Haala maayde Muusaa
31
1 Muusaa haaldi e jamaare Israa'iila katin wi'i:— 2 Hannden duuɓi am wo 120. Mi waawataa ardaade on katin, wooɗi du, Joomiraaɗo wi'ii kam mi heɓataa feƴƴude Urdun. 3 Laamɗo Joomiraaɗo mooɗon ardoto on kam e hoorem. Wo kam halkata lenyi ɗiin fuu yeeso mooɗon de njeyton leyɗe muɓɓen. Wo Yoosuwa ardotoo on fodde no Joomiraaɗo wi'iri noon. 4 Joomiraaɗo fiɗɗan leyɗe ɗeen hono no waɗi Sihon e Oga kaanankooɓe Amorinkooɓe e leyɗe muɓɓen fuu. 5 Joomiraaɗo wattan ɓe e juuɗe mooɗon de ngaɗon ɓe ko njamirmi on ɗuum fuu. 6 Laatee yimɓe semmbiɗinɓe suusuɓe. Taa kulee, taa accee ɓe kulɓina on. Laamɗo Joomiraaɗo mooɗon kam e hoorem na wondi e mooɗon. Abada o yoppataa on, o tottitataako on.
7 Muusaa noddi Yoosuwa yeeso jamaare Israa'iila fuu de wi'i ɗum:
— Laatoɗaa jom cuusal, cemmbinɗinaa ɓernde ma, sabo wo aan nannata yimɓe ɓee ley leydi ndi Joomiraaɗo hunaninoo maamiraaɓe muɓɓen hokkan ɗum'en ndiin. Wo aan hokkata ɓe ndi faa ndi laatoo ndongu maɓɓe. 8 Joomiraaɗo e hoorem na ardii ma. Kam e hoorem wondan e maaɗa. O yoppataa ma o tottitataako ma. Ndelle taa hulu, taa ɓernde maaɗa diwna.
No Muusaa halfiniri almaami'en Tawreeta Joomiraaɗo
9 Ndeen Muusaa winndi dewtere Tawreeta ndeen hokki nde almaami'en, ɓiɓɓe Lewi, wakkotooɓe keesuwal Amaana Joomiraaɗo e mawɓe Israa'iila fuu. 10 O hokki ɓe yamiroore ndee, o wi'i:
— Gaɗa duuɓi jeɗɗi, hitaande yaafagol nyamaale, wakkati iidi Tenndeeje, 11 nde jamaare Israa'iila fuu warata daroo yeeso Laamɗo Joomiraaɗo muuɗum ley nokkuure nde suɓoytoo ndeen, njanngon dewtere Tawreeta ndeen yeeso maɓɓe. 12 Kawrondinaa jamaare ndeen fuu, worɓe e rewɓe e sukaaɓe e jananɓe jooɗiiɓe ley galluuje mooɗon faa ɓe nana, ɓe paama de ɓe ekitoo hulude Laamɗo Joomiraaɗo mooɗon oon. Ndeen ɓe tinnoo e ɗowtanaade haalaaji Tawreeta ɗiin fuu. 13 Noon waɗata de ɓiɓɓe maɓɓe ɓe anndaano ɗi fuu nana de ekitoo hulude Laamɗo Joomiraaɗo mooɗon haddi duuɓi ɗi njooɗoytoɗon ley leydi ndi ponndiɗon faa laatoo jeyal mooɗon ndiin fuu.
No Israa'iila oonyorii
14 Joomiraaɗo haaldi e Muusaa wi'i:
— Wakkati dillol maaɗa adunaaru na ɓattoo. Ndelle noddu Yoosuwa de ndarodoɗon ley hukum Ceniiɗo. Mi hokkan o jamirooje am.
Muusaa e Yoosuwa njehi ndarowii ley hukum toon. 15 Joomiraaɗo ɓangi ley hukum toon nder ruulde nanndunde e bimmbeere, darii dammbugal.
