Yesu n'áritein t'eket i
16
*H'erimaas ite Esuwif i eje hu ayak abin áami ehabanaa,
Mari ite u Magdala,
ni Salome,
ni Mari íñaay ite Saak ni kajoohen mátiso kaanuku keebin keehundan ehunuŋ ite Yesu.
Mark 16.1-20
2 Hunak héeseina hu *t'erimaas ite Esuwif i,
ni kaja t'élum i nu bújom bu,
taanak tu ti kánuutina.
3 Boko ti bija bu iŋi kaanoor:
—Aañ fíya aja fu úne kanuutan ejuju yéefibe i karuŋ ku?
4 Bare hi káheeline hu t'etiir,
ni kajuk kaanuku ejuju i etiŋgeetiŋg,
yendu eraab efeeneŋ.
Abe bare yómbombokun.
5 Ni kayooso t'élum i,
ni kajuk ake ahaawa eesole kájufa kéeyuuse keefañje t'ariikee inde baatos.
Ni kákoleyi naane.
6 Bare n'aaniin:
—Atum'árikoleyi.
Ímoomi kaanuku Yesu ite u *Nasaret eeyoolee u *t'ekuruwa i a ariŋes fii.
Anooto diye,
aritaa t'eket i.
Arijukut,
diye ti kahoko fu yéeni.
7 Hahiyu arija ariene Piyeer ni bakaaku eriboora:
«Ágilanuun toko bija *Gálile.
Bo b'arija fu kajukio naane asokuun ia.»
8 Haare hu ni kánuutin t'élum i abe ni katey,
iŋi kakaro kábit,
káajahalein naane.
Kasokut an doon fe,
ábuki kákolakoleyi.
___________________________________________
[Siferse su 9 bija 20 sunooto tu wuwiit wútiyar wu.]
Mari ite u Magdala n'ajuk Yesu
9 Hi Yesu áriteina hu t'eket i nu bújom bu bib tu hunak héeseina hu *t'erimaas ite Esuwif i,
ajabajaba áŋaasin féet ti Mari ite u Magdala,
a abine u ákutoor te o sirab hutok nu súsuba su.
10 Mari n'afin aja asok bo kéeyemie ku ni Yesu.
Boko ti kátaañi kómbokun,
abe iŋi kayiy kep.
11 Bare h'asokiin hu keejam kaanuku Yesu ondu tu buroŋ,
áheelinaheelin yooŋ te o,
káyilenuto.
Eriboora bákasuba ni kajuk Yesu
12 Hunuut toko,
bákasuba t'eriboora i ni káyemi ti bija inde kitaaŋaat ku.
Yesu n'ahosanooro éeŋaasin tu boko.
13 Ni kábatikein,
abe ni kasok bo bakaniin bakaaku,
bare káyilenutiin yooŋ.
Yesu n'áŋaasin t'eriboora i sumoŋu n'afeeneŋ u
14 Yesu n'atik áŋaasin t'eriboora i sumoŋu n'afeeneŋ u,
boko tu buñoofo.
N'akamoor tu boko naane káyilen kooniin kifamut i,
ni naane ñúwejet ñooniin ñíbaanie i,
ábuki káyilenut keejuko ku h'áriteina hu t'eket i.
15 Ahaban n'aaniin:
—Arija tánotan fe t'etaam i,
abe n'ariwaare ésuk i fe Hirim Heetoofe hu.
16 An eeja u káyilen,
abe *n'abostee,
o kafaku.
Bare an at'a áyilen,
Atambatun akufokufo awasan.
17 Keeyak ku káyilen káhinu buroon bonde beehaŋe bu ésuk i kikaw:
boko kákutoor sirab tu huruwu húuma;
boko káhamin kike kíhaminiin;
18 ifi kajok ñuroon,
man yooŋ ni káhujo doon deesikee,
doon fe iti dibajiin;
boko kásitu sumoŋiiin ti bakan kéesomute,
abe kéesomute kondu n'iŋi kákoyi.
Yesu n'abatuko t'etiir
19 H'Anahaan u Yesu áhamine hii nu boko ahaban,
Atambatun n'ayito t'etiir bufor bu,
abe Yesu n'ariiko inde *baatoso.
20 Eriboora i ni kaja,
iŋi kawaare Hirim Heetoofe hu tánotan.
Anahaan u aŋ'áyokunaniin tu burok bu,
abe n'alitan kawaare kooniin tu buroon bimbi káhin beehaŋe bu ésuk i kikaw.
Mark 16.21-21