Yamiroore dow ƴiiƴam kirsamaaji
17
1 Joomiraaɗo haaldi e Muusaa wi'i:— 2 Kaaldaa e Haaruuna e ɓiɓɓe muuɗum e kawrital Israa'iila fuu mbi'aa ɗum'en: Inan ko Joomiraaɗo yamiri:
3 Si gorko jeyaaɗo e suudu Israa'iila hirsii nagge maa mbaalu maa mbeewa ley hoɗorde maa yaasin muuɗum, 4 de yaaraay daaba oon Hukum Ceniiɗo faa sakkana Joomiraaɗo dammbugal hukum muuɗum oon fu, joomum yoɓiran ƴiiƴam muuɗum ƴiiƴam ɗam rufi ɗaam. Sey gorko oon ittee e suudu bammum. 5 Ndelle na tilsi Israa'iilankooɓe ngaddana Joomiraaɗo kirsamaaji ɗi cakkata fuu naarude hukum Ceniiɗo yeeso almaami. Ɓe ngaɗana ɗi Joomiraaɗo sadaka dewral. 6 Almaami misa ƴiiƴam majji dow sakkirde Joomiraaɗo wonnde naarude hukum Ceniiɗo ndeen de wula ɓelle ɗeen faa ɗum laatoo sadaka mo uurngol muuɗum weli Joomiraaɗo. 7 Noon waɗata de Israa'iilankooɓe cela hooƴude kirsamaaji muɓɓen na cakkana tooruuji damɗi ɗi cujidanta ɗiin. Wo ɗum yamiroore nde ɗowtantoɗon onon e ƴuwdi mooɗon ley jamaanuuji fuu faa abada.
8 Ndelle mbi'aa ɓe: Si Israa'iilanke maa janano gonduɗo e muɓɓen sakkii kirsamaari mbuleteendi maa waɗii sadaka feere 9 de yaaraay daaba oon naarude hukum Ceniiɗo faa sakkana Joomiraaɗo fu, ittetee e suudu bammum.
10 Si Israa'iilanke maa janano gonduɗo e muɓɓen nyaamii ƴiiƴam ko ɗam laatii fu, mi waranan joomum de mi itta ɗum e suudu bammum. 11 Sabo yonki ko woodi teewu fuu e ley ƴiiƴam muuɗum woni. Wo miin watti ɗam dow sakkirde faa ɗam mooyta hakkeeji mooɗon sabo wo ɗam yonki mbaawuki mooytude hakkeeji. 12 Saabe ɗuum de mbi'umi Israa'iilankooɓe: Taa fay gooto mooɗon nyaama ƴiiƴam. Janano jooɗiiɗo hakkunde mooɗon du, jeyaa nyaamude ɗam.
13 Si gooto hakkunde Israa'iilankooɓe maa jananɓe wonduɓe e muɓɓen nanngii daaba nyaameteeɗo maa foondu nyaameteendu ley loohagol fu, sey rufa ƴiiƴam huunde ndeen de uwira ɗam leydi. 14 Sabo wo ƴiiƴam woni yonki ko woodi teewu fuu. Ndelle ɗuum saabii de mbiimi Israa'iilankooɓe: On njeyaa nyaamude ƴiiƴam fay ngootam sabo ƴiiƴam woni yonki ko wuuri fuu. Nyaamuɗo ɗam fuu, ittetee e suudu bammum.