Jamirooje dow aadiiji
27
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe mbi'aa ɗum'en: Si neɗɗo na anniyii hokkude Joomiraaɗo ɓii Aadama fu, wadda ko joomum haani sonneede. Inan no hokkirtee:
3 Gorko mo duuɓi 20 yaade 60 wo buuɗi cardi 50 fodde ponndirɗe nokkuure seniinde.
4 Si wo debbo du buuɗi cardi 30.
5 Suka mo duuɓi 5 yaade 20, si wo gorko fu, buuɗi cardi 20. Si wo debbo du, buuɗi cardi 10.
6 Ƴuude mo lewru wooturu yaade mo duuɓi joy, si wo gorko fu, buuɗi cardi joy, si wo debbo du buuɗi cardi tati.
7 Mo duuɓim kewti 60 yaade yeeso, si wo gorko fu, buuɗi cardi 15. Si wo debbo du, buuɗi cardi 10.
8 Si tawii anniyiiɗo hokkude ɓii Aadama oon wo talka, waawaa waddude njoɓdi ndiin fu, sey wadda neɗɗo oon yeeso almaami. Almaami taƴa coggu makko fodde baawɗe podiiɗo hokkude o oon.
9 Si tawii wo daaba baawɗo sakkaneede Joomiraaɗo fu, o laatoo ceniiɗo. 10 Daaba oon wattitataake. Daaba lobbo loomtintaake bonɗo, bonɗo du loomtintaake lobbo. Si tawii joomum tilay wattita daaba oon fu, kanko e batteteeɗo oon fuu laatoto ceniiɗi. 11 Si tawii wo daaba mo laaɓanaa sakkaneede Joomiraaɗo, ko o laati fuu, sey joomum wadda o yeeso almaami. 12 Almaami taƴa coggu makko fodde no o wooɗiri maa no o boniri. No almaami oon hokkiri coggu makko fuu wo noon o yoɓirantee. 13 Si joomum na haajaa sooditaade o fu, sey ɓeyda e coggu makko nguun mbuuɗu ngootu dow buuɗi joy fuu.
14 Si neɗɗo seninii suudu muuɗum faa sakkana Joomiraaɗo fu, almaami ndaaran yalla ndu lobburu naa ndu bonndu. No almaami taƴiri coggu mayru fu, wo noon ndu yoɓirantee. 15 Si joomiiru muuyti sooditaade ndu fu, sey ɓeyda mbuuɗu ngootu dow buuɗi joy fu de ndu warta e jeyal muuɗum.
16 Si neɗɗo seninii ngesa muuɗum ngoota faa sakkana Joomiraaɗo fu, coggu magga hiisoree e ko waawi aaweede e magga: kilooji sa'iiri 300 fuu wo buuɗi cardi 50. 17 Si tawii wo ley Hitaande Hokkitingol ngesa ngaan seninaa du, nga sonnee ko nga waawi heɓude fuu. 18 Si wo gaɗa hitaande ndeen o senini nga du, almaami hiisoo coggu magga fodde duuɓi keddiiɗi faa hewta Hitaande Hokkitingol waroore de coggu nguun ɓuytee. 19 Si joomiiga na haajaa sooditaade nga fu sey ɓeyda mbuuɗu ngootu dow buuɗi joy fuu de jeyta nga. 20 Si o sooditaaki nga faa nga sonniraama goɗɗo fu, o walaa laawol sooditaade nga katin. 21 Ndelle nde Hitaande Hokkitingol hewti fu, nga laatoto jeyal Joomiraaɗo ceniingal. Wo nga ngesa cenndanaanga Joomiraaɗo faa abada. Almaami'en njeyta nga. 22 Si neɗɗo seninanii Joomiraaɗo ngesa nga soodi, tawi wanaa ndonaanga fu, 23 almaami taƴa coggu magga fodde duuɓi keddiiɗi faa hewta Hitaande Hokkitingol waroore de joomum yoɓa buuɗi ɗiin nyannde ndeen. Buuɗi ɗiin wo ceninanaaɗi Joomiraaɗo. 24 Nde Hitaande Hokkitingol ndeen hewti fu, nga yeccoo e junngo joomiiga arano oon. 25 Cogguuji fuu na taƴe fodde ponndirɗe nokkuure seniinde. Mbuuɗu cardi ngootu fuu teddeefi muuɗum wo garamuuji 10.
26 Fay gooto walaa laawol seninande Joomiraaɗo awru daabaaji muuɗum sabo ko laatii awru fuu wo jeyal Joomiraaɗo. Awru nagge e dammucce fuu wo Joomiraaɗo jeyi. 27 Si tawii wo awru daaba mo laaɓaa fu, joomum na waawi sooditaade ɗum ammaa sey ɓeyda mbuuɗu ngootu dow buuɗi joy fuu. Si o sooditaaki daaba oon du, o sonnee fodde ko coggu makko taƴaa. 28 Huunde fuu ko neɗɗo senndani Joomiraaɗo e ley jeyal muuɗum waawaa sonneede maa teeteede. Nde wo tagaaɗo maa daaba maa leydi, ko laatii fuu teetataake sabo ko senndanaa Joomiraaɗo fuu na senii sanne. 29 Fay si wo ɓii Aadama senndanaa Joomiraaɗo, joomum waawaa rimɗineede faa abada. Sey waree.
30 Jakka nyaamri, ko taƴetee e gese e ɓiɓɓe leɗɗe leydi ndiin fuu wo Joomiraaɗo jeyi. Wo ko senanii Joomiraaɗo. 31 Si neɗɗo na haajaa sooditaade goɗɗum e jakka muuɗum fu, sey ɓeyda mbuuɗu ngootu dow buuɗi joy e ceede jakka oon. 32 Ko laatii sappoɓerde ley na'i maa dammucce fuu senndanee Joomiraaɗo. 33 Filataake faameede yalla daaba oon wo lobbo naa bonɗo, wooɗi du o loomtintaake. Si tawii joomum tilay wattita daaba oon fu, kanko e batteteeɗo oon fuu ɗi laatoo ceniiɗi. Ndelle ɗi mbaawaa sooditeede.
34 Ɗee ngoni jamirooje ɗe Joomiraaɗo hokki Israa'iilankooɓe e hunnduko Muusaa dow waamnde Sinayi.