Yesu n'asok bike iŋ'ite erimaas ite Esuwif i
6
Hike hunak,
*t'erimaas ite Esuwif i,
Yesu n'aŋaas ti kitaaŋaat ku ti kawañe dike doon aŋ'a̱juk kite maanu.
Eriboora yeene n'iŋi kahat te do,
keefoofoyoor do tu sumoŋiiin,
abe ni kateŋa.
2 Bakaake *t'Efarisiyeŋ i kéeyemie ku toko ni kaaniin:
—Héyi!
Aruun bokondu ti káhinu doon d'Eluwa yite y'úne eteñekee du an áhin tu hunak hite erimaas i.
3 Yesu n'aaniin:
—Eeman kereŋ arijaŋgajaŋga bi *Dafit áhine bu,
akina ni bakano,
hu bujoñjol bujokiin hu?
4 Ayoosayooso *t'Anuuf ite Káafimboor ku,
n'áyitin kumburu keebelee ku bija t'Atambatun eeteŋ,
abe n'awun bakanob.
Abe bare t'Eluwa yite y'úne,
kawarut ko yéeni kateŋu.
*Esaraha i taŋ kaware fu ko kateŋu. c
5 Yesu n'asooñ aaniin:
—*Añi ute Húŋgowulan hu akino fu erimaas i.
Yesu n'áhin ániine ite emoŋu yéetime i éekoyi
6 T'eke erimaas yooŋ ite Esuwif i,
Yesu n'ayooso ti *báalawum booniin,
abe n'áyemi toko ti kaliiken ésuk i mite m'Atambatun.
Ake ániine ámoomi toko,
átimatim t'emoŋu yaatos i.
7 *Émuse yite Eluwa yite Moyis,
*n'Efarisiyeŋ i ni kajondoman ti Yesu,
keejuk man akina káhinu ániine u éekoyi tu hunak hite erimaas i,
ábuki kámaŋamaŋi kaŋesu húkuuseima kaanuku keeja keerej.
8 Bare Yesu ámoomi béeyemie bu ti kikawiin.
N'aane ániine ite emoŋu yéetime i:
—A̱rito a̱asiiŋo fee t'etut diye.
—Íikandijenuun bonde:
naŋ n'Eluwa yite y'úne esoke fu?
Naŋ n'úware fu káhinu t'erimaas i:
meejake,
man yooŋ meejakut?
Kafakan húŋgowulan,
man yooŋ kayoolio?
10 N'áheeliniin kareyi fe abe n'aane ániine u:
—A̱raaw emoŋii.
Ániine u n'araaw yo,
náami ékoyia,
ebatikaa naane hítiyar hu.
11 Émuse yite Eluwa i,
n'Efarisiyeŋ i ni kayiŋat kahooj bib.
Ni káhaminoor keejuk buŋ bi kaja fu ni Yesu.
Yesu n'ajifan eriboora kaamo sumoŋu ni bákasuba
12 Hike hunak,
Yesu n'asiro ti hirij kaanuku eelaw.
N'áriikein bo huhuk hu fe ti kalawu Atambatun.
13 Tifiita,
n'aruw eriboora yeene,
abe n'ajifan tu boko kaamo sumoŋu ni bákasuba.
N'awuniin huruwu hite *epotor.
14 Boko kaamo fu bokonde:
Simoŋ (Yesu n'awuno husokoroor hite Piyeer) n'at'o Andere,
Saak ni Saaŋ,
Filip ni Bartelemi,
15 Májiye ni Taamas,
Saak añi ite Alfe ni Simoŋ (akina,
boko kaamo fu t'étuum i iŋ'ite ésuk yeeniin),
16 Suda añi ite Saak nu Suda Iskariyot,
eeja u kajoohen Yesu.
Jésus Choisit Ses Disciples
Yesu n'awaare hahooja hu, abe n'aritan kéesomute ku
17 Yesu n'áwanein *n'epotor i bibin t'etaam hirij hu.
Bakan keehooje-hooj t'eriboora yeene bakaaku kámoomi toko.
