Mark 15

Ni kaja ni Yesu ti Pilat

(Májiye 27.1-2, 11-14; Luk 23.1-5; Saaŋ 18.28-38)

Nu bújom bu bib, eseef ite *esaraha i, ni sifaaf site Esuwif i, *n'émuse yite Eluwa yite Moyis, ni *sifaaf site ejoonana i kareyi fe ni kariiko keejamoor naane kaja i ni Yesu. Ni kakobo sumoŋu, abe ni kaja ne o kaja kasaan *Pilat.

Mark 15.1-24

2 Pilat n'ákandijeno aano:

—Awe a̱amo fu Áyi ite Esuwif i?

Yesu n'aano:

—A̱soka bo.

3 Eseef ite esaraha i ni kasok toko báhamin beehooje ti Yesu. 4 Pilat n'asooñ ákandijeno aano:

—A̱yinaat kásafin? A̱jam bi kasoke bee t'awe fe!

5 Bare Yesu átumbut ásafin, Pilat ayak ajahale.

Pilat n'aane Yesu awarawar kaketu

(Májiye 27.15-26; Luk 23.13-25; Saaŋ 18.39-19.16)

6 *T'efeet-feet fe yite Kánuutina ku Esipt, *Pilat aŋ'awasan ti bakan keekulee ku afeeneŋ e ésuk i eyako u kasoku. 7 Náami bare kóŋkeyin, abajeebaj t'ekulu i ake ániine huruwio Barabas, ni bakaake bakano. Kabinabina kárahan t'eseef ite hikinu hu, abe ni kayool an. 8 Hahooja hu ni hija ti Pilat, abe ni kaano áhin naane aa afiy áhin bija tu boko kane efeet yendu ereeŋ. 9 Pilat n'aaniin:

—Árimaŋamaŋi iwasanuun Áyi ite Esuwif i eeja?

10 Pilat asokasok bondu ábuki ámoomi kaanuku kahiñan taŋ kíkinineŋe fu eseef ite *esaraha i ni kásik Yesu kasaano. 11 Bare eseef i bokondu ni katiŋg hahooja hu kaaniin kasok Pilat tiŋkan awasaniin Barabas. 12 Pilat n'asooñ aaniin:

—Náami buŋ b'ija fu n'an u aa ariene Áyi ite Esuwif i?

13 N'iŋki kásafino ti kataŋku kep:

—A̱tibo *t'ekuruwa eeket!

14 Pilat n'aaniin:

—Kame naŋ n'áhine fu neejakut?

Bare ni kahaŋ mi kataŋke:

—A̱tibo t'ekuruwa eeket!

15 Pilat n'ámaŋi káhinu hahooja hu siheliin seerooŋo. Náami eewasaniin Barabas. Ahaban, n'áhin Yesu éemiñee ni hikarawas, abe n'ásiko asaan esulaan i kaanuku keetibo t'ekuruwa.

Esulaan i ni kásuw Yesu

(Májiye 27.27-31; Saaŋ 19.2-3)

16 Esulaan i ni kaja ni Yesu níbahindaa t'enuuf i, abe ni karuw bakaaku esulaan fe. (Enuuf yendu yite i águwernoor éenuutina u *Rom). 17 Ni kasol Yesu kájufa kéeyuuse keelaañe, abe ni kayit miland meebaje bisisa keeniir mo naane ékuhe yite áyi. Kahaban, ni káhino yo ti hikaw. 18 Abe ni káhamin ne o iŋi kaano:

—Írihamin n'awe, Áyi ite Esuwif i!

19 N'iŋi kasawoor hunuk kéemiño ti hikaw, ni kánund te o, abe ni kasaaho kéejiŋgitan hágilao kaane kéesukaayo. 20 Kásuwo kahaban, ni kanuutano kájufa kéeyuuse ku keelaañe ku, abe ni kabatikano wañ woone. Kahaban, ni kaja ne o kanuut hikinu hu kaanuku keetibo *t'ekuruwa.

Yesu n'atibee t'ekuruwa

(Májiye 27.32-44; Luk 23.26-43; Saaŋ 19.17-27)

21 Ake ániine ite Siren, huruwu hoone Simoŋ, n'áŋaasin ne bo kane ánuutin ti hitaaŋaat. Akina aamo fu faaf ite Aleksandur nu Rufus. Esulaan i ni kanoŋkoorano eeyit *ekuruwa yite Yesu. 22 Ni kaja ni Yesu bija tindi kaane Golgota, aamo fu «t'Esendeen i». 23 Ni kawuno ébiñ yéegiiloolee n'eke éenee eŋ'eenee *miir kaanuku éehujo, bare Yesu aseit yo. 24 Ni katibo t'ekuruwa i. Kaanuku kéeruboor wañ woone w'asiimee wu, ni kaya bukuuj keeyit keejuk huruw doon d'aware du kabaju. 25 Hi katibo hu t'ekuruwa i, taanak tu káanuutinin afiyo dikee.

