Jamirooje dow gondal ngal yaadataa e muuyɗe Joomiraaɗo
18
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe mbi'aa ɗum'en: Miin woni Joomiraaɗo, Laamɗo mooɗon. 3 Taa ngaɗon al'aadaaji leydi Misira to ngonnoɗon toon, wooɗi du taa njokkon al'aadaaji leydi Kanaana ndi njaarammi on ndiin. Taa njokkon sariyaaji maɓɓe. 4 Wo jamirooje am tan ɗowtantoɗon, kaybanon ɗe, ngaɗon ko mbiimi. Miin woni Joomiraaɗo, Laamɗo mooɗon. 5 Njogitoɗon jamirooje am e sariyaaji am. Jogitiiɗo ɗe de waɗi ko ɗe mbi'i fuu wuuran saabe majje. Miin woni Joomiraaɗo.
6 Taa Israa'iilanke fay gooto fukkodoo e sakiike muuɗum debbo. Miin woni Joomiraaɗo.
7 Taa cemtiniraa bammaa fukkodaade e inna ma. Taa pukkodoɗaa e muuɗum sabo wo inna ma.
8 Taa cemtiniraa baaba ma fukkodaade e deekum goɗɗo sabo ɗuum wo semteende muuɗum.
9 Taa pukkodoɗaa e sakiike maaɗa debbo, kawtaaɗo inna maa baaba, dimaaɗo ley ɓaade ndeen e gere goɗɗo fuu.
10 Taa pukkodoɗaa e taana debbo ɓii ɓiya gorko maa debbo sabo wo semteende ma aan e hoore maaɗa.
11 Taa pukkodoɗaa e ɓii dee bammaa sabo imo jeydaa e bammaa, wo o sakiike maaɗa.
12 Taa pukkodoɗaa e sakiike bammaa debbo sabo wo goggo maaɗa.
13 Taa pukkodoɗaa e sakiike inna ma debbo sabo wo inna maaɗa.
14 Taa cemtiniraa bappaanyo maaɗa fukkodaade e deekum. Taa ɓadoɗaa o sabo wo o goggo maaɗa.
15 Taa pukkodoɗaa e dee ɓiya gorko sabo wo a esum. Taa pukkodoɗaa e makko.
16 Taa pukkodoɗaa e dee sakiike maaɗa sabo wo ɗum semteende sakiike ma oon.
17 Taa pukkodoɗaa e debbo de njeccoɗaa e ɓiyum debbo maa taanum sabo wo ɓe hawtuɓe enɗam. Iɗum boni sanne.
18 Taa ɓaŋaa sakiike deeka. Taa pukkodoɗaa e muuɗum haddi nguurndam deeka oon fuu sabo ɗum waddan kiram hakkunde maɓɓe.
19 Taa pukkodoɗaa e debbo jiiɗo tuundi muuɗum sabo wo tuunɗo.
20 Taa pukkodoɗaa e dee gondo maaɗa sabo ɗum tuuninte.
21 Taa kooƴaa ɓiya fay gooto cakkana tooru wi'eteendu Molek nduun de kuyfinaa innde Laamɗo maaɗa. Miin woni Joomiraaɗo.
22 Taa pukkodoɗaa e gorko bannda hono wo debbo sabo ɗuum na nyiddinii sanne.
23 Taa pukkodoɗaa e daaba fay gooto sabo a tuuninan hoore maaɗa saabe majjum. Taa debbo ɓattoo daaba faa fukkodoo e muuɗum, sabo iɗum boni sanne.
24 Taa tuuniniron ko'e mooɗon e golleeji iri ɗiin sabo wo kanji caabanii lenyi ɗi ndiiwammi yeeso mooɗon ɗiin laataade tuunɗi. 25 Leydi ndiin laatake tuundi, saabe hakkeeji maɓɓe de njukkiimi ndi faa ndi tuuti yimɓe mayri.
26 Njogitoɗon jamirooje am e sariyaaji am. Ndeentee taa ngaɗon golleeji nyiddiniiɗi ɗiin onon Israa'iilankooɓe e jananɓe jooɗiiɓe hakkunde mooɗon fuu. 27 Wo saabe golleeji bonɗi ɗi jooɗinooɓe e mayri ngaɗannoo ɗiin de ndi laatii tuundi. 28 Noon waɗata taa tuuninon leydi ndiin de ndi tuuta on onon du, hono no ndi tuutiri lenyi jooɗinooɗi e mayri arande noon. 29 Gaɗuɗo gootel e golleeji nyiddiniiɗi ɗiin ko ɗi laatii fuu, ittetee e suudu bammum. 30 Tinnee njogitee jamirooje am, ngaɗon ko mbiimi. Taa tokkon al'aadaaji nyiddiniiɗi gaɗetenooɗi illa on ngaraayno ɗiin. Noon waɗata taa tuunon. Wo miin woni Joomiraaɗo, Laamɗo mooɗon.