Barke ɗowtanagol jamirooje Joomiraaɗo
26
1 Taa ngaɗanon ko'e mooɗon allaaji goɗɗi. Taa ndarnanon ko'e mon tooruuji maa bimmbeeje kaaƴe wooɗi du, taa ndarnon kaaƴe sehaande ley leydi mooɗon faa cujidanon ɗum. Miin woni Joomiraaɗo, Laamɗo mooɗon. 2 Kaybanon nyalaaɗe am powteteeɗe de teddinon nokkuure am seniinde. Miin woni Joomiraaɗo.3 Si on njokkii sariyaaji am, on kaybanii jamirooje am, on ngaɗii ko mbiimi fu, 4 mi hokkan on ƴuwoole wakkati muɓɓen faa leydi funnana on nguurey de leɗɗe du ndimana on ɓiɓɓe muɓɓen. 5 On tappidataa gawri mon faa nde ɓorugol cabiije mon hewti. Wooɗi du, on ɓoridataa ɗe faa nde aawre gese mon hewti. On nyaaman kaaron, wooɗi du on njooɗoto e jam ley leydi mooɗon. 6 Mi waddan jam ley leydi ndiin. Nde ɗaaniɗon fu, faa'e warataa taƴina nesi mon. Mi fiɗɗan kujje ladde nyannguɗe fuu e leydi ndiin wooɗi du kaafaahi fuu fantataa e mayri. 7 On ndiiwan wayɓe on, mbardon ɗum'en kaafaaje. 8 Njoyo mooɗon ndiiwan hemre maɓɓe. Hemre mooɗon du, ndiiwa ujunaaje sappo maɓɓe. Kalkiron ɓe kaafaaje. 9 Mi haybanan on, mi barkina ɓeyngu mon de keewon. Mi ɗuuɗinan on de mi tabintina amaana mo ngaddumi e mooɗon oon. 10 On nyaaman gawri mon rawaniiri, wooɗi du, on mburtinan keddiindi ley beembe mon faa ngatton keyri. 11 Mi jooɗoto hakkunde mooɗon wooɗi du mi tottitataako on faa abada. 12 Mi yaadan e mooɗon, mi laatoo Laamɗo mooɗon, onon du laatoɗon yimɓe am. 13 Miin woni Joomiraaɗo, Laamɗo mooɗon, burtinɗo on leydi Misira faa taa keddoɗon on maccuɓe muɓɓen. Miin taƴi callali maccangaaku mooɗon de njoppumi on oɗon njaha on rimɓe.
Kuddi luttude jamirooje Joomiraaɗo
14 Ammaa si on kettindanaaki kam, on ɗowtanaaki jamirooje am ɗeen, 15 on paɗɗii sariyaaji am, on njeddii ko mbiimi, on ngaɗaay ko jamirooje am ɗeen fuu mbi'i, on mbonnii amaana am oon fu, 16 inan ko ngaɗowammi on:
Mi nelan masiibaaji kulɓiniiɗi e jonte bulɗe e ɗoyru kippoo on, luggina gite mon de lugoo yonkiiji mooɗon. On aawanan ɓolum sabo wayɓe mon nyaamata barke gese mooɗon. 17 Mi ummanto on de wayɓe mon njaaloo on. Wanyuɓe on ɓeen ndawranan on de ndoggon fay si on ndiiwaaka.
18 Si fay e noon fuu on njaɓaay hettindanaade kam fu, mi ɓeydan eeltugol on ngool kile jeɗɗi saabe hakkeeji mooɗon ɗiin. 19 Mi helan baawɗe ɗe mawninkinortoɗon ɗeen. Mi yoornan kammu dow mooɗon hono njamndi ɓaleeri de mi teeŋina leydi mon ndiin du hono njamndi mboɗeeri. 20 On tampan dow ɓolum sabo leydi mooɗon funnataa nguurey, leɗɗe mayri du ndimataa katin.
21 Si on keddake e wanyude kam, on njaɓaay hettindanaade kam fu, mi fiiran on torraaji kile jeɗɗi katin saabe hakkeeji mooɗon ɗiin. 22 Mi neldan on kujje ladde nyannguɗe, ɗe mbara sukaaɓe mooɗon, ɗe nyaama daabaaji mooɗon de mi ɓuyta on faa laawi mooɗon njeewna.
23 Si e eeltugol ngool fuu, on njaɓaay hettindanaade kam, oɗon keddii e lunndaare fu, 24 miin du, mi hollan on nganyaandi am. Mi fiyan on kile jeɗɗi saabe hakkeeji mooɗon ɗiin. 25 Mi neldan on kaafaahi njomnitantooki amaana am oon. Nde kawritinɗon ley galluuje mooɗon fuu, mi neldan on nyawu mbonngu ndaaɓoowu, wooɗi du, mi wattan on e juuɗe wayɓe mon. 26 Mi neldan on rafo faa rewɓe mon sappo ngaɗana on buuru ley duppirde wootere. Ɓe ponnda ɗe de ɓe ngaddana on. On nyaaman ɗe de on kaarataa.