Mark 15.25-47

26 Ti kakiñje du katinu koone, kéekinineŋe ku náami awarawar kaketu, kaanaan: «Áyi ite Esuwif i». 27-28 Ni katib yooŋ toko kaagoroor ne o énukenoora bákasuba, ake inde baatoso, aau inde baamayo.

29 Kiŋki kaŋaas toko iŋi kánis kikawiin, abe n'iŋi kálafatino kaano:

—Háayee! Awe eeene u yéeni awe kawelej *Enuuf ite Atambatun, abe kunak kíhaaji n'a̱nut yo, 30 a̱fakanooro tíme, abe n'á̱wanein t'ekuruwa i!

31 Eseef ite *esaraha i yooŋ, *n'émuse yite Eluwa yite Moyis n'iŋi kásuwo. Iŋi kaanoor:

—Afakanafakan bakaaku, abe ayinaat bifakanooro! 32 Áwanein hahiye t'ekuruwa i, akina *Afakana u, Áyi ite *Israyel, man n'újuk núuyilen!

Énukenoora i ki katibe ku toko n'iŋi kálafatino yooŋ.

Eket ite Yesu

(Májiye 27.45-56; Luk 23.44-49; Saaŋ 19.28-30)

33 Taanak tu tireeŋa ti hikaw, ébaani n'éyemi t'etaam i ereyi fe ayak abin áami yooŋ tifesa. 34 Abe hi tifese hii, Yesu n'ataŋk t'etiir aane:

—Eloyi, Eloyi, lema sabaktani? (aamo fu: «Atambatun úuma, Atambatun úuma, iŋi naŋ n'a̱wasanam fu?»)

35 Bakaake ti kéeyemie ku toko ni kajam. Ni kaane:

—Arijam, ondu ti karuwu *Eli!

36 Ake tu boko n'atey, abe n'ayit hupoons éehujan ho ébiñ yeekeese. N'aya ho tu hunuk, abe n'amaaren ho Yesu kaanuku man n'ajojoban ho. N'aane:

—Arinahan! Újuk fee man Eli bibin éewananno!

37 Bare Yesu n'ataŋk hifeeneŋ t'etiir, abe n'aket.

38 Hírido heeemo hu níbahindaa *t'Enuuf ite Atambatun ni hijeho huta hu t'etiir bibin yooŋ t'etaam héehin kúsuba. 39 H'aseef ite esulaan i, eesiiŋee u toko ajoŋoor ni Yesu, ajuke hu buŋ b'akete fu ariike, n'aane:

—Múniyo ániine ondu áyemie fu Añi ite Atambatun!

40 N'abaj toko yooŋ bakaake haare kéesiiŋeina akambee iŋi káheelinn. Mari ite u Magdala ámoomi tu bokondu, ni Salome, ni Mari íñaay ite Soosiin ni Saak añi. 41 Haare hondu iŋi kariboor yéeni ni Yesu akina *Gálile, abe yooŋ iŋi katofotooro. Bakaake haare yooŋ kámoomi toko úkaan, keeriboore ne o bija Serusalem.

Ehok ite Yesu

(Májiye 27.57-61; Luk 23.50-56; Saaŋ 19.38-42)

42-43 Kaanendan ku, Siseef ite ti hikinu hihi kaane Arimate n'áreeŋin. Boko kaamo fu *sifaaf site ejoonana i, abe aŋ'ájeŋginee naane. Ámoomi ti kanahan n'eyakar yómbokun Atambatun eesiiŋan *Jáyi joone. *Erimaas ite Esuwif i naane kuwaatu, boko ti bifare bite te yo. N'atuumen eeja ti *Pilat, abe n'alawo ehunuŋ ite Yesu kaanuku eeja eehok yo. 44 Pilat n'ajahale h'ajame hu kaanuku Yesu aketa ahil ii. N'aboñ bite aseef ite esulaan i, abe n'ákandijeno man afiyee naane Yesu akete i. 45 Hi Pilat ajame hu naane áyin u ásafino i ahaban, n'aane Siseef aja ayit ehunuŋ i. 46 Siseef n'ajoohen kaahuuy keefañje, abe n'áwanann ehunuŋ i *t'ekuruwa i. N'ahut yo ti kaahuuy ku, abe n'aja ahok yo t'élum yeewakee t'elaaliñj yómbokun. Ahaban, n'arindiŋooran ejuju yómbokun éefib karuŋ ku. 47 Mari ite u Magdala, ni Mari íñaay ite Soos ni kajuk t'ehunuŋ i ehokee du.