Aadi barkinde
28
1 Si on kettindanake Laamɗo Joomiraaɗo mooɗon, on ɗowtanake jamirooje muuɗum fuu fodde no kollirammi on hannden noon fu, teddinan on ɓurna lenyi adunaaru keddiiɗi fuu. 2 Ndelle inan barke mo keɓoton de keddodoɗon ɗum saabe on kettindanake Laamɗo Joomiraaɗo mooɗon oon:3 On mbarkinte ley galluuje e ley gese fuu.
4 Ɓeyngu mooɗon barkinte. Gese mon e daabaaji mon mawɗi e pamari fuu ngaɗan barke.
5 Kanndeeje mon e gattirɗe mon conndi fuu keewan barke.
6 On mbarkinte jehe mon e garte mon fuu.
7 Nde wayɓe mon ummanowii on fu, Joomiraaɗo hokkan on jaalorgal. Ɓe puntiran e mooɗon laawol gootol ammaa ɓe ndoggiran laabi jeɗɗi.
8 Joomiraaɗo, waɗan barke wonda e mooɗon ley beembe mon e ley golleeji mon fuu. O barkinan on ley leydi ndi o hokkata on ndiin.
9 Si on ɗowtanake jamirooje Joomiraaɗo ɗe kam e hoorem hokki on ɗeen, de ndewuɗon laabi muuɗum fu, waɗan laatoɗon yimɓe muuɗum seniiɓe fodde no hunoranii on noon. 10 Lenyi adunaaru fuu nji'an no innde Joomiraaɗo worri dow mooɗon de ɗi kula on. 11 Joomiraaɗo hebbinan on barke, o ɗuuɗinan ɓeyngu mooɗon. O barkinan daabaaji mon e gese mon fuu ley leydi ndi o hunaninoo maamiraaɓe mon o hokkan on ndiin. 12 Joomiraaɗo omtanan on kammu to jawdi muuɗum woni toon faa hokka on ƴuwoole wakkati muɓɓen. O barkinan golle mooɗon fuu. On kokkan leyɗe ɗuuɗɗe nyamaale ammaa onon kaa, on ɗaɓɓataa ɓe nyamaande. 13 O hennan on hoore, abada on keedataa gaɗa. O toownan on yeeso lenyi fuu, on leeƴataa si on kettindake de tinniɗon e ɗowtanaade jamirooje ɗe ekintinammi on hannden ɗeen. 14 Si on mbosoraaki nano naa nyaamo, on ndewaay allaaji goɗɗi faa ɗowtanoɗon ɗum'en, ammaa on tokkii jamirooje ɗe kokkammi on hannden ɗeen fuu, Joomiraaɗo barkinan on.
Haala kuddi
15 Ammaa si on kettindanaaki Laamɗo Joomiraaɗo mooɗon, si on tinnaaki e jogitaade jamirooje muuɗum e sariyaaji muuɗum fodde no ekintinirammi on hannden noon fu, inan kuddi kewtotoondi on, caamoori dow mooɗon:
16 On laatoto huɗaaɓe ley galluuje e ley gese fuu.
17 Kanndeeje mooɗon e gattirɗe mon conndi fuu kuɗetee.
18 Ɓeyngu mooɗon e leɗɗe leydi mooɗon e daabaaji mon mawɗi e pamari fuu kuɗetee.
19 On laatoto huɗaaɓe nde naatoton e nde mburtotoɗon fuu.
20 Joomiraaɗo neldan on kuddi, tayna nesi mon de fikita golle mooɗon fuu faa halkida on on fuu de lallon law. O waɗiran noon saabe golleeji mon bonɗi e ko tottitiɗon mo ɗuum. 21 Joomiraaɗo waɗan nyawu ndaaɓoowu mbonngu saama dow mon faa fiɗɗa on ley leydi ndi hokki on laatoo jeyal mon ndiin.
22 Joomiraaɗo waɗan jonte bulɗe e ɓuuye bonɗe e ɗoyru piya on. O neldan on yooro e puundi e nyawu gawri faa o halka on. 23 Kammu gonɗo dow ko'e mon oon yooran hono njamndi mboɗeeri ni. Leydi du, laatoto hono njamndi ɓaleeri ley koyɗe mooɗon. 24 Joomiraaɗo neldan on sollaare e ulgu loomta ƴuwoonde. Wo ɗuum o waɗata toɓa dow mooɗon faa on fuu kalkon.
25 Joomiraaɗo accan wayɓe mon njaaloo on. On puntiran e maɓɓe laawol gootol ammaa on ndoggiran laabi jeɗɗi. Nde laamuuji keddiiɗi nji'owi ɗuum fu haaynde e kulol manngol nanngan ɗum'en. 26 Maayɗo e mooɗon fuu laatoto nyaamdu pooli e kujje ladde, wooɗi fay gooto riiwataa ɗi.
