Iidiiji Israa'iila
23
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe, mbi'aa ɗum'en: Iidiiji ɗi ngaɗanton Joomiraaɗo faa teddinon ɗum ɗiin laatoo wakkatiiji kawrite mooɗon ceniiɗe. Inan no ngaɗirton iidiiji ɗiin:
Nyalaande fowteteende
3 Ngollon golleeji mooɗon faa waɗa balɗe jeegom, ammaa nyalaande jeɗɗaɓerde ndeen wo Nyalaande fowteteende. Ngaɗon kawrital ceniingal. Taa ngollon gollal fay gootal sabo wo nde nyalaande Joomiraaɗo fowteteende. Nde laatanoo on noon to njooɗoyiɗon fuu.
Iidi Faltagol e mo Buuru mo wattaaka rabilla
4 Inan iidiiji ɗi ngaɗiranton Joomiraaɗo e kawrite ceniiɗe gooyneteeɗe wakkati muɓɓen:
5 Nyannde 14 lewru go'aɓurdu, gaɗa caamal naange, ngaɗanon Joomiraaɗo iidi Faltagol.
6 Nyannde 15 lewru nduun, ngaɗanon Joomiraaɗo iidi Buuru mo jillaaka rabilla. Nyaamiron buuru oon balɗe jeɗɗi.
7 Nyalaande go'aɓerde ndeen, ngaɗon kawrital ceniingal. Taa ngollon golle tampinooje on. 8 E ley balɗe jeɗɗi ɗeen, weeti fuu ngaɗanon Joomiraaɗo sadaka. Nyalaande jeɗɗaɓerde ndeen du, ngaɗon kawrital ceniingal. Taa ngollon golle tampinooje on.
Iidi Tayri ko Artii Ɓenndude
9 Joomiraaɗo haaldi e Muusaa wi'i:
— 10 Kaaldaa e Israa'iilankooɓe, mbi'aa ɗum'en: Nde naatoyɗon leydi ndi kokkammi on ndiin de oɗon taƴa gese mooɗon fu, ngaddanon almaami haɓɓere ko artii ɓenndude ley gese mon. 11 Almaami ɓanta haɓɓere ndeen yeeso Joomiraaɗo faa njaabaneɗon. O waɗa ɗum jaangoore nyalaande fowteteende ndeen. 12 Wo nyannde ndeen, ngaddanton Joomiraaɗo jawgel ngel ndunngu ngootu ngel walaa malal gaɗeteengel sadaka buleteeɗo. 13 Sadaka oon yaada e kilooji jeegom conndi ɓoosidaandi e nebbam e cabijam liitere e feccere. Wo ɗum sadaka Joomiraaɗo mo uurngol belngol ɗum. 14 Taa nyaamon buuru maa gabbe ca'aaɗe maa alkama keso gilla nyalaande nde cakkanton Laamɗo mooɗon ndeen hewtaay. Wo ɗum yamiroore nde ɗowtantoɗon to njooɗoyɗon e ley jamaanuuji fuu.
Iidi Jeɗɗiije
15 Limon jeɗɗiije jeɗɗi kiɓɓuɗe ƴuwde jaangoore Nyalaande fowteteende ndeen, ɗum woni nyannde ngadduɗon haɓɓere ɓanteteende yeeso Joomiraaɗo ndeen. 16 Nyalaande capanɗe joyaɓerde hawran e jaangoore Nyannde fowteteende jeɗɗaɓerde ndeen. Nyannde ndeen, ngaɗanon Joomiraaɗo sadaka conndi keyri. 17 To tawaɗon fuu, ngaddon sadaka ko artii ɓenndude, ɓanteteeɗo yeeso Joomiraaɗo oon. Ɗum woni buuruuje ɗiɗi jillaaɗe rabilla tawa wootere fuu kilooji tati conndi ɗaatundi waɗiraa. 18 Buuruuje ɗeen, ɓeydee sadakaaji buleteeɗi, ɗum woni njawkoy njeɗɗoy koy ndunngu ngootu e ngaari e jawɗi ɗiɗi tawa ɗi fuu ɗi ngalaa malal, tawta sadaka conndi e njaram ko ɗi cakkidetee. Ɗum laatoo sadaka mo uurngol muuɗum weli Joomiraaɗo. 19 Katin ngaɗon ndamndi sadaka yaafeede tawta jawɗi ɗiɗi ɗi ndunngu ngootu gaɗeteeɗi sadaka dewral. 20 Almaami ɓanta buuruuje ɗeen e njawkoy ɗiɗoy kooy yeeso Joomiraaɗo. Ɗum laatoo ko senanii Joomiraaɗo. Almaami oon jogoo ɗum. 21 Nyannde ndeen pay, ngaɗon kawrital ceniingal. Taa ngollon golle tampinooje on. Wo ɗum yamiroore nde ɗowtantoɗon to njooɗoyiɗon e ley jamaanuuji fuu.