N'asiiŋo.
Hahooja húmoomi yooŋ toko,
héenuutina tu búsuk bite *Súde,
ni Serusalem,
nu tu búsuk bite Tiir ni Sidon,
beeemo bu inde *han hu.
18 Kabinabin kaanuku keejamatano,
abe n'aritan yooŋ kéesomute ku.
Ki sirab su sujoke ku,
ni kákoyi yooŋ.
19 Ésuk i fe iŋi kaŋes kaanuku keegoro,
ábuki sembe uŋu sunuut te o séehiniin kéekoyi.
Katoofu ku ni kátaañi ku
20 Yesu n'áheelin eriboora yeene abe n'aane:
—Atoof t'aruun keebajut ku doon fe,
ábuki aruun arikino fu *Jáyi jite Atambatun!
21 Atoof t'aruun keejoñjolate ku hahiye,
ábuki aruun bibin kabiru bib!
Atoof t'aruun keeyiy ku hahiye,
ábuki aruun bibin kásuwu!
22 «Atoof t'aruun kane ésuk i kahuufuun,
káfiitenuun,
kálafatinuun,
abe ni kábuj kuruwu koonuun aŋarkeyi aŋ'arisa *Añi ute Húŋgowulan hu ti hiñaawu!
23 Arikontaan kane bondu bibaj,
abe n'ariyokoñ,
ábuki hisiibanu hómbokun hondu ti kanahanuun t'etiir.
Áribaŋino kaanuku iyu yooŋ i sifaafiin ifi káhinaani *eyiŋana yite Atambatund.
24 «Bare átaañi t'aruun kusaanum ku,
ábuki ariheeka ariibaj katoofu koonuun!
25 Átaañi t'aruun keebire ku hahiye,
ábuki aruun bibin kajoñjolat!
Átaañi t'aruun kéesuw ku hahiye,
ábuki aruun káyemi ti kátaañi,
abe aruun kayiyu!
26 «Átaañi t'aruun kane ésuk i fe kasokorooruun,
ábuki iyu i sifaafiin ifi káhinaani kiŋki kajuus kaane boko kaamo eyiŋana yite Atambatun!
Les Béatitudes
Úmaŋi bakan keehuufe ku úne
(Májiye 5.38-48; 7.12a)
27 —Bare aruun keejamatan kee n'íñje,
iisokuun bonde:
árimaŋi enatoora yeenuun,
abe keehuufuun ku,
n'árihiniin meejake.
28 Árisoniyan kiŋki kañaanuun beejakut,
abe n'arilaw bija ti kiŋki káhihinooruun.
29 An af'ámiñi ti kaarofaŋ,
a̱waso yooŋ éemiñi ti kaaku.
An n'aram éfartuus íiwe,
a̱waso yooŋ eeyit kájufa kíhindaa ku.
30 An eelawi dike doon,
a̱wuno;
abe an n'ayiti doon,
atum'a̱ano abatikani do.
31 Árihin bakaaku buroon b'árimaŋie bu káhin bija t'aruun.
32 «Af'árimaŋi bakan kéemaŋiuun ku barebare,
aŋ'ariyinoor ti kikawuun n'ariene Atambatun kasiibanuun?
Humuum hite ehoofoora i iŋi kámaŋi bakan kéemaŋiiin ku!
33 Abe arko bakan kiŋki káhinuun meejake k'af'árihin meejake barebare,
aŋ'ariyinoor ti kikawuun n'ariene Atambatun kasiibanuun?
Humuum hite ehoofoora i iyu ifi káhin!
34 Abe arko bakan ku bukuuruun ku kaanuku boko kabatikanuun k'af'arimaagen barebare,
aŋ'ariyinoor ti kikawuun n'ariene Atambatun kasiibanuun?
Humuum hite ehoofoora i iŋi kamaagenoor kaanuku keebin keebatikanee doon di kamaagene du!
35 N'afin áami aruun,
árimaŋi enatoora yeenuun,
abe n'árihiniin meejake.