16 O haaldi e Muusaa o wi'i:
— A ɓadake hawritoyde e maamiraaɓe maaɗa. Caggal ɗuum lenyol ngol, haɓɓondiran e allaaji janani, ɗum woni allaaji leydi ndi ɓe naatata ndiin. Ɓe njoppan kam, ɓe mbonnan amaana am mo kaɓɓidimmi e maɓɓe oon. 17 Nyannde ndeen mi tikkanan ɓe sanne. Mi yoppan ɓe, mi tottitoto ɓe. Ndeen ɓe ceekete, masiibaaji e boneeji feere feere kewtoto ɓe faa ɓe mbi'a: «Wanaa saabe Laamɗo meeɗen waldaa e men de torraaji ɗi fuu na kewtoo en naa?» 18 Ammaa miin, mi tottitoto ɓe nyannde ndeen saabe boneeji ɗi ɓe ngaɗi e ɗowtanaade allaaji goɗɗi ɗuum.
19 Joonin kaa, mbinndaa jimol ngol. Ekintinaa ngol Israa'iilankooɓe, ngatton ngol e kunnduɗe maɓɓe, ɓe ndursitoo ngol, ngol laatoo seedee hakkunde am e maɓɓe. 20 Sabo mi nannan lenyol ngool leydi ndi kunaninoomi maamiraaɓe maɓɓe mi hokkan ɗum'en ndiin. Ɗum woni leydi ndi kosam e njuumndi ilata e muuɗum ndiin. Toon, ɓe nyaamoyta faa ɓe kaara, ɓe paya de ɓe tottitoo kam ɓe ndewa allaaji goɗɗi. Ɓe ɗowtanoo ɗum'en, ɓe kuyfina kam de ɓe mbonna amaana am oon. 21 Nde masiibaaji e torraaji feere feere ɗiin kewtowii ɓe fu, jimol ngool jaaboto ɓe hono seedee sabo ƴuwdi maɓɓe yeggitataa ngol. Miɗo anndi ko ɓe anniyii waɗude gilla hannden fay ko ɓe naatowaay ley leydi ndi kuniimi mi hokkan ɓe ndiin.
22 Nyannde ndeen Muusaa winndi jimol ngool de ekiti ngol Israa'iilankooɓe.
23 Ndeen Joomiraaɗo hokki Yoosuwa ɓii Nuun jamirooje ɗee, wi'i ɗum:
— Semmbinɗin ɓernde maaɗa, laatoɗaa cuusuɗo sabo wo aan nannata Israa'iilankooɓe leydi ndi kuniimi mi hokkan ɗum'en ndiin. Miin e hoore am mi wondan e maaɗa.
24 Nde Muusaa timminnoo winndude haalaaji Tawreeta ɗiin ley dewtere fuu, 25 yamiri Lewinkooɓe wakkotooɓe keesuwal Amaana Joomiraaɗo, wi'i ɗum'en:
— 26 Njaɓee dewtere jamirooje ndee, ngatton ɗakkol keesuwal Amaana Laamɗo Joomiraaɗo mooɗon. Nde heddoo ɗoon, nde laatoo seedee golleeji mon bonɗi, 27 sabo miɗo anndi no laatoriɗon muurtooɓe yoorɓe ko'e. Si ley nguurndam am, wakkati ngondumi e mooɗon ndeen, on muurtanii Joomiraaɗo, noy muurtiranoyton o gaɗa dillol am adunaaru! 28 Noddee mawɓe lenyi mon e ardiiɓe fuu ngara yeeso am faa mi haala haala kaan yeeso maɓɓe de kammu e leydi ceedoo. 29 Miɗo laamni gaɗa maayde am on laatoto laaliiɓe, on celan laawol ngol kollumi on de kawron e bone ley duuɓi garooji sabo on ngaɗowan ko boni yeeso Joomiraaɗo faa mettinon ɓernde muuɗum.
Jimol Muusaa
30 Muusaa watti jimol ngool fuu ley noppi jamaare Israa'iila ndeen gilla fuɗɗoode faa timmoode.