No Israa'iila yeccortoo to Joomiraaɗo
30
1 Wakkati kuddi naa barke ko kollumi on ɗuum fuu hewtowii on ley leyɗe to Laamɗo Joomiraaɗo mooɗon yaari on toon ndeen, on miccitoto ɗum ley ɓerɗe mooɗon. 2 Si on njeccake to Laamɗo Joomiraaɗo mooɗon, on kettindanake ɗum e ɓerɗe mon fuu e yonkiiji mon fuu, onon e ɓiɓɓe mooɗon fodde no ekintinirammi on hannden noon fu, 3 Laamɗo Joomiraaɗo mooɗon oon yeccinanan on ko mursunoɗon, o yurmoto on, o hawrondinan on to o sankitinnoo on toon fuu. 4 Fay si tawi faa keerol leydi njaaraɗon, Laamɗo Joomiraaɗo mooɗon hawrondinowan on toon de wartira on. 5 O wartiran on ley leydi ndi o hokkunoo maamiraaɓe mon laatoo jeyal muɓɓen de njeyton ndi. O barkinan on de o ɓurna on maamiraaɓe mon ɗuuɗude. 6 Laamɗo Joomiraaɗo mooɗon heyɗintinan ɓerɗe mon, onon e ƴuwdi mooɗon faa njiɗiron ɗum e ɓerɗe mon fuu, e yonkiiji mon fuu, de mbuuron e jam. 7 Laamɗo Joomiraaɗo mooɗon waɗan kuddi ndiin fuu saama dow wayɓe mon, tampinooɓe on ɓeen.8 Onon du, on njeccoto kettindanoɗon Joomiraaɗo faa ngaɗon huunde fuu ko yamiri fodde no ekintinirammi on hannden noon. 9 Laamɗo Joomiraaɗo mooɗon barkinan golleeji mooɗon fuu. O barkinan ɓeyngu mooɗon e daabaaji mooɗon. O barkinan gese mooɗon sabo o yeccoto o seyoroo waɗande on moƴƴere hono no o seyorinoo waɗande maamiraaɓe mon noon. 10 Noon laatortoo si on njeccake to Laamɗo Joomiraaɗo mooɗon, e ɓerɗe mon fuu e yonkiiji mon fuu, si on kettindanake ɗum, on ɗowtanake jamirooje muuɗum e sariyaaji muuɗum binndaaɗi ley dewtere Tawreeta ndee.
No konngol Laamɗo ɓadorii
11 Yamiroore nde kokkammi on hannden ndeen tiiɗaa faa ɓuri semmbe mooɗon. Wanaa ko woɗɗi faa on mbaawaa hewtude ɗum. 12 Yamiroore ndeen walaa faa dow kammu sakko mbi'on: «Moy waawi ƴeenyude faa dow kammu faa keɓen nanen nde de ngaɗen ko nde wi'i?» 13 Nde walaa faro too maayo sakko mbi'on: «Moy waawi feƴƴude maayo manngo ngo faa walla en keɓen nanen nde de ngaɗen ko nde wi'i?» 14 Ammaa haala kaan na tawaa faa ɗakkol mooɗon, ley kunnduɗe mon e ley ɓerɗe mon faa ngaɗon ko nde wi'i.
Suɓaade nguurndam
15 Inan mi waddii yeeso mooɗon hannden nguurndam e jam tawti maayde e bone. 16 Ko njamirammi on woni njiɗon Laamɗo Joomiraaɗo mooɗon, ndewon laabi muuɗum, ngaɗon ko jamirooje e sariyaaji e kiite muuɗum mbi'i. Si on ngaɗii noon fu, on mbuuran de ɗuuɗon, wooɗi du, o barkina on ley leydi ndi naatoton faa njeyton ndiin. 17 Ammaa si on accii ɓerɗe mooɗon tottitake o, si on kettindaaki ko o wi'i, on accii allaaji goɗɗi muuynake on faa ɗowtaniɗon ɗum'en fu, 18 goonga kaalanammi on hannden, on timman faa laaɓon. Balɗe mon njuutataa ley leydi ndi njeytoyton nde peƴƴoyɗon Urdun.
19 Kammu e leydi ceedanoo kam hannden mi waddii nguurndam e maayde, tawti barke e kuddi yeeso mooɗon. Ndelle cuɓee nguurndam faa mbuuron onon e ƴuwdi mon fuu. 20 Njiɗon Laamɗo Joomiraaɗo mooɗon, kettindoɗon jamirooje muuɗum, kaɓɓondiron e muuɗum sabo wo kanko woni nguurndam e njuundam balɗe mon faa keɓon mbuuron ley leydi ndi o huninoo o hokka maamiraaɓe mooɗon Ibrahiima e Isiyaaka e Yaakuuba.