Májiye i

Hirim Heetoofe hu hi Májiye akiñje hu

Béekinineŋe bu kaawiit konde ni kikiñjee

Diye Hirim Heetoofe hu hi Májiye akiñje hu. Májiye aamo fu asaa ite búhal bu i Yesu aruwe u, éehino éeyemi ariboora oone. Májiye boko kaamo fu *epotor i ki Yesu aboñe ku aaniin kaja kawaare Hirim Heetoofe hu, abe ni kasiiŋan hikarjenaate hu.

Asokasok ti kaawiit konde naane Yesu abukee i, ni naŋ yooŋ n'áhine fu t'etaam ye, ni naŋ n'aliikene fu ésuk i, bija eket yeene fe, ni bíriteina boone t'eket i. Yesu aŋ'awaare ésuk i ayan faŋ, n'aritan kéesomute ku, n'ákutoor sirab su, abe n'áhin buroon beehooje beehaŋe ésuk i kikaw.

Májiye akiñjakiñj Hirim Heetoofe honde bija ti bakano Esuwif i, éewufooriin kaanuku múniyo Yesu aamo fu *Afakana u e *eyiŋana yite Atambatun kasoŋke u busok moone mu ti *Míkiñjin mu. Abe beesokee bu te o fe o t'abinoorut t'etaam ye, múniyo bibinabina bibaj. O aamo fu áyi u eeware u bibin. Bo bíkinineŋe fu keehooje n'iŋi kawas huruwu hoone keeeno «*Añi Dafit», ábuki *Dafit aamo fu áyi ómbombokun ite u bakate ku *Israyel, keeemo ku bakan k'Atambatun ákinie ku. Bare naane Yesu áwufoore i bakate ku Israyel bite bu *Jáyi jite Atambatun fe, eseef yeeniin kumuumiin kateñekoo fu. H'abine hu áami Yesu aketa ayak áritein t'eket i, n'aane eriboora yeene kañaahoor t'etaam i iŋi kakaro kawaare ésuk i fe Hirim Heetoofe hu.

Kaawiit ki Májiye akiñje ku, iye i kije fu:

1) Noota nite Yesu *Kiris, ni kabukiee koone (1.1-2.23)

2) Kawaare kite ku Sambatiis (3.1-12)

3) *Kaboste kite Yesu, ni naane Setani aŋeso i káhinu eehoofoor (3.13-4.11)

4) Yesu n'aja awaare t'ésuk ite *Gálile (4.12-18.35)

5) Yesu n'anuut Gálile eeja eewaare Serusalem (19.1-20.34)

6) Kunak kiraanu kite ku Yesu t'etaam ye: kajoonan koone, n'eket yeene (21.1-27.66)

7) Yesu n'arito t'eket i (28.1-20)