Iidi Mooytugol Hakkeeji
16
1 Joomiraaɗo haaldi e Muusaa gaɗa maayde ɓiɓɓe Haaruuna ɗiɗo saabe ɓattakeno yeeso Joomiraaɗo. 2 Joomiraaɗo wi'i Muusaa:— Kaaldaa e sakiike maaɗa Haaruuna mbi'a ɗum taa naata wakkati fuu faa ley Nokkuure Ɓurnde fuu Senaade gaɗa ridoo yeeso keruba'en huuruɓe keesuwal Amaana ngaal. Noon waɗata taa o maaya sabo miɗo ɓanga nder ruulde dow ommboode ndeen.
3 Inan no Haaruuna jeyi naatirde ley Nokkuure Ɓurnde fuu Senaade ndeen: O warda e ngaari sadaka yaafeede tawta njawdiri sadaka buleteeɗo. 4 O ɓornoo saayo seniingo nyootiraango leppi ɗaatuɗi tawta sarra nyootiraaka leppi ɗaatuɗi. O haɓɓoo kaɓɓorgol gaɗiraangol leppi ɗaatuɗi de o sudda hoore makko lefol nyootiraangol leppi ɗaatuɗi. Ɗee ngoni kaddule ceniiɗe ɗe o jeyi ɓornaade wakkati o lootii faa o naata ley nokkuure ndeen fuu.
5 Israa'iilankooɓe kokka o damɗi ɗiɗi gaɗeteeɗi sadaka yaafeede, tawta njawdiri sadaka buleteeɗo. 6 O sakka ngaari sadaka yaafeede hakke makko kanko e suudu makko de hakkeeji maɓɓe mooytee. 7 Ndeen o wadda damɗi ɗiɗi ɗiin yeeso Joomiraaɗo dammbugal hukum Ceniiɗo. 8 O waɗa cumnal dow majji. Ngootiri laatoo ngeɗu Joomiraaɗo, keddiindi du, laatoo Ajajel* 9 Haaruuna ɓattina ndi cumnal hokki Joomiraaɗo ndiin waɗa ɗum sadaka yaafeede. 10 Keddiindi ndi cumnal waɗi Ajajel ndiin du, waddee darnee yeeso Joomiraaɗo faa mooytiree hakkeeji yimɓe de riiwiree ladde yoornde.
11 Haaruuna ɓattina ngaari sadaka yaafeede hakke muuɗum de sakka ndi faa hakkeejim e hakkeeji suudu muuɗum fuu mooytee. O hirsa ngaari sadaka yaafeede hakke makko ndiin faa o yaafee. 12 O hooƴa ɓoɓtirgal ƴulɓe makko o hebbina ɗum ƴulɓe kuɓɓooje ittaaɗe e sakkirde wonnde yeeso Joomiraaɗo ndeen. O ɓeyda ure conndiije tambanɗe junngo ɗiɗi de o yaara ɗum fuu gaɗa ridoo cenndoowo nokkuure seniinde ndeen. 13 O wula ure ɗeen yeeso Joomiraaɗo faa cuurki majje sudda ommboode keesuwal Amaana ngaal. Noon waɗata taa o maaya. 14 O ittira ƴiiƴam ngaari ndiin honndu makko de o misa dow ommboode keesuwal ngaal faro lettugal. O misa ɗam kile jeɗɗi dow ommboode keesuwal ngaal. 15 O hirsa ndamndi sadaka yaafeede yimɓe Israa'iila ndiin de o yaara ƴiiƴam mayri gaɗa ridoo oon. O waɗa ƴiiƴam mayri hono no o waɗirnoo ɗam ngaari ndiin noon. O misa ɗam dow ommboode keesuwal ngaal e yeeso muuɗum.
16 Noon o mooytirta nokkuure seniinde ndeen faa laaɓa e tuundiiji Israa'iilankooɓe e lutti muɓɓen e hakkeeji muɓɓen laatiiɗi fuu. Noon du o waɗiranta Nokkuure Ɓurnde fuu Senaade wondunde e maɓɓe hakkunde tuundiiji maɓɓe ndeen. 17 Fay gooto jeyaa taweede ley hukum Ceniiɗo oon wakkati Haaruuna naatata ley Nokkuure Ɓurnde fuu Senaade faa waɗa sadaka yaafeede oon faa nde wurtii. O waɗana hoore makko e suudu makko e kawrital Israa'iila fuu sadaka mooytoowo hakke.