27 Joomiraaɗo waɗan ɓuuye ɗe leydi Misira ɗeen nannga on, tawti ɓuuye ɓaleeje e nyaancuuji e puƴe, nyaawuuji ɗi on mbaawataa daɗude. 28 Joomiraaɗo waddan kaanɗi e bumndam e jiiɓaare hakkunde mooɗon. 29 On tartartan hakkunde naange hono no wumɓe ley jemma noon. Ko ngolloton fuu laatoto ɓolum. Wakkati fuu woɓɓe ngaran torra on, mbujja kujje mon ammaa fay gooto warataa walla on.
30 Nde gooto e sakiraaɓe mon haɓɓani surbaajo fu, gorko goɗɗo waran fukkodoo e muuɗum. On nyiɓan cuuɗi ammaa on njooɗataako ley majji. On aawan gese inabooje ammaa on keɓataa barke majje. 31 Na'i mooɗon kirsete e gite mon ammaa on kuttoto teewu majji. Araaji mon ndillidete e gite mon ammaa on kokkitataake ɗi. Baali mon laatoto jeyal wayɓe mon de fay gooto walaa baawɗo wallude on. 32 Ɓiɓɓe mon rewɓe e worɓe fuu lenyi goɗɗi ndawranan ɗum'en. Gite mon nji'an ɗum fuu, ɗe tampa e heɗaade garte maɓɓe ammaa walaa baawɗo wartirde ɓe. 33 Lenyol ngol on anndaa nyaaman barke gese mon e ko ngolloton fuu. On keddoto on torreteeɓe yaaliiɓe. 34 Ko gite mon nji'oyta ɗuum waɗan kaaŋeɗon.
35 Joomiraaɗo waɗan ɓuuye ɓaleeje nannga on dow koppi e dow buse de on mbaawataa daɗude. O waɗan nyawu nannga on gilla njaaɓirdi koyɗe faa hewta hakkunde hoore.
36 Joomiraaɗo waɗan onon e kaananke mo cuɓiɗon laatoo hooreejo mon oon fuu njaareɗon leydi njanandi ndi onon e maamiraaɓe mon fuu anndaano. Toon ɗowtanoytoɗon allaaji goɗɗi gaɗiraaɗi leɗɗe e kaaƴe. 37 Haaynde nanngan lenyi ɗi Joomiraaɗo yaarata on leyɗe muɓɓen fuu saabe ko hewtii on ɗuum. On laatanto ɓe jalnorgal e yawaara.
38 On aawan aawdi ɗuuɗundi ley gese mon ammaa seeɗa tan ittoton sabo baɓɓatti nyaaman ɗum. 39 On tiiroto gese inabooje, ndemanon ɗe ammaa on njarataa inaboojam majje, on ɓorataa ɓiɓɓe majje sabo gilƴi nyaaman ɗe. 40 On ngoodan leɗɗe jaytun ley leydi mon fuu, ammaa on mbujataako nebbam majje sabo ɓiɓɓe majje fuu caaman gilla ɓenndaay. 41 On ndiman ɓiɓɓe worɓe e rewɓe ammaa ɓe cenndete e mooɗon sabo ɓe njaarete maccangaaku. 42 Baɓɓatti njeytan leɗɗe mon e ɓiɓɓe gese mon fuu.
43 Jananɓe jooɗiiɓe hakkunde mooɗon laatoto tedduɓe ɓura on, ammaa onon kaa on keddoto oɗon leeƴa yeeso muɓɓen. 44 Kamɓe kokkata on nyamaale ammaa onon kaa on keɓataa ko kokkon ɓe. Kamɓe laatoto hooreeɓe mooɗon de keedon gaɗa maɓɓe.
45 Kuddi ndiin fuu saaman dow mooɗon, ndi riiwan on, ndi hewtoo on de ndi halka on saabe on kettindanaaki Laamɗo Joomiraaɗo mooɗon, on ɗowtanaaki jamirooje e sariyaaji ɗi hokki on ɗiin. 46 Ɗum laatanto on onon e ƴuwdi mon fuu maande gonginoore faa abada.
47 Ɗum hewtoto on sabo on ndewiraay Laamɗo Joomiraaɗo mooɗon oon e seyo e ɓernde welnde nde ngoodunoɗon huunde fuu faa na heewi ndeen. 48 On ngollanan wayɓe mon ɓe Joomiraaɗo yaarata on leydi muɓɓen ɓeen tawa oɗon ngondi e rafo e ɗomka e talkaaku e rafi kolte. Ɓe kaɓɓan njamndi e daaɗe mon faa ɓe kalkida on on fuu. 49 Joomiraaɗo neldan on lenyol ngol on nanataa haala muuɗum ƴuura faa keerol leydi waɗa on hono no dutal hipportoo nyaama ko wari ɗuum noon. 50 Lenyol nyanngungol ngool walanaa nayeeɓe yaage, yurmataako sukaaɓe. 51 Kanngol nyaamata barke mardi mooɗon e mo gese mon fuu faa on fuu kalkon. Ngol yoppidataa on alkama naa inaboojam naa nebbam naa ɓii nagge naa ɓii mbaalu naa ɓii mbeewa faa ɗo ngol fiɗɗi on.