27 Si e ɗuum fu, on kettindanaaki kam, oɗon keddii e lunndaare fu, 28 miin du, mi hollan on nyanngere am nyaaɗunde. Mi jukkoto on jukkungo ɓurngo arandeeji ɗiin fuu naawude kile jeɗɗi, saabe hakkeeji mon ɗiin. 29 On nyaaman teewu ɓiɓɓe mon worɓe de moɗon teewu ɓiɓɓe mon rewɓe. 30 Mi halkan nokkuuje mooɗon cakkirɗe, mi lallinan cakkirɗe mon ure de mi dekondira ɓalli mon dow tooruuji mooɗon kalkaaɗi ɗiin faa laatoɗon ko nyiddinii yeeso am. 31 Mi waɗan galluuje mon laatoo bille. Mi fusan nokkuuje mon ceniiɗe. Mi hettintaako uurngol sadakaaji mon belngol ngool katin. 32 Miin e hoore am mi waɗan leydi ndiin laatoo winnde faa haaynde nannga wayɓe mon jooɗoytooɓe e mayri ɓeen. 33 Mi sankitan on hakkunde lenyi goɗɗi. Mi riiwiran on kaafaahi. Leydi mon halkete de galluuje mon laatoo bille.
34 Ndeen leydi mon ndiin heɓan powtiri haddi duuɓi ɗi ngonoyton leydi wayɓe mon ɗiin fuu. Ndi fowtan faa kitaale powtiri mayri ɗeen kiɓɓa. 35 Ley duuɓi yeeweende ɗiin fuu, leydi ndiin heɓan powtiri ndi hebaayno ley duuɓi ɗi njooɗinoɗon e muuɗum ɗiin.
36 Heddiiɓe e mooɗon ɓeen du, mi wattan kulol manngol e ɓerɗe muɓɓen ley leydi wayɓe mooɗon toon. Fay sonnyo haakolowol caamoowol waɗan ɓe ndiwna, ɓe ndogga hono riiwirteeɓe kaafaaje de ɓe mboɓɓoo fay si ɓe ndiiwaaka. 37 Ɓe pergondiran hono riiwirteeɓe kaafaaje, tawaa faa'e walaa gaɗa maɓɓe. On mbaawataa daraade yeeso wayɓe mon katin. 38 On kalkan hakkunde lenyi janani. Leydi wayɓe mon moɗan on. 39 Hedditiiɓe e mooɗon ɓeen kalkowan ley leyɗe wayɓe on toon saabe hakkeeji muɓɓen e ɗi maamiraaɓe muɓɓen.
40 Ndeen ɓe kaaltan hakkeeji maɓɓe e ɗi maamiraaɓe maɓɓe e jambaaji ɗi ɓe ngaɗi yeeso am e no ɓe lunndorii kam. 41 Miin du, mi hollan ɓe nganyaandi am, mi yaaran ɓe leydi wayɓe maɓɓe. Nde ɓerɗe maɓɓe mawninkininooɗe ɗeen ngarowi kecciɗi de ɓe njoɓi hakkeeji maɓɓe ɗiin fu, 42 mi miccitoto amaana mo ngaddunoomi e Yaakuuba e Isiyaaka e Ibrahiima. Mi miccitoto leydi maɓɓe ndiin. 43 Ɓe ndillan ɓe njoppa leydi ndiin faa ndi heɓa kitaale powtiri ley duuɓi ɗi ɓe ndillata e mayri ɗiin fuu. Ɓe njoɓan hakkeeji maɓɓe ɗiin sabo ɓe paɗɗii jamirooje am, ɓe kafake sariyaaji am.
44 Ammaa fay nde ɓe njaaraa leydi wayɓe maɓɓe, mi tottitataako ɓe, mi wanyataa ɓe faa yottanoo kam timminde ɓe ɓe fuu e bonnude amaana mo ngaddunoomi e maɓɓe oon. Miin woni Joomiraaɗo, Laamɗo maɓɓe. 45 Mi miccitoto amaana am mo ngaddunoomi e maamiraaɓe maɓɓe, ɓe mburtinnoomi leydi Misira e gite lenyi goɗɗi faa mi laatoo Laamɗo muɓɓen ɓeen. Miin woni Joomiraaɗo.
46 Ɗee ngoni jamirooje e sariyaaji e kiite ɗe Joomiraaɗo hokki Israa'iilankooɓe dow waamnde Sinayi e hunnduko Muusaa.