Hirim Heetoofe hu hi Mark akiñje hu
Béekinineŋe bu kaawiit konde ni kikiñjee
Diye Hirim Heetoofe hu hi Mark akiñje hu. Mark anooto *apotor ite Yesu, bare ariboorariboor nu Pool, arokarok yooŋ ni Piyeer. Mánoman b'akiñje bu ti kaawiit konde, ajamajam bo ti Piyeer o ti kawaare ésuk i buroŋ bite Yesu *Kiris t'etaam ye. Akiñjakiñj bo bija ti keenooto ku Esuwif, éewufooriin kaanuku múniyo Yesu aamo fu Añi ite Atambatun.
Atambatun aanaan ti *Míkiñjin mu o káboñina ake eebin eeram bakate ku *Israyel keeemo ku bakan koone. Hi Yesu abine hu t'etaam ye, bakate ku *Rom káayoosein Israyel keeram etaam yeeniin, kasooñen n'iŋi káhiniin keejam tu boko. Israyel n'iŋi kaane man Kiris a Atambatun aane u o káboñina aja fu karamiiin ti bakate ku Rom. Bare kafakan kóndiiit ki Yesu abine fu. Afakanafakan kep bakan keewase ku Setani, nu wuhoofoor wu kéejeŋgino akina humuumo.
Mark asokasok ti kaawiit konde naŋ ni Yesu áhine fu t'etaam ye, ni naŋ n'aliikene fu ésuk i, bija eket yeene fe, ni bíriteina boone. Yesu aŋ'awaare ésuk i ayan faŋ, n'aritan kéesomute ku, n'ákutoor sirab su, abe n'áhin buroon beehooje beehaŋe ésuk i kikaw. Bare naane Yesu aamo i Añi ite Atambatun fe, ayitooreit. Ábuki «*Añi ute Húŋgowulan hu humuumo abinut kaanuku eebaj búsukateen, bare kaanuku éeyemi ásukateen, abe n'awun buroŋ boone beejaam man keehooje ni kafak.» (Mark 10.45).
Kéegilane ku ti bítim bite Esuwif i ni kateñekoo, kasooñen ni kayoolo. An fe eese Yesu ti hiñaawu awarawar bifare kajuku sílaam, bare búmuje boone katoofu.
Kaawiit ki Mark akiñje ku, iye i kije fu:
1) Kawaare kite ku Sambatiis (1.1-8)
2) *Kaboste kite Yesu, ni naane Setani aŋeso i káhinu eehoofoor (1.9-13)
3) Yesu n'aja awaare t'ésuk ite *Gálile (1.14-9.50)
4) Yesu n'anuut Gálile eeja eewaare Serusalem (10.1-52)
5) Kunak kiraanu kite ku Yesu t'etaam ye: kajoonan koone, n'eket yeene (11.1-15.47)
6) Yesu n'arito t'eket i (16.1-8)
7) Yesu n'áŋaasin t'eriboora yeene (16.9-20)