Haala hitaande powtiri leydi
25
1 Joomiraaɗo haaldi e Muusaa dow waamnde Sinayi wi'i:— 2 Kaaldaa e Israa'iilankooɓe mbi'aa ɗum'en: Nde naatoyɗon leydi ndi kokkammi on ndiin fu, kakkilanon wakkatiiji ɗi gese leydi ndiin njeyi acceede powta saabe Joomiraaɗo. 3 E ley duuɓi jeegom fuu aawon gese mooɗon, moƴƴinon leɗɗe mon cabiije, taƴon ko ɗe ndimi. 4 Hitaande jeɗɗaɓerde ndeen laatoo fowteteende teddunde, nde leydi ndiin fowtata saabe Joomiraaɗo. Taa aawon gese mon, taa moƴƴinon cabiije mon du. 5 Taa taƴon gariije gese mon, taa ɓoron cabiije dow licce ɗe on moƴƴinaayno ndeson, faa nde laatoo hitaande powtiri leydi ndiin. 6 Ammaa ley hitaande ndeen, oɗon mbaawi ittude ko fuɗani hoore muuɗum ɗuum haddi ko nyaamon tan, onon e maccuɓe mon e horɓe mon e gollooɓe mon e weerɓe wonɓe ley galleeji mooɗon fuu. 7 Daabaaji mooɗon e kujje ladde leydi ndiin fuu nyaama barke mayri ley hitaande ndeen.
Haala Hitaande Hokkitingol
8 Limon wakkatiiji powteteeɗi jeɗɗi ley duuɓi jeɗɗi. Ndelle jeɗɗi faa nde jeɗɗi na hawra e duuɓi 49. 9 Nyannde sappo lewru jeɗɗaɓurdu, ɗuum woni Nyalaande Mooytugol Hakke ndeen, ngaɗon fuufaango luwal nanee ley leydi mooɗon fuu. 10 Ceninon hitaande capanɗe joyaɓerde ndeen de ndimɗinon yimɓe leydi ndiin fuu. Nde laatoo Hitaande Hokkitingol. Mono fuu hewta leydi ndi jeynoo, wooɗi du hoota wuro bammum. 11 Hitaande capanɗe joyaɓerde ndeen, laatanoo on Hitaande Hokkitingol. Taa aawon, taa taƴon de ndeson ko gese mooɗon ndimani ko'e muɓɓen, wooɗi du taa ɓoron ɓiɓɓe cabiije mooɗon ɗe moƴƴinaakano. 12 Sabo wo nde Hitaande Hokkitingol, nde laatanoo on hitaande seniinde. Nyaamon ko fuɗani hoorem ley gese mooɗon.
13 Ley hitaande ndeen mono fuu hewta leydi ndi jeynoo. 14 Si aɗa sonnira bannda leydi maa aɗa sooda ndi to muuɗum fu, taa fay gooto jamboo banndum. 15 Ko coodoton e ko connoton fuu, sey kiisoroɗon coggu muuɗum fodde duuɓi bittiiɗi gaɗa Hitaande Hokkitingol faltiinde. Connoowo oon du sonna fodde duuɓi tayri keddiiɗi faa hewta Hitaande Hokkitingol waroore. 16 No duuɓi ɗiin ɗuuɗiri fuu noon coggu nguun du toowirta. No keddiiɗi ɗiin pamɗiri du fu, noon coggu nguun leeƴirta, sabo haddi duuɓi tayri keddiiɗi ɗiin coggu magga hiisortee. 17 Ndelle taa fay gooto e mooɗon jamboo banndum. Kulon Laamɗo mooɗon. Miin woni Joomiraaɗo, Laamɗo mooɗon. 18 Ɗowtanoɗon jamirooje am, njogitoɗon sariyaaji am faa njooɗoɗon e jam ley leydi mooɗon. 19 Leydi ndiin du hokkan on barke muuɗum. On nyaamowan kaaron, wooɗi du on njooɗoyto e jam.
20 Si on mbi'i: «Ɗume nyaameten ley hitaande jeɗɗaɓerde ndeen, sabo en aawataa en taƴataa?» 21 Miin Joomiraaɗo, mi jippinan barke am dow mooɗon ley hitaande jeegoɓerde ndeen faa nde rimana on tayri ko duuɓi tati. 22 Hitaande jeetataɓerde, on aawan, ammaa on keddoto oɗon nyaama tayri kiinndi faa hewta hitaande jeenayaɓerde. On nyaaman kinndi ndiin faa nde tayri hitaande jeenayaɓerde ndeen hewti.
Haala sooditagol leydi
23 Taa gese leydi ndiin connee hono ko jeytataake katin sabo wo miin jeyi ndi. Onon le, wo on weerɓe am, on jananɓe jooɗiiɓe ɗoon tan. 24 Ley leydi ndi njeyɗon ndiin fuu, kokkon connuɗo ngesam laawol sooditaade nga.
25 Si gooto mooɗon talkiɗii faa tilsanii ɗum sonnude nokkuurem fu, sakiike mum ɓurɗo ɓadaade ɗum na waawi warude sooditoo nde. 26 Si ley yimɓe makko walaa baawɗo sooditaade nokkuure ndeen de kanko e hoore makko o heɓi baawɗe hewtude nde fu, 27 o lima duuɓi ɗi o sonnirnoo nokkuure ndeen. O yoɓa joomum ko heddii fuu de o jeyta nokkuure makko. 28 Si o heɓaay ko o yoɓa joomum faa o hewta nokkuure makko ndeen du, nde heddoto e junngo cooduɗo nde oon faa nde Hitaande Hokkitingol yottii. Caggal ɗuum imo waawi yeccaade e nokkuure makko.
