No Muusaa barkiniri lenyi Israa'iila sappo e ɗiɗi ɗiin
33
1 Inan no Muusaa nelaaɗo Laamɗo oon barkiniri Israa'iilankooɓe de caggal ɗuum dilli adunaaru. 2 O wi'i:Joomiraaɗo ƴuurii Sinayi,
o ɓantake dow maɓɓe ley wuro Seyiir hono puɗal naange.
Darja makko yaynii gilla waamnde Paran.
O funtii hakkunde seniiɓe ujunaaje sowre,
o ƴuurii horɗoore, ley degitaali baamle.
3 Sikke walaa, Joomiraaɗo na horsini yimɓe muuɗum,
seniiɓe makko fuu na ngoni ley juuɗe makko.
Iɓe kofoo ɗakkol koyɗe makko,
iɓe kettindoo ko o jannginta ɓe.
4 Miin Muusaa, mi hokkii on Tawreeta,
wo ɗum ndongu ƴuwdi Yaakuuba.
5 Noon Joomiraaɗo laatorii kaananke Yesurun*
wakkati ardiiɓe lenyi kawritannoo e cuuɗi Israa'iila fuu.
Lenyol Ruben
6 Ruben wuura, taa o maaya,
ammaa lenyol makko ngool heddoo pamarol.
Lenyol Yahuuda
7 Inan no Muusaa barkiniri Yahuuda:
Joomiraaɗo, hettindana Yahuuda,
njeccinaa ɗum e yimɓe muuɗum.
Semminɗin juuɗe muɓɓen faa kaɓana ko'e muɓɓen,
kisinaa ɗum'en e wayɓe muɓɓen.
Lenyol Lewi
8 Inan no Muusaa barkiniri lenyol Lewi:
Joomiraaɗo, «Tumim» maaɗa hokkaama Lewi,
«Urim»* maaɗa halfinaama gorko kooliiɗo ma,
Mo ndaartininoɗaa wuro Massa oon,
mo pilaniɗaa feloore yeeso diyeele Meriba oon.
9 Ɓe kollii ma yidde faa ɓuri ko ɓe njiɗi inniiɓe e baabiiɓe.
Ko ɓe njiɗi ma na ɓuri ko ɓe njiɗi sakiraaɓe maɓɓe
e ɓiɓɓe maɓɓe fuu,
sabo ɓe ɗowtanake ko njamirɗaa,
ɓe teddinii amaana maaɗa.
10 Wo kamɓe njanngini Yaakuuba sariya maaɗa,
ɓe ekintini Israa'iila Tawreeta maaɗa.
Wo kamɓe mbulante urdi mbelndi,
ɓe njottinane sadakaaji buleteeɗi dow sakkirde maaɗa.
11 Joomiraaɗo, barkin golle juuɗe maɓɓe,
de golle maɓɓe laatoo ko fotani ma.
Kelaa baawɗe haɓdooɓe e maɓɓe,
taa wayɓe maɓɓe ummitoo faa abada.
Lenyol Benyamin
12 Inan no Muusaa barkiniri lenyol Benyamin:
Onon lenyol Benyamin, horsuɓe e gite Joomiraaɗo,
njooɗee e jam ley barke Laamɗo Toowɗo.
Joomiraaɗo reena on nyannde fuu,
O jooɗoo hakkunde mooɗon*.
Ƴuwdi Yuusufi: Lenyi Efrayim e Manasa
13 Inan no Muusaa barkiniri ƴuwdi Yuusufi:
Joomiraaɗo barkina leydi maɓɓe,
ɓe keɓan saawoore lobbere ƴuuroore e kammu,
e ndiyam iloojam e leydi.
14 On nyaaman ko ɓuri woodde ley ko naange ɓenndinta,
e ko leydi funnata lewru fuu,
15 tawti barke baamle kiiɗɗe,
e moƴƴere tile ɓooyɗe.
