Jamirooje dow jeyɓe nyaamude sadaka
22
1 Joomiraaɗo haaldi e Muusaa wi'i:— 2 Kaalanaa Haaruuna e ɓiɓɓe muuɗum no kaani teddinirde sadakaaji ceniiɗi ɗi Israa'iilankooɓe ngaddanta kam taa ɓe kuyfina innde am seniinde ndeen. Miin woni Joomiraaɗo. 3 Mbi'aa ɓe: E ley jamaanuuji garooji fuu, si gorko jeyaaɗo e almaami'en ɓattake sadakaaji ceniiɗi ɗi Israa'iilankooɓe ngaddanta kam de tawi na wondi e tuundi fu, ittete yeeso am. Miin woni Joomiraaɗo.
4 Ƴuwɗo e Haaruuna nyawraaɗo nguru maa mo kente muuɗum ciiwoto fuu jeyaa nyaamude sadakaaji ceniiɗi ɗiin faa nde laaɓowi. Noon du, woni no meemuɗo ko meemi maayɗo e koyɗitiiɗo fuu njeyraa nyaamude ɗi. 5 Tuuninirɗo hoore muuɗum e meemude huunde ladoore nde laaɓaa tuuninoore tagaaɗo fuu jeyaa nyaamude ɗi. 6 Neɗɗo fuu meemuɗo gootel e kujje ɗeen, nyallan wo tuunɗo faa hewta futuro. Joomum jeyaa nyaamude sadakaaji ceniiɗi ɗiin faa nde lootowii. 7 Nde naange saami fu, o laaɓii. Caggal ɗuum imo waawi nyaamude sadakaaji ceniiɗi ɗiin. Wo nyaamdu makko. 8 Taa o nyaama daaba caaɗuɗo maa mo huunde ladde seeki sabo ɗum tuuninan o. Miin woni Joomiraaɗo.
9 Ɓe ɗowtanoo ko njamirmi taa hakke saabe huyfinde innde am saabanoo ɓe maayde. Miin woni Joomiraaɗo ceninoowo ɓe oon.
10 Mo jeyaaka e mooɗon fuu jeyaa nyaamude sadakaaji ceniiɗi ɗiin. Beero e gollanoowo almaami joɓeteeɗo fuu njeyaa nyaamude sadakaaji ceniiɗi ɗiin. 11 Ammaa maccuɗo mo almaami soodiri cardi e dimaaɗo ley galle muuɗum fuu na ngoodi laawol nyaamude nyaamdu muuɗum.
12 Si ɓii almaami debbo ɓaŋaama mo wanaa almaami fu, jeyaa nyaamude ko ƴuuri e sadakaaji ceniiɗi ɗiin. 13 Ammaa si gorum maayii maa seeraama tawii rimaayno de yeccii wartii ley ɓaade bammum hono e ley cukaaku muuɗum noon fu, na waawi nyaamude nyaamdu bammum nduun. Mo wanaa almaami fay gooto jeyaa nyaamude ɗum.
14 Si neɗɗo nyaamii sadaka ceniiɗo tawi hensaaki fu, sey yoɓa almaami ko foti e sadaka oon de yeccoo ɓeyda gootel dow joy ko laatii fuu.
15 Taa almaami'en kuyfina sadakaaji ceniiɗi ɗi Israa'iilankooɓe ngaddanta Joomiraaɗo ɗiin. 16 Si ɓe accii mo wanaa almaami nyaamii sadakaaji ceniiɗi ɗiin fu, ɓe ndekan hakke dow ko'e muɓɓen de tilsinanee yoɓude. Miin woni Joomiraaɗo, ceninoowo ɓe oon.
Daabaaji jeyɗi waɗeede sadaka
17 Joomiraaɗo haaldi e Muusaa wi'i:
— 18 Kaaldaa e Haaruuna e ɓiɓɓe muuɗum e Israa'iilankooɓe fuu mbi'aa ɗum'en: Si Israa'iilanke maa janano jooɗiiɗo leydi Israa'iila na waɗana Joomiraaɗo sadaka buleteeɗo saabe aadi maa yardamuye ko sadaka oon laatii fuu, 19 si oɗon kaajaa jaabaneede fu, sey ngaddon ngaari maa njawdiri maa ndamndi tawa walaa malal. 20 Taa ngaddon daaba ngooduɗo malal sabo on njaabantaake.
21 Si neɗɗo na haajaa waɗude ngaari maa njawdiri sadaka dewral maa sadaka saabe aadi feere maa mo yardamuye fu, na tilsi daaba oon tawee walaa malal faa sadaka oon jaabee. Taa malal fuu tawee e daaba oon. 22 Taa ngaɗanon Joomiraaɗo daaba bumɗo maa kelɗo maa mo tergal mum taƴaa maa gunyaaɗo maa mo saɗawre maa mo ɓuuye. Taa ɓattinon ɗi sakkirde faa cakkanon o. 23 Oɗon mbaawi waddude ga'el maa jawgel maa damngel ngel tergal juutungal maa daɓɓal ngaɗon sadaka yardamuye ammaa si wo sadaka saabe aadi fu, on njaabantaake. 24 Taa ngaddon yeeso Joomiraaɗo daaba mo ɓoccooɗe muuɗum kaamaa maa pusaa maa kuusaa maa taƴaa. Taa cakkon iri ɗuum ley leydi mooɗon. 25 Fay si wo janano hokki on daaba iri oon, taa ɓantee ɗum yeeso Laamɗo mooɗon. Si wo daabaaji ujaaɗi maa gooduɗi malal fu, on jaabantaake.
26 Joomiraaɗo haaldi e Muusaa wi'i:
— 27 Nde ɓii nagge maa mbaalu maa mbeewa rimaa fuu, wonda e innam faa waɗa balɗe jeɗɗi. Ƴuwde nyalaande jeetataɓerde ndeen yaade yeeso fuu ngel hewtii waɗaneede Joomiraaɗo sadaka. 28 Taa kirsidon nagge maa mbaalu maa mbeewa e ɓinngel mum nyannde wootere.
29 Nde ngaɗoton kirsamaari sadaka yettoore Joomiraaɗo fu, ngaɗiron no haaniri faa njaabaneɗon. 30 Ɗum nyaamee nyannde ndeen. Taa faa'e heddoo waala. Miin woni Joomiraaɗo.