Haala nebbam fitillaaji
24
1 Joomiraaɗo haaldi e Muusaa wi'i:— 2 Njamiraa Israa'iilankooɓe ngaddane nebbam jaytun unaaɗo faa fitillaaji ɗiin keddoo na kuɓɓa wakkati fuu. 3 Haaruuna joƴƴina ɗi ɗakkol ridoo cuuɗoowo keesuwal Amaana ley hukum Ceniiɗo faa ɗi njaynina yeeso Joomiraaɗo gilla futuro faa weeta. Wo ɗum yamiroore nde ɗowtantoɗon ley jamaanuuji fuu faa abada. 4 O deka fitillaaji ɗiin dow joƴƴinirde muɓɓen seniinde ndeen faa keddoo na kuɓɓa yeeso Joomiraaɗo wakkati fuu.
Haala buuru cakketeeɗo
5 Kooƴaa conndi ɗaatundi ngaɗaa buuruuje 12, tawa buuruure wootere fuu wo kilooji jeegom conndi ndiin waɗiraa. 6 Ngaɗaa ɗe guurti ɗiɗi dow taabawal ceniingal gonngal yeeso Joomiraaɗo ngaal. Guurtol fuu maasaaje jeegom. 7 Ngattaa ure daneeje laaɓuɗe dow guurtol fuu. Ɗe ngona dow buuruuje ɗeen hono maande sadaka Joomiraaɗo. 8 Nyannde fowteteende fuu, ɗe njoƴƴinee yeeso Joomiraaɗo, ɗe keddoo ɗoon wakkati fuu. Ɗe ittee e jeyal Israa'iilankooɓe. Wo ɗum amaana tabitoowo faa abada. 9 Ɗum laatoo ngeɗu Haaruuna e ɓiɓɓe muuɗum. Ɓe nyaama ɗum ley nokkuure seniinde. Ɗum laatanoo ɓe nyaamdu seniindu ittaandu ley sadakaaji Joomiraaɗo. Wo ɗum yamiroore nde ɗowtantoɗon faa abada.
Haala mbonkaade Innde Joomiraaɗo
10 Ɓii Misiranke gorko mo inna muuɗum jeyaa Israa'iila na wonnoo hakkunde maɓɓe ley hoɗorde ndeen. Fitina ummii hakkunde makko e Israa'iilanke goɗɗo. 11 O mbonkii innde Laamɗo, o huyfini ɗum de o waddaa yeeso Muusaa. Inniiko na wi'ee Celomita ɓii Dibiri mo lenyol Dan. 12 O doomaa fadde faameede ko Joomiraaɗo yamirta dow makko.
13 Joomiraaɗo haaldi e Muusaa wi'i:
— 14 Mburtinaa mbonkiiɗo kam oon ley hoɗorde ndeen. Nanuɓe mbonka makko ɓeen fuu ndeka juuɗe muɓɓen dow hoore makko de jamaare ndeen fuu hawrita faɗɗa o kaaƴe. 15 Wooɗi du, mbi'aa Israa'iilankooɓe: Neɗɗo fuu mbonkiiɗo Laamɗo muuɗum, saaminii hakke dow hoorem. 16 Mbonkiiɗo innde Joomiraaɗo fuu wo bareteeɗo. Jamaare Israa'iila fuu hawrita faɗɗa joomum kaaƴe. Ko joomum laatii fuu, nde wo janano nde wo Israa'iilanke dimo fuu sey waree saabe mbonkake innde Laamɗo.
17 Barɗo ɓii Aadama banndum fuu, wo bareteeɗo. 18 Barɗo daaba goɗɗo fuu, sey yoɓa ɗum daaba buurɗo. Yonki yoɓiree yonki.
19 Nawnuɗo goɗɗo fuu sey kam du nawnee iri nawnande ndeen. 20 Kelol yoɓa kelol, yitere yoɓa yitere, nyiinde yoɓa nyiinde. Nawnande nde o nawni banndiiko fuu, wo hono ndeen pay o nawnetee.
21 Baruɗo daaba goɗɗo fuu yoɓan ammaa barɗo tagaaɗo fuu wo bareteeɗo.
22 Ndelle sariya gooto oon woodani Israa'iilanke dimo e janano fuu dow majjum. Miin woni Joomiraaɗo, Laamɗo mooɗon.
23 Muusaa yottini Israa'iilankooɓe haala kaan. Ndeen ɓe mburtini mbonkiiɗo Laamɗo oon ley hoɗorde ndeen de ɓe paɗɗi ɗum kaaƴe faa maayi. Ɓe ngaɗi ko Joomiraaɗo yamiri Muusaa ɗuum fuu.