No Joomiraaɗo yamiri golliranee
19
1 Joomiraaɗo haaldi e Muusaa wi'i:— 2 Kaaldaa e jamaare kawrital Israa'iila fuu mbi'aa ɗum'en: Laatoɗon seniiɓe sabo miin Joomiraaɗo, Laamɗo mooɗon oon, wo mi ceniiɗo. 3 Mono e mooɗon fuu teddina innam e bammum de haybana nyalaaɗe am powteteeɗe ɗeen. Miin woni Joomiraaɗo, Laamɗo mooɗon.
4 Taa kucciton e tooruuji, taa tafanon ko'e mooɗon allaaji jamɗe. Miin woni Joomiraaɗo, Laamɗo mooɗon.
5 Nde ngaɗanton Joomiraaɗo sadaka dewral fu, ngaɗiron ɗum no haaniri faa laatoo ko weli ɗum. 6 Sadaka oon nyaamee nyannde sakkaa ndeen maa jaangoore muuɗum. Ko hedditii nyalaande tataɓerde fu, sey wulee. 7 Si ɗum nyaamaama nyalaande tataɓerde ndeen fu, sadaka oon jaabataake sabo ɗum laaɓaa. 8 Nyaamuɗo ɗum fuu, saaminii hakke dow hoore muuɗum sabo huyfinii ko seninanaa Joomiraaɗo. Joomum wo itteteeɗo e suudu bammum.
9 Nde tayri gese mooɗon hewti fu, taa taƴon butaali gonɗi dow keeri gese ɗeen. Taa cuɓtinoɗon gabbe maa butaali kedditiiɗi ley gese mooɗon. 10 Taa ɓoridon cabiije mooɗon, wooɗi du, taa ɓoɓton ɓiɓɓe cabiije mooɗon caamuɗe e leydi sabo wo ɗum ngeɗu talkaaɓe e jananɓe. Miin woni Joomiraaɗo, Laamɗo mooɗon.
11 Taa mbujjon, taa penon, taa njambondiron. 12 Taa kunoroɗon innde am dow fewre. Si on ngaɗii noon fu, on kuyfinii innde Laamɗo mooɗon. Miin woni Joomiraaɗo.
13 Taa torron banndiraaɓe mooɗon faa keɓiron ɗum'en nafaa, wooɗi du, taa mbujjon. Taa njoɓdi golloowo mooɗon waala e juuɗe mon. 14 Taa njennon paho, taa pukkinon fergorde yeeso bumɗo. Kulon Laamɗo mooɗon. Miin woni Joomiraaɗo.
15 Taa oonyon sariya. Taa njinganon talka pelniiɗo wooɗi du, taa kaɗon jom baawɗe goonga si felnaaki ammaa cariron goonga e dartaare. 16 Taa ngaddondiron yimɓe mooɗon, taa ndekon goɗɗo ko waawi waddande ɗum wareede. Miin woni Joomiraaɗo.
17 Taa njogitoɗaa nganyaandi sakiike ma ley ɓernde maaɗa ammaa pelaa ɗum si woofii taa ndonndoɗaa hakke saabe muuɗum. 18 Taa piloɗaa yomnitaade ko ngaɗaɗaa, wooɗi du, taa njogitoɗaa nganyaandi yimɓe maaɗa. Njiɗiraa gondo maaɗa hono no njiɗirɗaa hoore maaɗa noon. Miin woni Joomiraaɗo.
19 Kaybanon sariyaaji am. Taa ngaɗon daabaaji ɗiɗi ɗi kawtaa sii ndimda. Taa kawrondinon aawdiiji ɗiɗi ley ngesa ngoota. Taa ɓornoɗon kaddungal canyiraangal gaaraaji ɗiɗi ɗi kawtaa sii.
20 Si gorko fukkodake e korɗo kokkanooɗo gorko goɗɗo tawi rimɗinaaka fu, sey joomum yoɓa. Ɓe mbarataake sabo korɗo oon rimɗinaaka. 21 Gorko oon wadda njawdiri dammbugal hukum Ceniiɗo saabe sadaka njoɓdi hakke. 22 Almaami waɗirana o njawdiri ndiin sadaka faa hakkeeji makko mooytee yeeso Joomiraaɗo de o yaafee.
23 Nde kewtoyɗon leydi ndiin, de tiiriɗon siyiiji leɗɗe dimooje keewɗe fu, ndaardon ɓiɓɓe majje hono mboɗaa faa hewta duuɓi tati. Taa nyaamon ɓiɓɓe majje sabo iɗe laatanii on mboɗaa. 24 Ley hitaande nayaɓerde, ɓiɓɓe leɗɗe ɗeen fuu ceninee de laatoo sadaka yettoore Joomiraaɗo. 25 Hitaande joyaɓerde ndeen, nyaamon barke majje. Ɗe ndimanan on faa heewa. Miin woni Joomiraaɗo, Laamɗo mooɗon.
26 Taa nyaamon ko hirsaaka. Taa ngaɗon tiimngal maa ndaggadaaku. 27 Taa pemmbon piilnon ko'e mon maa bahe mon. 28 Taa ceekon terɗe mooɗon saabe maayreede, wooɗi taa ngaɗon ŋaale maa coki dow ɓalli mooɗon. Miin woni Joomiraaɗo. 29 Taa ngatton ɓiɓɓe mooɗon rewɓe e woykuraaku de ngaddanon yimɓe leydi ndiin waɗude woykuraaku e lallere.
30 Kaybanon nyalaaɗe am powteteeɗe de teddinon nokkuure am seniinde. Miin woni Joomiraaɗo.
31 Taa njahon to gollidooɓe e beeli maayɓe maa daggadaaɓe, taa piloɗon ɓe sabo on laatoto tuunɓe saabe maɓɓe. Miin woni Joomiraaɗo, Laamɗo mooɗon. 32 Njaagoɗon ko'e daneeje, teddinon nayeeɓe. Noon kollirton oɗon kula Laamɗo mooɗon. Miin woni Joomiraaɗo. 33 Si janano warii jooɗake ley leydi mooɗon fu, taa torron ɗum. 34 Ndaardon ɗum hono wo sakiike mon dimaaɗo ley leydi ndiin. Njiɗiron mo hono no njiɗirɗon ko'e mooɗon noon sabo onon du, on laatakeno jananɓe leydi Misira. Miin woni Joomiraaɗo, Laamɗo mooɗon.
35 Taa oonyon sariya bangal ko etirtee maa ko fonndirtee njuuteefi maa teddeefi maa keewal fuu. 36 Ponndiron ponndirɗe dartiiɗe ko laati teddeefi maa ɗuuɗal fuu. Miin woni Joomiraaɗo, Laamɗo mooɗon. Miin wurtini on leydi Misira.
37 Njogitoɗon jamirooje am e sariyaaji am fuu de ngaɗon ko mbiimi. Miin woni Joomiraaɗo.