<<    <     Fillitagol     27     >    >> 
Haala kuddi e barke
Haala kaaƴe darneteeɗe dow waamnde Ebal
27
1 Muusaa e mawɓe Israa'iila kokki jamaare Israa'iila yamiroore ndee mbi'i ɗum'en:
— Ɗowtanoɗon yamiroore nde kokkammi on hannden ndeen. 2 Nyannde peƴƴuɗon Urdun faa naaton nder leydi ndi Laamɗo Joomiraaɗo mooɗon hokkata on ndiin fu, ndarnon kaaƴe mawɗe de mbujon ɗe ko rawni. 3 Mbinndon jamirooje ɗeen fuu dow kaaƴe ɗeen. Ngaɗon noon wakkati naatoyɗon leydi ndi Laamɗo Joomiraaɗo maamiraaɓe mooɗon hokkata on, ndi kosam e njuumndi ilata e muuɗum ndiin, fodde no wiirunoo noon.
4 Nde peƴƴoyɗon Urdun fu ndarnon kaaƴe ɗeen dow waamnde Ebal fodde yamiroore nde kokkammi on hannden ndeen de mbujon ɗe ko rawni. 5 Ɗoon nyiɓanton Laamɗo Joomiraaɗo mooɗon sakkirde kaaƴe. Taa cehiron kaaƴe ɗeen njamndi. 6 Nyiɓiron sakkirde ndeen kaaƴe ɗe cehaaka. Wo dow mayre cakkanton Laamɗo Joomiraaɗo mooɗon sadakaaji buleteeɗi. 7 Cakkon du, sadakaaji dewral. Nyaamon de ceyoɗon yeeso Laamɗo Joomiraaɗo mooɗon. 8 Mbinndon jamirooje ɗeen fuu dow kaaƴe ɗeen faa laaɓa.
9 Muusaa e almaami'en Lewinkooɓe kaaldi e jamaare Israa'iila mbi'i:
— Israa'iila, hettinda faa nanaa. Hannden a laatake lenyol Laamɗo Joomiraaɗo maaɗa. 10 Kettindanoɗon Laamɗo Joomiraaɗo mooɗon oon, ngaɗon ko yamiri ɗuum fuu fodde no ekintinammi on hannden noon.
11 Nyannde ndeen Muusaa hokki jamaare Israa'iila yamiroore ndee, wi'i:
— 12 Inan darotooɓe dow waamnde Garijim faa mbarkina yimɓe Israa'iila wakkati peƴƴoyɗon Urdun ndeen: yimɓe Simeyon e Lewi e Yahuuda e Isakar e Yuusufi e Benyamin. 13 Wakkati oon yimɓe Ruben e Gad e Aser e Jabulon e Dan e Naftali ndaroo dow waamnde Ebal faa kuɗa.
Haala kuddiiji sappo e ɗiɗi
14 Inan no Lewinkooɓe peekortoo mbi'a Israa'iilankooɓe fuu:
— 15 Kuddi woodana neɗɗo fuu cehuɗo leggal naa tafuɗo njamndi waɗi tooru, ko harmi yeeso Joomiraaɗo, ko juuɗe tagaaɗo cehi de resi ɗum ley nokkuure suuɗiinde.
Ndeen yimɓe fuu njaaboo mbi'a: «Aamiina.»
— 16 Kuddi woodana kuyfinɗo bammum e innam.
Ndeen yimɓe fuu njaaboo mbi'a: «Aamiina.»
— 17 Kuddi woodana cottinɗo keerol ngesa koddo muuɗum.
Ndeen yimɓe fuu njaaboo mbi'a: «Aamiina.»
— 18 Kuddi woodana jiiloowo bumɗo faa lallina ɗum.
Ndeen yimɓe fuu njaaboo mbi'a: «Aamiina.»
— 19 Kuddi woodana oonyuɗo sariya faa ɗala janano naa atiime naa debbo mo gorum maayi goonga.
Ndeen yimɓe fuu njaaboo mbi'a: «Aamiina.»
— 20 Kuddi woodana pukkodiiɗo e dee bammum sabo semtinii bammum oon.
Ndeen yimɓe fuu njaaboo mbi'a: «Aamiina.»
— 21 Kuddi woodana pukkodiiɗo e daaba laatiinga fuu.
Ndeen yimɓe fuu njaaboo mbi'a: «Aamiina.»
— 22 Kuddi woodana pukkodiiɗo e inna gootoojo muuɗum naa baaba gootoojo muuɗum.
Ndeen yimɓe fuu njaaboo mbi'a: «Aamiina.»
— 23 Kuddi woodana pukkodiiɗo e esum debbo.
Ndeen yimɓe fuu njaaboo mbi'a: «Aamiina.»
— 24 Kuddi woodana barduɗo goɗɗo cuccukka.
Ndeen yimɓe fuu njaaboo mbi'a: «Aamiina.»
— 25 Kuddi woodana jaɓuɗo njoɓdi faa itta yonki mo waɗaay faa'e.
Ndeen yimɓe fuu njaaboo mbi'a: «Aamiina.»
— 26 Kuddi woodana mo ɗowtanaaki ko haalaaji Tawreeta ɗiin mbi'i, mo waɗaay ko yamiraa ɗuum.
Ndeen yimɓe fuu njaaboo mbi'a: «Aamiina.»