32
1 Kammu, hettina faa mi haala,leydi, nanu ko mbi'ammi.
2 Anndal am saakoroo no ƴoonde,
haala am du hono saawoore.
Ka laatoo hono toɓo dow huɗo,
hono baade ndiyam dow huɗo hecco.
3 Mi toownan innde Joomiraaɗo.
Teddinee Laamɗo meeɗen!
4 Kanko woni tefaare,
golle makko wo kiɓɓuɗe,
laabi makko fuu wo laaɓuɗi.
Wo o Laamɗo koolniiɗo,
ko oonyii walaa e makko,
wo o dartiiɗo, laaɓuɗo.
5 Onon le, on tottitake mo,
saabe hakkeeji mooɗon,
on nganaa ɓiɓɓe makko katin,
on jamaanu oonyiiɗo, laaliiɗo.
6 Onon lenyol kaaŋaangol, jiiɓiingol ngol,
wo nii ngaɗanton Joomiraaɗo naa?
Yalla wanaa kanko woni baabii on, dimuɗo on naa?
Yalla wanaa kanko tagi on de semmbinɗini on naa?
7 Miccitee ko waɗunoo arannde,
miiloɗon duuɓi bittiiɗi, jamaanuuji paltiiɗi.
Ƴamee baabiraaɓe mon, ɓe kollan on.
Ƴamon nayeeɓe mon, ɓe pillanto on.
8 Nde Laamɗo Toowɗo senndannanno lenyi adunaaru
leyɗe laatotooɗe ndongu muɓɓen,
nde o senndunoo ɓiɓɓe Aadama.
O diidi keeri lenyi gomma fodde
limoore maleyka'en Laamɗo*.
9 Sabo ngeɗu Joomiraaɗo wo yimɓe muuɗum,
Yaakuuba woni ndongu muuɗum.
10 O tawii ɗum ley leydi njoorndi,
ley ladde ɓaleere yoornde nde duluuji.
Imo suurunoo ɗum, imo horsinnoo ɗum,
imo haybana ɗum hono gite makko.
11 Hono no ciilal weeyirta dow suudu muuɗum,
na ekita ɓikkoy mum fiirude,
hono no feertirta bippeelem, hooƴa ɓikkoy mum,
deka dow leeɓi muuɗum noon,
12 noon Joomiraaɗo durirannoo ɓe, kam tan,
alla janano fuu waldaano e maɓɓe.
13 Imo ƴeenyinannoo ɓe baamle,
iɓe nyaamannoo ɓiɓɓe gese maɓɓe.
Imo musinninannoo ɓe njuumndi tefaare,
e nebbam tuntere ndeen.
14 Imo yarnannoo ɓe kosam na'i ɗaaniiɗam,
e ɓiraaɗam baali e be'i,
Imo nyaamnannoo ɓe ɓelle jawɗi e damɗi Basan,
iɓe nyaamannoo alkama lobbo,
iɓe njarannoo inaboojam mboɗejam, njaram lamminaaɗam.
15 Ammaa nde Yesurun* haarunoo faa fayi fu, ummanii Joomiraaɗo.
On payii, on tekkii, on ngaɗii deedi.
Ndeen njoppuɗon Laamɗo taguɗo on oon,
kuyfinɗon Tefaare kisindam mooɗon ndeen.
16 On umminirii kiram Joomiraaɗo e rewude allaaji janani,
mettinirɗon ɓernde muuɗum e waɗude tooruuji nyiddiniiɗi.
17 On cakkanii ginnaaji ɗi nganaa Laamɗo,
kofaniɗon allaaji ɗi on anndaano,
allaaji kesi ɗi njiiɗon ko ɓooyaay,
ɗi maamiraaɓe mooɗon ɗowtantaakono.
18 On njeggitii Laamɗo kokkuɗo on yonkiiji oon,
paɗɗuɗon Tefaare rimunde on ndeen.
19 Joomiraaɗo yi'i ɗum de tottitii ɓe,
sabo ɓiɓɓem ɓeen mettinii ɓernde muuɗum.
20 O wi'i: Mi tottitoto ɓe,
mi ndaara ko hewtotoo ɓe,
wo ɓe jamaanu oonyiiɗo,
wo ɓe ɓiɓɓe ɓe koolnaaki.
21 Ɓe umminirii kiram am e rewude ko wanaa Laamɗo,
ɓe mettinirii ɓernde am e tooruuji ɓoli.
Miin du, mi umminiran kiram maɓɓe e ko wanaa lenyol,
mi mettiniran ɓerɗe maɓɓe e lenyol puuyngol.
22 Sabo yiite tikkere am huɓɓii,
inge ja'awa faa ley nokkuure maayɓe.
Inge nyaama leydi e ɓiɓɓe muuɗum,
inge nyaama baamle e joƴƴinirde muɓɓen fuu.
23 Mi ɗuuɗinan masiibaaji dow maɓɓe,
mi fiɗiran ɓe kure am fuu.
24 Mi waɗan rafo ɓuyta ɓe,
jonte bulɗe e nyawuuji daaɓooji nyaama ɓe.
Mi neldan ɓe kujje ladde nyannguɗe,
e tooke kujje daasotooɗe e leydi.
25 Sukaaɓe maɓɓe mbardete kaafaaje yaasin,
kulol manngol waran ɓe ley galleeji maɓɓe.
Maayde fiyan suka gorko e debbo fuu,
nde heddataa musinoowo e nayeejo fuu.
26 Mi miilakeno: «Mi sikkitan ɓe,
mi fiɗɗan ɓe faa fay gooto miccitataako ɓe katin.»