29 Si neɗɗo sonnii suudu ley galluure fiilnaande kokuuji fu, na waawi sooditaade ɗum haddi hitaande wootere. Si hitaande ndeen faltake fu, o waawaa heɓtude ndu katin. 30 Ammaa si ndu sooditaaka faa faltii hitaande ndeen fu, ndu laatoto jeyal cooduɗo ndu oon e ƴuwdi muuɗum faa abada. Fay si Hitaande Hokkitingol hewti, ndu wartataa e jeyal makko katin. 31 Ammaa cuuɗi gonɗi ley gure ɗe piilnaaka kokuuji ɗiin kaa, ndaardee hono wo gese leydi ndiin. Iɗi mbaawii sooditeede wooɗi nde Hitaande Hokkitingol hewti fu, ɗi kokkitee joomiraaɓe majji.
32 Lewinkooɓe kaa, na ngoodi laawol sooditaade cuuɗi gonɗi ley galluuje muɓɓen wakkati fuu. 33 Fay si Lewinke sonni suudu muuɗum de waawaay sooditaade ndu, nde Hitaande Hokkitingol hewti fu, ndu yeccoto e jeyal muuɗum. Sabo wo ɗi cuuɗi galluuje Lewinkooɓe hakkunde Israa'iila.
34 Durduɗe gonɗe piilol galluuje Lewinkooɓe ɗeen du, connataake sabo wo ɗe jeyal muɓɓen faa abada.
No talkaaɓe kaani wallireede
35 Si sakiike mooɗon talkiɗii faa hunngake ko wuurda fu, mballiron ɗum ko wuurda ɗakkol mooɗon hono no mballirton janano maa beero noon. 36 Taa mballa mooɗon oon laatoo nyamaande, wooɗi du, taa piloɗon heɓrude o tino. Kulon Laamɗo mooɗon de accon o wuura ɗakkol mooɗon. 37 Taa nyamloroɗon o buuɗi maa nyaamdu faa keɓron o tino. 38 Miin woni Joomiraaɗo, Laamɗo mooɗon, wo miin wurtini on leydi Misira faa hokka on leydi Kanaana de mi laatoo Laamɗo mooɗon.
39 Si sakiike ma gonɗo ɗakkol maaɗa talkiɗii faa sottirii ma hoore muuɗum fu, taa ngollinaa ɗum golle maccuɗo. 40 Ndaardaa o hono golloowo joɓeteeɗo maa beeranɗo ma. O laatane golloowo faa hewta Hitaande Hokkitingol. 41 Caggal ɗuum, o dilla to maaɗa kanko e ɓiɓɓe makko, o yeccoo wuro makko, leydi baabiiko. 42 Sabo wo ɓe gollooɓe am ɓe mburtinmi leydi Misira. Taa ɓe connee hono no maccuɓe connirtee noon. 43 Taa kollon o semmbe, kulon Laamɗo mooɗon.
44 Oɗon mbaawi soodoyde maccuɓe maa horɓe ley leyɗe piiliiɗe on. 45 Oɗon mbaawi du soodude ɓe ley ɓiɓɓe jananɓe jooɗiiɓe hakkunde mooɗon rimaaɓe ley leydi mon. Ɓeen laatotoo jeyal mooɗon. 46 Ɓe laatanoo ƴuwdi mon ndongu. Ɓe laatoo maccuɓe mooɗon ley nguurndam maɓɓe fuu. Ammaa sakiraaɓe mooɗon Israa'iilankooɓe ɓeen kaa, taa fay gooto mooɗon holla banndum semmbe.
47 Si janano maa beero maaɗa waɗii jawdi de sakiike maaɗa na talkiɗi faa sonniri hoorem jom jawdi oon maa neɗɗo suudu muuɗum fu, 48 laawol na woodi o rimɗinee. Gooto e sakiraaɓe makko na waawi rimɗinde mo. 49 Bappaanyo makko maa ɓii bappaanyo makko maa jeyaaɗo e lenyol makko fuu na mbaawi rimɗinde mo. Si joomum waɗowi jawdi du, na waawi rimɗinde hoore muuɗum. 50 Si noon kaa fu, sey o faamra e cooduɗo o oon de ɓe kiisoo duuɓi ɗi o soodirano e keddiiɗi fadde Hitaande Hokkitingol e hewtude. Ko yoɓetee ɗum hiisoree limgal duuɓi ɗiin fodde no golloowo yoɓirtee nyalooma fuu. 51 Si tawii na heddii duuɓi ɗuuɗɗi fu, o yoɓa ko ɗuuɗi e njoɓdi makko ndiin. 52 Si tawii duuɓi seeɗa keddii de Hitaande Hokkitingol ndeen yotto du, o hiisoo njoɓdi fodde duuɓi ɗiin de o yoɓa. 53 O laatoo hono golloowo joɓirteeɗo hitaande hitaande ɗakkol joomiiko oon. Taa cooduɗo o oon gollinira o semmbe. 54 Si tawii walaa fuu laawol no o sooditoree fu, sey o heɗoo Hitaande Hokkitingol de o hewta hoore makko kanko e ɓiɓɓe makko. 55 Sabo Israa'iilankooɓe wo gollooɓe am. Wo ɓe maccuɓe am. Miin wurtini ɓe leydi Misira. Miin woni Joomiraaɗo, Laamɗo mooɗon.