Hirim Heetoofe hu hi Luk akiñje hu
Béekinineŋe bu kaawiit konde ni kikiñjee
Diye Hirim Heetoofe hu hi Luk akiñje hu. Luk anooto *apotor ite Yesu, bare ariikariiko ni bakan keeriboore ni Yesu, eejab éekandijeniin naane buroŋ bite Yesu bije i biyak bukuuro but. Ahaban, n'akiñj kaawiit konde bija t'ake iŋi kaano Téwofil. Luk asontena, abe ariboorariboor n'apotor u Pool keehooje-hooj. Ti keekiñje ku *Míkiñjin mu fe, unoono taŋ anooto fu toko Asuwif. Bare asokasok naane ejoosan ite Esuwif i eje i, kaanuku man bakano ni kámeyi jak aañ aamo fu Yesu.
Luk asokasok aane Esuwif i kámoomi ti kanahan áyi u eeja u kafakan kooniin. O aamo fu *Afakana u e *eyiŋana yite Atambatun kasoke u ti Míkiñjin mu kaane Atambatun káboñina. Atambatun ámoomi kaanuku Afakana u afut'áyemi, n'aŋ'áami úne kúŋgowulan ku fe bakan kéetowutee. N'áboñin Añio afeeneŋ u eebin eefakan kéeyilene ku te o fe, bakate eheet yánoyan. Añi ondu aamo fu Yesu *Kiris.
Luk asokasok ti kaawiit konde naane Yesu abukee i, ni naŋ yooŋ n'áhine fu t'etaam ye, ni naŋ n'aliikene fu ésuk i, bija eket yeene fe, ni bíriteina boone t'eket i. Yesu aŋ'awaare ésuk i ayan faŋ, n'aritan kéesomute ku, n'ákutoor sirab su, abe n'áhin buroon beehooje beehaŋe ésuk i kikaw.
Luk akiñjakiñj yooŋ kike kaawiit kúsooboriyan: ko keemo fu «Burok bite epotor i». Asokasok te ko beebaje bu epotor i huta hu Yesu aŋ'abin ayitee t'etiir bufor bu, nu buŋ bi hikarjenaate hu hijabe fu huyooso tánotan.
Kaawiit konde ki Luk akiñje ku, iye i kije fu:
1) Béekinineŋe bu Luk n'akiñj kaawiit konde (1.1-4)
2) Naane Sambatiis ni Yesu kabukee i (1.5-2.52)
3) Kawaare kite ku Sambatiis (3.1-20)
4) *Kaboste kite Yesu, ni naane Setani aŋeso i káhinu eehoofoor (3.21-4.13)
5) Yesu n'aja awaare t'ésuk ite *Gálile (4.14-9.50)
6) Yesu n'anuut Gálile eeja eewaare Serusalem (9.51-19.27)
7) Kunak kiraanu kite ku Yesu t'etaam ye: kajoonan koone, n'eket yeene (19.28-23.56)
8) Yesu n'arito t'eket i (24.1-12)
9) Yesu n'áŋaasin t'eriboora yeene, abe n'ayitee t'etiir bufor bu (24.13-53)