52 Ɓe piiloto galluuje mon fuu faa kokuuji cembiɗinɗi deenirɗi on ɗi kooliɗon ɗiin fuu caama. Ɓe piiloto galluuje gonɗe ley leydi ndi Laamɗo Joomiraaɗo mooɗon hokki on ndiin fuu. 53 Wakkati oon e ley ɓillaare nde wayɓe mon ɓeen ɓillata on ndeen, on nyaaman teewu ɓiɓɓe mooɗon. On nyaaman ɓiɓɓe mon worɓe e rewɓe ɓe Laamɗo Joomiraaɗo mooɗon hokki on ɓeen. 54 Gorko ɓurnooɗo yaage e heesindaare ndaardan sakiike muuɗum nganyaandi. Noon du o ndaardata deekiiko e ɓiɓɓe wurtiiɓe e makko fuu. 55 O laatoto noon taa o yeɗa ɓeen teewu ɓiɓɓe makko ɓe o nyaamata sabo faa'e heddanaaki o katin e ley ɓillaare nde wayɓe mooɗon ɓillata on dammbuɗe galluuje mon fuu ndeen.
56 Debbo ɓurɗo yaage e heesindaare faa na hakkilana ɗo koyngal muuɗum yaaɓata, ndaardan gorum e ɓiyum debbo e gorko nganyaandi. 57 E ley cuccukka, o nyaaman fay ɓinngel ngel o rimi wakkatim e jaado muuɗum fuu sabo faa'e heddanaaki o katin e ley torra ka wayɓe mooɗon njarnata on dammbuɗe galluuje mon kaan.
58 Si on tinnaaki e waɗude ko Tawreeta wi'i, ko winndaa ley dewtere ndee, si on kulataa innde teddunde mawnde hulɓiniinde ndeen, ɗum woni innde Laamɗo Joomiraaɗo mooɗon ndeen fu, 59 Joomiraaɗo fiiran on nyawuuji bonɗi cattuɗi ɗi on mbaawataa daɗude, onon e ƴuwdi mon fuu. 60 O neldan nyawuuji leydi Misira daaɓooji ɗi kulannoɗon ɗiin de ɗi nyakkoo on. 61 O neldan du iri nyawuuji keewɗi ɗi inɗe muɓɓen mbinndaaka ley dewtere Tawreeta ndee faa nde on fuu kalkuɗon. 62 Gaɗa ko laatinoɗon yimɓe ɗuuɗɓe faa nannduɗon e koode kammu ɗuum, seeɗa tan keddotoɗon sabo on kettindanaaki Laamɗo Joomiraaɗo mooɗon. 63 Hono no Joomiraaɗo yardorinoo waɗande on moƴƴere de ɗuuɗini on noon, wo hono noon pay o yardortoo halkirde on faa o fiɗɗa on e leydi. Noon ittirteɗon e leydi ndi o hokkunoo on faa laatoo jeyal mon ndiin.
64 Joomiraaɗo sankitan on hakkunde lenyi keddiiɗi fuu gilla keerol leydi nano faa ngol nyaamo. Toon ɗowtanoytoɗon allaaji goɗɗi ɗi onon e maamiraaɓe mon fuu anndaano, ɗum woni allaaji gaɗiraaɗi leɗɗe e kaaƴe. 65 Ley leyɗe ɗeen, on keɓataa joonnde e jam wooɗi koyɗe mon keɓataa ɗo powta. Joomiraaɗo waɗan ɓerɗe mon ndiwna, gite mon lugga, yonkiiji mon lokkiɗa. 66 On mboyan yonkiiji mooɗon. On ngondan e kulol jemma e nyalooma. On mbuurdan hono maayooɓe joonin. 67 Subaka fuu on mbi'an: «A, si wo jemmano fu na ɓurti!» Nde futuro hewti du, mbi'on: «A, si wo subakano fu na ɓurti!» saabe ko nji'oton e kulol manngol gonngol ley ɓerɗe mon ngool. 68 Joomiraaɗo yecciniran on leydi Misira ley laanaaji ndiyam. Ndelle on tokkan laawol leydi ndi mbi'unoomi on nji'ataa katin ndiin. Toon connirteɗon wayɓe mon hono on maccuɓe e horɓe ammaa fay gooto haajataake soodude on.
Konngol Muusaa cakitiingol
69 Ɗii ngoni haalaaji amaana ɗi Joomiraaɗo yamiri Muusaa yottina jamaare Israa'iila ley leydi Mo'ab tawti amaana mo o waddunoo e maɓɓe dow waamnde Sinayi oon.