18 O wurtoroo faro sakkirde wonnde yeeso Joomiraaɗo ndeen. O waɗa sadaka dow mayre faa o laaɓina nde. O hooƴa ƴiiƴam ngaari ndiin e ɗam ndamndi ɗaam o wuja dow luwe piilol sakkirde ndeen. 19 O suuwa honndu makko ley majjam. O misa dow sakkirde ndeen kile jeɗɗi, o laaɓina nde e tuundiiji Israa'iilankooɓe ɗiin fuu de o senina nde.
20 Nde o timmini laaɓingol Nokkuure Ɓurnde fuu Senaade ndeen e hukum Ceniiɗo oon e sakkirde ndeen fu, o ɓattina ndamndi mbuurndi ndiin. 21 O yowa juuɗe makko dow hoore mayri de o haalta lutti e toonyaaji e hakkeeji Israa'iilankooɓe fuu. O yowa ɗi fuu dow hoore ndamndi ndiin tawa o suɓakeno gorko riiwa ndi nanna ladde yoornde. 22 Ndamndi ndiin dillidan e hakkeeji maɓɓe ɗiin fuu. Ndi yoppee ley ladde yoornde toon.
23 Haaruuna naata ley hukum Ceniiɗo, ɓortoo kaddule nyootiraaɗe leppi ɗaatuɗi ɗe ɓorninoo naandi Nokkuure Ɓurnde fuu Senaade ndeen de yoppa ɗe ɗoon. 24 O lootoo ley nokkuure seniinde de o yeccoo o ɓornoo kaddule makko. Caggal ɗuum o wurtoo, o sakka sadaka makko buleteeɗo, tawta sadaka buleteeɗo saabe hakkeeji yimɓe Israa'iila oon. O waɗira noon faa hakkeeji makko e ɗi Israa'iilankooɓe fuu mooytee. 25 O wula ɓelle kirsamaaji sadaka yaafeede ɗiin fuu dow sakkirde ndeen.
26 Gorko diiwunooɗo ndamndi Ajajel nanni ladde oon du, sey lonna kaddule muuɗum, lootoo de caggal ɗuum, yeccoo ley hoɗorde ndeen. 27 Ngaari e ndamndi sadaka yaafeede ɗi ƴiiƴam muɓɓen yaaranoo misowaa ley Nokkuure Ɓurnde fuu Senaade ɗiin njaaree yaasin hoɗorde. Guri majji e teewu majji e coowoori majji fuu mbulee toon. 28 Buluɗo ɗi oon du, lonna kaddule muuɗum, looto de caggal ɗuum yeccoo ley hoɗorde ɗoon.
29 Wo ɗum yamiroore nde ɗowtantoɗon faa abada: Nyannde sappo lewru jeɗɗaɓurdu fuu, cuumoɗon, taa ngollon fay gootal onon Israa'iilankooɓe e jananɓe wonduɓe e mooɗon fuu. 30 Sabo wo nyannde ndeen hakkeeji mooɗon mooytetee faa laaɓineɗon. On laaɓan e hakkeeji mooɗon fuu yeeso Joomiraaɗo. 31 Nyalaande ndeen laatanoo on nyannde fowteteende seniinde sanne. Cuumoɗon, taa ngollon faa'e. Wo ɗum yamiroore nde ɗowtantoɗon faa abada.
32 Wo almaami mo nebbam jooraa dow hoore muuɗum de hokkaa ndongu bammum almaamaaku oon tan jeyi waɗude sadaka mooytugol hakkeeji oon. O ɓornoo kaddule ceniiɗe nyootiraaɗe leppi ɗaatuɗi. 33 O laaɓina Nokkuure Ɓurnde fuu Senaade ndeen e hukum Ceniiɗo oon e sakkirde ndeen fuu. O waɗana almaami'en e yimɓe Israa'iila fuu sadaka faa hakkeeji muɓɓen mooytee.
34 Ndee woni yamiroore nde ɗowtantoɗon faa abada faa hakkeeji yimɓe Israa'iila fuu mooytee nde wootere ley hitaande fuu.
Ko Joomiraaɗo yamirnoo Muusaa ɗuum fuu waɗaa.