27 Ammaa mi yiɗaa wayɓe maɓɓe ɓeen njalnoroo kam,
kiila ko'e muɓɓen de mbi'a:
«Miɗen ngoodi semmbe!
Wanaa Joomiraaɗo waɗi ɗum fuu!»
28 Israa'iila wo lenyol jiiɓiingol,
ngol walaa hakkillo fey.
29 Si ɓe ngooduno hakkillooji fu, ɓe taykotono ɗum,
ɓe paamanno ko warata ɗuum.
30 Si Tefaare maɓɓe yoppaayno ɓe,
noy neɗɗo gooto tan waawiri riiwude yimɓe ujunere?
Si Joomiraaɗo wattaayno ɓe e juuɗe wayɓe maɓɓe,
noy yimɓe ɗiɗo mbaawiri riiwirde yimɓe ujunaaje sappo?
31 Tefaare wayɓe maɓɓe hawtaa e nde meeɗen,
kam'en e ko'e muɓɓen na anndi.
32 Inabooje muɓɓen na ƴuwnee Sodoma,
iɗe ɗoofee e gese Gomoora.
Inabooje ɗeen du, wo keewɗe tooke,
bukki majje wo kaaɗuɗi.
33 Inaboojam maɓɓe wo tooke mboddi,
wo tooke foosikere waroore.
34 Ɗum fuu, wanaa iɗum suuɗii ɗakkol am naa?
Wanaa iɗum resii ley cuuɗi am desirɗi naa?
35 Miin woni joɓtotooɗo, miin woni kiitotooɗo,
nyannde ɓe tuytuytinta dow laabi maɓɓe.
Nyalaande halkere maɓɓe ndeen ɓadake hewtaade ɓe,
kiite maɓɓe na doggana ɓe.
36 Joomiraaɗo saranan yimɓe muuɗum,
yurmoto gollanooɓe ɗum,
nde taykowii semmbe muɓɓen re'ii,
wakkati maccuɗo walaa, dimo walaa.
37 O wi'an:
Toy allaaji maɓɓe ɗiin ngoni?
Toy tefaaje moolorɗe maɓɓe ɗeen ngoni?
38 Toy nyaamannooɓe ɓelle kirsamaaji maɓɓe ɓeen ngoni?
Yarannooɓe inaboojam sadakaaji maɓɓe ɓeen toy ngoni?
Ndelle ɓe ummoo ɓe kisina on,
ɓe laatanoo on ko reenata on!
39 Joonin kaa, paamon wo miin,
ayyo, wo miin tan, alla goɗɗo waldaa e am.
Wo miin warata, wooɗi wo miin wuurnata,
wo miin mornyitata, wooɗi wo miin dannata.
Fay gooto waawaa dannude goɗɗo e junngo am.
40 Mi ɓantan junngo am faro kammu de mi hunoo, mi wi'a:
Mi hunorake innde am nde timmataa faa abada ndeen.
41 Mi welnan kaafaahi am faa ɗelka,
junngo am saroroo ki.
Mi hiitoo wayɓe kam,
mi yoɓtoo habdiiɓe am.
42 Kure am culorto ƴiiƴam,
kaafaahi am nyaaman teewu maɓɓe.
Ki taƴan ko'e mawɓe ɓe ngaasaaji juutuɗi,
ƴiiƴam waraaɓe e nanngaaɓe fuu rufan.
43 Ndeen Muusaa wi'i:
Kammu seyodoo e Joomiraaɗo,
maleyka'en kofoo yeeso makko,
sabo o yoɓtanto ƴiiƴam gollanooɓe mo,
o hiitoto wayɓe mo,
o saroto golle muɓɓen bonɗe,
o laaɓinan leydi yimɓe makko*.
44 Muusaa e Yoosuwa ɓii Nuun ngari njimi jimol ngool fuu yeeso jamaare Israa'iila.
45 Nde Muusaa timminnoo haala kaan yeeso jamaare Israa'iila ndeen, wi'i ɓe:
— 46 Ngatton haalaaji ɗi cappanmi on hannden ɗiin fuu ley ɓerɗe mooɗon, ekintinon ɗi ɓiɓɓe mon, faa ngaɗa huunde fuu ko winndaa ley dewtere jamirooje nde. 47 Sabo ɗum wanaa haala ɓola. Wo ɗum nguurndam mooɗon. Wo kanngol waɗata de balɗe mon njuuta ley leydi ndi njeytoyton nde peƴƴoyɗon Urdun ndeen.
No maayde Muusaa sapporaa
48 Nyannde ndeen pay Joomiraaɗo haaldi e Muusaa wi'i ɗum:
— 49 Ƴeenyaa dow baamle Abarim ɗee, ndaroɗaa dow waamnde Nebo ley leydi Mo'ab yeeso Yeriko. Ndeen ndaaraa leydi Kanaana, ndi kokkammi Israa'iila laatoo ndongu muɓɓen ndiin. 50 Wo dow waamnde nde ƴeenyataa ndeen maayataa de kawritowaa e maamiraaɓe maaɗa hono no sakiike maaɗa Haaruuna maayiri dow waamnde Hor hawritowi e maamiraaɓe muuɗum noon. 51 Noon ɗum laatorto sabo on mbonni amaana am e gite Israa'iilankooɓe yeeso diyeele Meriba, leydi Kades ley ladde Sin yoornde. On kollaay Israa'iilankooɓe no senaare am foti. 52 Leydi ndi kokkammi Israa'iilankooɓe ndiin, a yi'iran ɗum e gite maaɗa ammaa a naatataa ndi.