Ko Joomiraaɗo waɗani Israa'iila
29
1 Muusaa noddi jamaare Israa'iila fuu wi'i:— On nji'i huunde fuu ko Joomiraaɗo waɗi e gite mon ley leydi Misira. On nji'i ko o waɗi Fira'awna e yimɓe laamordu muuɗum e leydi ndiin fuu.
2 On njiiri gite mon torraaji mawɗi e maandeeji e kaayeefiiji mawɗi ɗi o waɗi ɗiin. 3 Ammaa faa warde hannden Joomiraaɗo hokkaay on hakkillo faa paamon, o hokkaay on gite faa nji'on e noppi faa nanon. 4 Mi ardorake on duuɓi 40 ley ladde yoornde, ammaa kaddule mon ceekaaki, paɗe mon kantaaki. 5 On nyaamaay buuru, on njaraay inaboojam naa njaram feere lamminaaɗam faa paamon wo kanko woni Laamɗo Joomiraaɗo mooɗon. 6 Wakkati njottinoɗon nokkuure ndee, Sihon kaananke Hesbon e Oga kaananke Basan mburtake faa kaɓda e meeɗen ammaa en njaalake ɓe. 7 Teetuɗen leyɗe maɓɓe kokkuɗen lenyol Ruben e ngol Gad e feccere lenyol Manasa faa laatoo ndongu muɓɓen. 8 Ndelle tinnoɗon kaybanon haalaaji amaana o de ngaɗon ko yamiraa faa keɓon barke ley ko ngaɗoyton fuu.
No amaana jey tiigoreede
9 Muusaa wi'i ɓe katin:
— Inani on onon e ardiiɓe e mawɓe lenyi mon e nayeeɓe e worɓe Israa'iila fuu oɗon ndarii yeeso Laamɗo Joomiraaɗo mooɗon, 10 tawti sukaaɓe mon e rewɓe mon e jananɓe wonduɓe e mon teenooɓe e ƴoogooɓe ɓeen fuu. 11 Inani on ɗoo, faa naaton ley amaana mo Laamɗo Joomiraaɗo mooɗon haɓɓidata e mooɗon hannden ley hunayeere. 12 O waɗan ɗum faa laatoɗon yimɓe makko de kanko e hoore makko o laatoo Laamɗo mooɗon fodde no o wiirunoo on, no o hunoraninoo maamiraaɓe mon Ibrahiima e Isiyaaka e Yaakuuba noon. 13 Wanaa e mooɗon tan Laamɗo Joomiraaɗo mooɗon haɓɓidata amaana oon, 14 ammaa imo woodani neɗɗo fuu tawaaɗo ɗo hannden yeeso makko e ɓe tawaaka hakkunde meeɗen joonin oo fuu.
15 Onon e ko'e mon oɗon anndi no njooɗorinoɗen leydi Misira e no peccitirɗen leyɗe ɗe paltiɗen ɗeen fuu. 16 On nji'i boneeji maɓɓe e tooruuji maɓɓe ɗi ɓe ngaɗiri leɗɗe e kaaƴe e kaŋŋe e cardi. 17 Ndelle saabe ɗuum, kakkilon taa ɓernde fay gooto hakkunde mooɗon, wanaa gorko, wanaa debbo, wanaa suudu, wanaa lenyol, tottitoo Laamɗo Joomiraaɗo meeɗen de yaha ɗowtanowoo allaaji lenyi ɗiin. Taa ɗaɗol lekki ndimoohi ko warata naa tooke barooje tawee hakkunde mooɗon. 18 Taa fay gooto hakkunde mooɗon, caggal ko nanuɗon yamiroore ndee miila barkinaama de na mantoo na wi'a: «Mi heɓan jam fay si ndewumi sattere ɓernde am.» Si iri ɗuum waɗowii hakkunde mon fu, lobbuɓe e bonɓe fuu kalkete. 19 Joomiraaɗo muuyataa yaafaade joomum de tikkere muuɗum e kiram muuɗum laatanoo o hono yiite ni. Kuddi ndi haala muuɗum haalaa ley dewtere ndee fuu saaman dow joomum. Joomiraaɗo mooytan innde makko ley duuniyaaru, 20 sennda o e lenyi Israa'iila saabe bone kewtotooɗo o fodde kuddiiji binndaaɗi ley dewtere Tawreeta ndee.
21 Ley jamaanuuji garooji, taaniraaɓe mooɗon e jananɓe ƴuurooɓe leyɗe boɗɗuɗe nji'owan masiibaaji kewtiiɗi leydi ndi e nyawuuji ɗi Joomiraaɗo fiiri ndi fuu. 22 Leydi ndiin fuu laatake sitti e lamɗam e yiite. Faa'e waawaa aaweede, faa'e fuɗataa, lekki fay ngooti walaa. Na ndi nanndi e leyɗe Sodoma e Gomoora e Aduma e Seboyim ɗe Joomiraaɗo halki wakkati tikkere muuɗum mawnde ndeen. 23 Lenyi adunaaru fuu mbi'an: «Ko saabii de Joomiraaɗo waɗi leydi ndii hono ni? Ɗume waddi tikkere mawnde fonnde ni?» 24 Ndeen ɓe njaabete ɓe mbi'ee: «Wo saabe ɓe paɗɗii amaana mo Laamɗo Joomiraaɗo haɓɓidinnoo e maamiraaɓe maɓɓe nde wurtinoo ɗum'en leydi Misira. 25 Ɓe njehii ɓe ɗowtanowake allaaji goɗɗi, ɓe ndikkinake yeeso muɓɓen, allaaji ɗi ɓe anndaano wooɗi du, ɗi ɓe kokkaaka laatoo jeyal maɓɓe. 26 Wo ɗuum saabii de Joomiraaɗo tikkani leydi ndiin faa jippini kuddi mbinndaandi ley Dewtere Tawreeta ndiin fuu dow maɓɓe. 27 Joomiraaɗo ɗoofii ɓe e leydi maɓɓe ley tikkere mawnde e nyanngere nyaaɗunde de faɗɗi ɓe ley leydi ngonndi. Wo ɗuum saabii de na worri noon hannden.»
28 Kujje cuuɗiiɗe wo Laamɗo Joomiraaɗo meeɗen jeyi. Kujje ɓanginaaɗe du, wo enen e ɓiɓɓe meeɗen njeyi faa abada, faa ngaɗen ko haalaaji Tawreeta oo mbi'i fuu.