Arimaageniin yooŋ,
abe n'arinuutan toko siheluun.
Af'árihiniin iyu,
aruun kabaju hisiibanu hómbokun,
abe n'aŋ'áriyemi biñi bite Atambatun eeemo u t'etiir-t'etiir.
Ábuki ajakajak ti kéeenaariit ku eyeehen,
ni kéenafute ku.
36 Faaf úne ajakajak faa t'ésuk i ereyi fe.
Arijak yooŋ naane akina.
Le Sermon sur la Montagne
Atum'arijoonan kúŋgowulan ku
37 —Atum'arijoonan an,
abe Atambatun yooŋ at'ajoonanuun.
Atum'aritinan an,
abe Atambatun yooŋ at'atinanuun.
Ariboŋket bakaaku,
abe Atambatun n'aŋ'aboŋketuun.
38 Ariwun bakaaku,
abe Atambatun n'aŋ'awunuun.
O kawunuuun tu kuboote koonuun kuhooj bib ni baataayaay.
Ti kinij koonuun t'Atambatun aja fu kaneefan eenij yooŋ t'aruun.
39 Yesu n'asooñ asokiin beekolofanee bonde:
—An éefuume ayinaat bija n'áwiyo an éefuume éewufooro bítim bu,
bare me?
Káhinu iyu,
n'iŋi kaney t'ésubaiin fe ti kaayeen.
40 Abajut aliikena eehaŋe ámuse oone.
Bare aliikena eeliikene dómbokun,
o káyemi naane ámuse oone.
41 «Buŋ b'a̱yino fu kajuku kaahos keeemo ku ti díkin dite atii,
abe a̱finut a̱juk egol yeeemo i tu dúuwe du?
42 Buŋ b'a̱yino fu kaanio:
“Átoom,
a̱bin iinuutani kaahos kondu keeemo ku ti díkini”,
awe eejukut u egol yeeemo i tu dúuwe du?
Batuuk bondu!
A̱jab tíme a̱nuutan egol yeeemo i ti díkini,
n'aŋ'a̱tik á̱yini kajuku áwariee a̱anuutano kaahos keeemo ku tu doone du.
Nunukanuk ni miriyaay mite te no
43 —Nunukanuk neejake ábukaariit miriyaay meejakut,
abe nunukanuk neejakut ábukaariit miriyaay meejake.
44 Nunukanuk aŋ'akeetanee ti miriyaay mite te no.
Múniyo,
an átujaariit kimaŋgara ti ñisisa,
man yooŋ bihemb ti ñisejend.
45 Húŋgowulan heejake aŋ'asok buroon beejake aŋarkeyi naane biyinoor beejake beemo fu ti hikawo.
Bare húŋgowulan heejakut aŋ'asok buroon beejakut aŋarkeyi naane biyinoor beejakut beemo fu ti hikawo.
Ábuki butum bu ufu búnuutann biyinoor beeemo bu tu búwejet bu.
Beekolofanee bite enuta i bákasuba ku
46 —Iŋi naŋ n'af'ariboo kaaniam:
«Anahaan u,
Anahaan u»,
abe árihinaariit bimb'isokuun?
47 Kame árimoomi an eebine t'íñje,
eejam báhamin búuma,
abe n'áhin naane isoke i bo,
ne naŋ n'aliikee fu?
48 Aliikeeliik naane an eeemo tu kunut.
N'awak ásuli ayak abin áami areeŋa elaaliñj,
n'ájabin toko kunut ku.
Kaasiiŋ ku kibina,
móhujo mite ejolob i ni míteyin bibin t'enuuf yendu,
bare miyinaat káfiiten yo,
ábuki esiiŋaneesiiŋan ayanee.
49 Bare an eejame báhamin búuma,
abe áhinut naane busoke i,
aliikeeliik naane an eenute enuuf t'ajabut awak.
Hu móhujo mite ejolob i mireeŋe hu yo,
toko-toko yooŋ n'eney:
étumb ébujarooro fe.