Hirim Heetoofe hu hi Saaŋ akiñje hu
Béekinineŋe bu kaawiit konde ni kikiñjee
Diye Hirim Heetoofe hu hi Saaŋ *apotor u akiñje hu. Asokasok ti kaawiit konde naŋ ni Yesu áhine fu t'etaam ye, ni naŋ n'aliikene fu ésuk i, bija eket yeene fe, ni bíriteina boone t'eket i. Yesu aŋ'awaare ésuk i ayan faŋ, n'aritan kéesomute ku, n'ákutoor sirab su, abe n'áhin buroon beehooje beehaŋe ésuk i kikaw.
Kaawiit ki Saaŋ akiñje ku kunokoorut esaan-saan nu wute wu Májiye, ni Mark, nu Luk. Mánoman Saaŋ aanaan bakan k'akiñje ku kaawiit konde kámoomi wuwiit wondu, ni naŋ ni Yesu asoke fu te wo, ni naŋ yooŋ n'áhine fu. Iŋ'ite ho h'asokut fu te ko bi Májiye, ni Mark, nu Luk kasoke bu tu wooniin wu.
Saaŋ asokasok ti kájabina kite kaawiit konde aañ aamo fu Yesu. Asokasok kaanuku Hirim hite Atambatun hibine fii t'etaam ye héeyemi húŋgowulan. Yesu áhinahin buroon úkaan beehaŋe ésuk i kikaw, man nu bukuuriin kaanuku akina aamo fu Áyi u a Atambatun asoŋke u bijifan, aane o aja fu kafakan ésuk i.
Kóyin Yesu, ésuk i éwaajinoorawaajinoor: bakaake káyilenayilen ti Yesu, ábuki bukuuriinkuur kaanuku akina aamo fu Añi ite Atambatun. Bakaaku ni kafin kahuufo, kaane am aamo an ite Setani, aŋ'álafatin Atambatun, abe awareewar kayoolu.
Saaŋ asokasok aane: «Beeemo bu ti kaawiit konde bikiñjeekiñj kaanuku man n'áriyilen kaanuku Yesu aamo fu *Afakana u, Añi ite Atambatun. Abe af'áriyilen te o, n'aŋ'aribaj te o buroŋ bu.» (Saaŋ 20.31).
Kaawiit ki Saaŋ akiñje ku, iye i kije fu:
1) Kasalu kite Yesu, eeemo u hirim hite Atambatun (1.1-18)
2) Kawaare kite ku Sambatiis (1.19-34)
3) Yesu n'ajifan eriboora yeene étiyar i (1.35-51)
4) Yesu n'áhin kireeŋ hutok nu kúsuba beehaŋe ésuk i kikaw (2.1-12.50)
5) Kunak kiraanu kite ku Yesu t'etaam ye: kajoonan koone, n'eket yeene (13.1-19.42)
6) Yesu n'arito t'eket i (20.1-10)
7) Yesu n'áŋaasin t'eriboora yeene (20.11-21.25)