Jamirooje dow nguurndam Almaami'en
21
1 Joomiraaɗo haaldi e Muusaa wi'i:— Kaaldaa e ɓiɓɓe Haaruuna, almaami'en mbi'aa ɗum'en: Taa almaami tuuninira hoore muuɗum meemude maayɗo ley yimɓe muuɗum, 2 si wanaa ɓurɓe fuu ɓadaade ɗum hono innam maa bammum maa ɓiyum maa inna-gootoojo muuɗum gorko 3 maa inna-gootoojo muuɗum debbo si tawii ɓaŋaaka. Imo waawi tuuninde hoore makko saabe sakiike makko debbo oon.
4 Almaami wo hooreejo lenyol muuɗum, ndelle taa tuunina hoorem sabo huyfinte. 5 Taa almaami'en pemmba piilna ko'e muɓɓen maa bahe muɓɓen, wooɗi du, taa pesa ɓalli muɓɓen. 6 Ɓe laatanoo Laamɗo maɓɓe seniiɓe, wooɗi du, taa ɓe kuyfina innde Laamɗo maɓɓe sabo wo kamɓe ngaddata sadakaaji Joomiraaɗo, buuru Laamɗo maɓɓe. Ɓe laatoo seniiɓe. 7 Ɓe njeyaa ɓaŋude debbo cemtirɗo saabe woykuraaku maa ceeraaɗo sabo almaami wo ceniiɗo yeeso Laamɗo muuɗum. 8 Ndaardon almaami wo ceniiɗo sabo wo kam woni cakkoowo buuru Laamɗo mooɗon. O laatanoo on neɗɗo ceniiɗo sabo miin Joomiraaɗo ceniiɗo oon, wo miin seninta on.
9 Si ɓii almaami debbo semtinirii hoore muuɗum waɗude woykuraaku fu, semtinii bammum. Sey faɗɗee e yiite.
Jamirooje dow almaami mawɗo
10 Almaami mawɗo mo nebbam ceniiɗam jooraa dow hoore muuɗum wooɗi ɓornaa kaddule ceniiɗe de seninaa oon, taa fiirta ngaasa muuɗum wooɗi du, taa seeka kaddule muuɗum saabe mettorgal. 11 Taa o ɓadoo maayɗo fay gooto. Taa o tuunina hoore makko saabe meemude maayɗo fay si wo inniiko maa baabiiko. 12 Taa o wurtoo nokkuure seniinde ndeen. Taa o huyfina nokkuure Laamɗo makko seniinde ndeen sabo o seniniraama nebbam Laamɗo makko ceniiɗam ɗaam. Miin woni Joomiraaɗo. 13 O ɓaŋa debbo mo anndaa gorko. 14 Taa o ɓaŋa debbo mo gorum maayi maa ceeraaɗo, maa anndiraaɗo woykuraaku. O ɓaŋa debbo ley lenyol makko mo anndaa gorko. 15 Noon waɗata taa o huyfina ƴuwdi makko. Miin woni Joomiraaɗo ceninɗo mo oon.
Ko haɗata ƴuuruɗo e Haaruuna laataade Almaami
16 Joomiraaɗo haaldi e Muusaa katin wi'i:
— 17 Kaaldaa e Haaruuna mbi'aa ɗum: Neɗɗo fuu jeyaaɗo e ƴuwdi maaɗa gooduɗo malal, taa ɓattoo yeeso Laamɗo muuɗum faa sakkana ɗum buuru. Ɗum laatoro noon e ley jamaanuuji fuu. 18 Gooduɗo malal fuu jeyaa ɓattaade kam. Nde wo bumɗo maa booyɗo maa mo hinere oonyiinde maa mo tergal naaliingal, 19 maa kelɗo koyngal maa junngo, 20 maa jom mbankuure* maa daɓɓo sanne, maa mo yitere muuɗum waɗi toɓɓere maa mo nyaancu nanngi maa mo ɓuuye bulɗe, maa mo ɓoccooɗe muuɗum pusi.
21 E ley ƴuwdi Haaruuna, gooduɗo malal fay gooto jeyaa ɓattaade faa sakkana Joomiraaɗo. Saabe neɗɗo oon hiɓɓaa, o jeyaa ɓattaade yeeso Laamɗo muuɗum faa sakkana ɗum. 22 Joomum na waawi nyaamude sadakaaji Laamɗo muuɗum, ceniiɗi e ɓurɗi senaade fuu. 23 Ammaa taa o ɓadoo ridoo nokkuure seniinde e sakkirde ndeen fuu sabo imo wondi e malal. Taa o tuunina nokkuuje am ceniiɗe ɗeen. Miin woni Joomiraaɗo ceninɗo ɗe.
24 Muusaa haalani ɗum Haaruuna e ɓiɓɓe muuɗum e yimɓe Israa'iila fuu.