16 Joomiraaɗo waɗa barke leydi lobbiri ndiin,
e hinney Laamɗo ɓanguɗo e mooɗon ley wuumoore,
laatoo hono pilkol dow hoore Yuusufi,
laatiiɗo mawɗo sakiraaɓe muuɗum oon.
17 Teddeengal woodane, lenyol Yuusufi,
aan ngaari Israa'iila mawndi ndiin.
Yuusufi na nanndi e ngaari ladde,
ngoodundi luwe ɗiɗi cemmbiɗinɗe.
Wo luwe ɗeen o yuwirta lenyi goɗɗi
faa kewtowa keerol leydi.
Luwal gootal, wo yimɓe Efrayim ujunaaje ujunaaje,
keddiingal du, wo yimɓe Manasa ujunaaje heewɓe.
Lenyi Jabulon e Isakar
18 Inan no Muusaa barkiniri lenyol Jabulon:
Onon lenyol Jabulon, ceyoree jahaale mooɗon,
Onon yimɓe Isakar, mbeltee ley gure mooɗon.
19 Ɓe noddan lenyi dow waamnde maɓɓe seniinde
faa ngaɗa sadakaaji fodde no yamiraa.
Ɓe musinan barke maayo,
ɓe keɓan barke cuuɗiiɗo ley njaareendi.
Lenyol Gad
20 Inan no Muusaa barkiniri lenyol Gad:
Barke woodana jaajinɗo leydi Gad.
Gad na fukkoroo hono rawaandu ladde,
indu seeka koyɗe,
indu seeka le'al hoore du.
21 Gad suɓanake hoore muuɗum to ɓuri wooɗude e leydi ndiin,
ɓe ndesanii ko'e maɓɓe ko dawrooɓe kaandi ɗuum.
Ɓe kawritowii e mawɓe lenyi.
Ɓe ngaɗii muuyɗe Joomiraaɗo dartiiɗe,
jamirooje ɗe Israa'iila yamiraa waɗa ɗeen.
Lenyol Dan
22 Inan no Muusaa barkiniri lenyol Dan:
Dan na nanndi e laddeeru jokoldu,
fittooru na jikka gilla Basan.
Lenyol Naftali
23 Inan no Muusaa barkiniri lenyol Naftali:
Naftali, aan haari hinney Joomiraaɗo,
aan huuraa barke muuɗum.
Njeyton leydi ngorgaari e ndi horɗoore.
Lenyol Aser
24 Inan no Muusaa barkiniri lenyol Aser:
Laamɗo barkina Aser hakkunde ɓiɓɓe Yaakuuba,
Joomiraaɗo waɗa sakiraaɓe makko korsina mo,
nebbam leɗɗe maɓɓe jaytun heewa faa na wubba e leydi.
25 Ɓe cuuroo ley dammbuɗe gaɗiraaɗe jamɗe cemmbiɗinɗe,
semmbe maɓɓe ɓooyira no nguurndam maɓɓe noon.
26 Ndeen Muusaa yecci wi'i katin:
Yesurun, alla fay gooto waawaa nanndude e Laamɗo maaɗa,
Teddeengal makko na diwa duule,
na feccita kammu faa wara walle.
27 Laamɗo duumotooɗo oon, wo kam woni suuɗorde mooɗon,
juuɗe makko tiigoto on faa abada.
Wo kanko riiwata wayɓe mooɗon yeeso mon,
o wi'i piɗɗon ɓe.
28 Israa'iila na jooɗii e jam,
walaa torrooɓe Yaakuuba.
Imo wuuri ley leydi ndimoori alkama, keewndi inabooje,
saabe barke Joomiraaɗo ƴuuroowo kammu.
29 Aan Israa'iila, a heɓii barke.
Moy wa'i hono maaɗa ni?
Aan woni lenyol ngol Joomiraaɗo hisini.
Imo laatanii ma wawaade reenoore ma,
kanko woni kaafaahi kokkoohi ma jaalorgal.
Wayɓe mon turoyto yeeso mooɗon saabe kulol,
onon du njaaɓon kunkuuji maɓɓe.