22 Nde tayri gese mooɗon hewti fu, taa taƴon butaali gonɗi dow keeri gese ɗeen. Taa cuɓtinoɗon gabbe maa butaali kedditiiɗi ley gese mooɗon. Njoppanon ɗum talkaaɓe e jananɓe. Miin woni Joomiraaɗo, Laamɗo mooɗon.
Iidi Puufaali Luwe
23 Joomiraaɗo haaldi e Muusaa wi'i:
— 24 Kaaldaa e Israa'iilankooɓe mbi'aa ɗum'en: Nyannde go'o lewru jeɗɗaɓurdu fuu wo Nyalaande fowteteende. Nde laatoo nyannde miccitagol e puufaali luwe ley kawrital ceniingal. 25 Taa ngollon golle tampinooje on. Ngaɗanon Joomiraaɗo sadakaaji.
Iidi Mooytugol Hakkeeji
26 Joomiraaɗo haaldi e Muusaa katin wi'i:
— 27 Nyannde sappo lewru jeɗɗaɓurdu nduun laatoo Nyalaande mooytugol hakkeeji. Ngaɗon kawrital ceniingal, wooɗi du, cuumoɗon. Ngaɗanon Joomiraaɗo sadaka. 28 Taa ngollon gollal fay gootal nyannde ndeen sabo wo nde Nyalaande Mooytugol hakkeeji. Wo nyalaande nde hakkeeji mooɗon mooytetee yeeso Joomiraaɗo, Laamɗo mooɗon. 29 Mo suumaaki nyannde ndeen fuu, ittete e suudu bammum. 30 Golluɗo nyannde ndeen fuu, mi fiɗɗan ɗum e suudu bammum. 31 Taa ngollon gollal fay gootal. Wo ɗum yamiroore nde ɗowtantoɗon to njooɗoyɗon e ley jamaanuuji fuu. 32 Nyalaande ndeen laatanoo on fowteteende teddunde de cuumoɗon. Wo noon njogitortoɗon Nyalaande fowteteende ndeen gilla futuro jeenay lewru nduun faa hewta jaangoore muuɗum futuro.
Iidi Tenndeeje
33 Joomiraaɗo haaldi e Muusaa katin wi'i:
— 34 Kaaldaa e Israa'iilankooɓe mbi'aa ɗum'en: Nyannde 15 lewru jeɗɗaɓurdu, ngaɗanon Joomiraaɗo iidi Tenndeeje faa waɗa balɗe jeɗɗi.
35 Nyalaande go'aɓerde ndeen, ngaɗon kawrital ceniingal. Taa ngollon golle tampinooje on. 36 Ley balɗe jeɗɗi ɗeen, nyannde fuu, ngaɗanon Joomiraaɗo sadaka. Nyalaande jeetataɓerde, ngaɗon kawrital ceniingal. Ngaɗanon Joomiraaɗo sadaka. Ngaal woni kawrital timmoode iidi oon. Taa ngollon golle tampinooje on.
37 Ɗii ngoni iidiiji gaɗanteeɗi Joomiraaɗo, wakkati kawrite ceniiɗe ɗe ngaɗanton Joomiraaɗo sadakaaji: ɗum woni kirsamaaji buleteeɗi e sadakaaji conndi e njaram e kirsamaaji feere feere fodde no yamiraa nyannde fuu ley wakkati oon. 38 Tinnoɗon taa njeggiton nyalaaɗe powteteeɗe ɗeen e sadakaaji saabe aadi e ɗi yardamuye e dokke ɗe ngaddanton Joomiraaɗo.
39 Nyannde 15 lewru jeɗɗaɓurdu, nde taƴoton gese mooɗon fu, ngaɗanon Joomiraaɗo iidi faa waɗa balɗe jeɗɗi: Nyalaande go'aɓerde e jeetataɓerde fuu laatoo nyalaaɗe powtiri. 40 Nyalaande go'aɓerde ittanon ko'e mooɗon ɓiɓɓe leɗɗe lobbe e licce tamorooje e licce leɗɗe bilitinɗe e leɗɗe gonɗe daande ndiyam de ceyoroɗon balɗe jeɗɗi yeeso Joomiraaɗo, Laamɗo mooɗon. 41 Ngaɗanon Joomiraaɗo iidi oon hitaande fuu faa waɗa balɗe jeɗɗi. Wo ɗum yamiroore nde ɗowtantoɗon ley jamaanuuji fuu. Ngaɗon ɗum ley lewru jeɗɗaɓurdu. 42 Njooɗoɗon ley tenndeeje faa waɗa balɗe jeɗɗi. Israa'iilanke dimo fuu heddoo ley tenndeere 43 faa jamaanuuji fuu paama mi joƴƴiniino Israa'iilankooɓe ley tenndeeje nde mburtinnoomi ɗum'en leydi Misira ndeen. Miin woni Joomiraaɗo, Laamɗo mooɗon.
44 Nii woni no Muusaa holliri Israa'iilankooɓe kabaaru kawrite iidiiji gaɗanteeɗi Joomiraaɗo.