artii ɓenndude ley barke gese mon, ngatton ley kanndeeje de njaaron nokkuure nde Joomiraaɗo suɓoytoo faa tabintina innde muuɗum ndeen. 3 Njahon to almaami jottinoowo sadakaaji ley nyalaaɗe ɗeen de mbi'on ɗum:— Hannden miɗen njiɗi hollude Laamɗo Joomiraaɗo maaɗa ko min naatii ley leydi ndi hunaninoo maamiraaɓe amin hokkan min ndiin.
4 Almaami oon jaɓa kanndeeje ɗeen joƴƴina yeeso sakkirde Laamɗo Joomiraaɗo mooɗon. 5 Ndeen muɓɓiton kunnduɗe mon mbi'on:
— Baabii amin na laatinoo Araminkeejo egga-hoɗaajo. Ndelle o yehiino leydi Misira kanko e yimɓe seɗɗa ɓe njooɗowii. Wari ɓe ɗuuɗi ɓe laatii lenyol manngol cemmbiɗingol.
6 Ammaa Misirankooɓe torrii min. Ɓe kollii min semmbe, ɓe ngattii min e maccangaaku. 7 Ndeen min mbullitii to Laamɗo Joomiraaɗo maamiraaɓe amin. Joomiraaɗo du, nani daaɗe amin, o yi'i torraaji e mettorgal e bone mo min njarnetee fuu. 8 Ndeen o wurtiniri min leydi Misira ndiin e semmbe makko mawɗo e maandeeji kaayniiɗi kulɓiniiɗi. 9 O waddi min nokkuure ndee, o hokki min leydi ndi kosam e njuumndi ilata e muuɗum. 10 Saabe ɗuum de, inan min ngaddii ko artii ɓenndude ley barke gese amin ɗe kokkuɗaa min aan Joomiraaɗo.
Ndeen pukkinon ɗum yeeso Joomiraaɗo de kofoɗon yeeso muuɗum.
11 Caggal ɗuum, ceyoɗon, onon e Lewinkooɓe wonduɓe e mooɗon e jananɓe jooɗiiɓe hakkunde mooɗon saabe barke mo Laamɗo Joomiraaɗo mooɗon waɗani on, onon e koreeji mooɗon.
Haala jakka
12 Ley hitaande tataɓerde ɗum woni hitaande jakka ndeen, wakkati timminɗon tayri gese mooɗon fu, kokkon jakka tayri ndiin fuu Lewinkooɓe e jananɓe e atiime'en e rewɓe ɓe goriraaɓe muɓɓen maayi. Ɓe nyaama faa ɓe kaara ley galluuje mooɗon ɗeen. 13 Ndeen mbi'on yeeso Laamɗo Joomiraaɗo mooɗon:
— Min ittii jakka ceniiɗo ley cuuɗi amin de min kokki Lewinkooɓe e jananɓe e atiime'en e rewɓe ɓe goriraaɓe muɓɓen maayi fodde no njamirɗaa min noon. Min njeebaaki fay wootere e jamirooje maaɗa, min njeggitaay ɗe. 14 Min nyaamaay fay gootum e majjum wakkati min ngondunoo e mettorgal saabe maayreede, min ittaay faa'e nde min laatinoo tuunɓe wooɗi du, min cakkanaay faa'e saabe maayɗo. Min kettindanake Laamɗo Joomiraaɗo amin, min ngaɗii no njamirɗaa min noon pay. 15 Yaa Joomiraaɗo! Miɗen ŋaare, tiimaa min gilla nokkuure maaɗa seniinde dow kammuuli toon de mbarkinaa Israa'iila, lenyol maaɗa e leydi ndi kokkuɗaa min fodde no kunoraninoɗaa maamiraaɓe amin noon. Ɗum woni leydi ndi kosam e njuumndi ilata e muuɗum ndiin.
No Israa'iilankooɓe laatorii yimɓe Joomiraaɗo
16 Hannden Laamɗo Joomiraaɗo mooɗon na yamira ngaɗon ko sariyaaji muuɗum e kiite muuɗum mbi'i ɗuum. Tinnoɗon e ɗowtanaade ɗe de ngaɗon ko ɗe mbi'i fuu e ɓerɗe mon fuu e yonkiiji mon fuu.
17 Hannden on ngaɗii amaana faa Joomiraaɗo laatoo Laamɗo mooɗon. On ndewan laabi muuɗum de ngaɗon ko yamiri, ɗowtanoɗon sariyaaji e jamirooje e kiite muuɗum, kettindanoɗon ɗum.
18 Hannden Joomiraaɗo waɗii on laatake jeyal muuɗum korsungal fodde no wiirunoo on noon, oɗon ɗowtanoo jamirooje muuɗum fuu. 19 Noon o waɗi faa o ɓurna on teddeengal e innde anndaaku e maneede hakkunde lenyi adunaaru ɗi o tagi fuu de laatoɗon lenyol ceniingol saabe Laamɗo Joomiraaɗo mooɗon fodde no wiirunoo on noon.