Jamirooje dow jukkungo saabe hakke
20
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe mbi'aa ɗum'en: Israa'iilanke maa janano jooɗiiɗo leydi Israa'iila kooƴuɗo ɓiyum sakkani tooru Molek fuu wo bareteeɗo. Yimɓe leydi ndiin paɗɗa joomum kaaƴe faa maaya. 3 Miin e hoore am du mi waranan joomum de mi itta ɗum e lenyol muuɗum saabe hooƴii ɓiyum sakkanii tooru Molek faa tuuninii nokkuure am seniinde wooɗi du, huyfinii innde am seniinde ndeen. 4 Si yimɓe leydi ndiin ommbii gite muɓɓen dow ko joomum sakki ɓiyum tooru Molek ɗuum de mbaraay ɗum fu, 5 miin e hoore am mi waranan joomum e suudu bammum fuu de mi itta ɗum e lenyol muuɗum, kam e wadduɓe e muuɗum bonanda saabe Molek ɓeen fuu.
6 Neɗɗo fuu jahoowo to gollidooɓe e beeli maayɓe maa daggadaaɓe faa gollida e muɓɓen, mi waranan ɗum de mi itta ɗum e suudu bammum. 7 Ndelle ceninon ko'e mon, laatoɗon seniiɓe sabo wo miin woni Joomiraaɗo, Laamɗo mooɗon. 8 Njogitoɗon jamirooje am de ngaɗon ko mbiimi. Wo miin woni Joomiraaɗo ceninoowo on oon.
9 Neɗɗo fuu kuɗuɗo innam maa bammum wo bareteeɗo. Saabe o huɗii inniiko maa baabiiko, ƴiiƴam makko saaman dow hoore makko.
10 Si gorko waɗidii e debbo ɓaŋaaɗo jeenu fu, ɓe ɗiɗo fuu wo ɓe wareteeɓe. 11 Si gorko fukkodake e dee bammum fu, semtinii bammum. Ndelle sey gorko oon e debbo oon fuu mbaree. Ƴiiƴam maɓɓe saama dow ko'e maɓɓe.
12 Si gorko fukkodake e dee ɓiyum, sey gorko oon e debbo oon fuu mbaree sabo ɓe ngaɗii ko nyiddinii. Ƴiiƴam maɓɓe saama dow ko'e maɓɓe.
13 Si gorko fukkodake e gorko banndum hono no gorko fukkodortoo e debbo noon fu, ko ɓe ngaɗi ɗuum na nyiddinii. Ndelle sey ɓe ɗiɗo fuu ɓe mbaree. Ƴiiƴam maɓɓe saama dow ko'e maɓɓe.
14 Si gorko nawlirii ɓiɗɗo debbo e innam fu, waɗii ko boni. Ndelle ɓe tato fuu, sey ɓe paɗɗee e yiite taa bone oon heddoo hakkunde mooɗon.
15 Si gorko fukkodake e daaba fu, sey waree kam e daaba oon fuu.
16 Si debbo ɓadake daaba faa fukkodoo e muuɗum fu, sey kam e daaba oon fuu mbaree. Ƴiiƴam hakke oon saama dow maɓɓe.
17 Si gorko fukkodake e sakiike muuɗum debbo, nde wo ɓii bammum, nde wo ɓii innam fu, waɗii ko nyiddinii sanne. Sey ɓe ittee e suudu baaba. Saabe gorko oon semtinii sakiike muuɗum debbo, hakke muuɗum oon saaman dow hoorem.
18 Si gorko fukkodake e debbo gonduɗo e tuundi muuɗum, si o yi'i tuundi ndiin fu, sey ɓe ɗiɗo fuu ɓe ittee e suudu baaba sabo ɓe ngaɗii ko semtinii ko ɓe cudditi tuundi ndiin ɗuum.
19 Taa pukkodoɗaa e sakiike inna ma debbo maa sakiike bammaa debbo sabo ɗuum wo semtinde enɗam muuɗum. Waɗuɓe noon fuu, sey hakkeeji muɓɓen caama dow ko'e muɓɓen.
20 Si gorko fukkodake e dee bappaanyo muuɗum fu, semtinii bappaanyo oon. Ndelle hakke oon saaman dow fukkodiiɓe ɓeen. Ɓe maayan ɓe keɓaay ɓeyngu.
21 Si gorko ɓaŋii dee sakiike muuɗum fu, waɗii ko nyiddinii. O semtinii sakiike makko oon, wooɗi du ɓe keɓataa ɓeyngu.
Tindinooje dow ɗowtanagol jamirooje Joomiraaɗo
22 Njogitoɗon jamirooje am e sariyaaji am fuu de ngaɗon ko mbiimi. Noon waɗata de leydi ndi nannammi on faa njooɗoɗon ndiin tuutataa on. 23 Taa njokkon al'aadaaji lenyi ɗi ndiiwammi yeeso mooɗon ɗiin sabo wo golleeji maɓɓe bonɗi ɗiin ngaɗi de ndaardumi ɓe hono ko nyiddinii. 24 Saabe ɗuum de mbiimi on:
— Wo onon njeytata leydi maɓɓe ndiin. Miin e hoore am hokkata on ndi. Wo ndi leydi ndi kosam e njuumndi ilata e muuɗum. Miin woni Joomiraaɗo, Laamɗo mooɗon. Wo miin senndi on e lenyi keddiiɗi.
25 Cenndon daabaaji laaɓuɗi e ɗi laaɓaa, pooli laaɓuɗi e ɗi laaɓaa taa ngaɗon ko'e mooɗon nyiddiniiɓe saabe daabaaji e pooli e kujje ladooje e leydi e ko cenndumi de mbiimi na harmani on ɗuum fuu. 26 Laatanoɗon kam seniiɓe sabo miin Joomiraaɗo, wo mi ceniiɗo. Mi senndii on e lenyi keddiiɗi faa laatoɗon lenyol am.
27 Si debbo maa gorko laatake gollidoowo e beeli maayɓe maa daggadaajo fu, wo bardeteeɗo kaaƴe. Ƴiiƴam joomum saama dow hoorem.