Hirim Heetoofe hu hi Luk akiñje hu
Kasaafu ku
1
Téwofil,
Naane á̱meyie i,
bakan keehooje kaŋesaŋes kakiñju buroon bómbokun bu beebaje bu t'uni.
2 Ni kakiñj bo naane bakan keejuke ku bo ni ñíkiniin huta hu ti kájabina ku kanabane i uni bo,
bokondu keesooñe ku káyemi ewaaraa Hirim hite Atambatun.
3 Náami íñje yooŋ,
íkandijenakandijen kéemeyie ku naane bije i huta hu ti kájabina ku ayak abin áami bukuuram but.
Ijukerajuker,
n'eene iikiñj bo yooŋ bujoŋoor júl bija t'awe,
awe Téwofila,
4 á̱ayini kámeyi kaanuku bi kaliikeni bu bite nu múniyo.
Début
Amalaka n'asok kaanuku Sambatiis kabukiee
5 Kóŋkeyin,
*h'Erod áyemie hu áyi ite *Súde,
abajeebaj bo ake ániine *t'esaraha i,
huruwio Sakari.
Esaraha i káhinahin sija.
Akina n'áyemi ti yite i Abiya éeneetieb.
Anaar'o Elisabet,
noota nooniin fe éhina wusarah.
6 T'ésubaiin fe,
buroŋ booniin butoofatoof Atambatun.
Iŋi káhin naane buluwa boone busoke i ajoŋoor júl.
7 Bare kabajut añi,
ábuki Elisabet ámeyiit kaharat,
abe yooŋ t'ésubaiin fe kahaanahaan.
8 Hike hunak,
Sakari n'áyemi ti káhinu *kaasarah *t'Enuuf ite Atambatun,
ábuki hífinooru hite eja yeeniin.
9 Esaraha i iŋi kaya bukuuj,
abe ni kayit keejuk aañ tu boko ayak fu buyooso t'anuuf eenabe u,
níbahindaa t'Enuuf ite Atambatun,
éetifan *ejuraay ic.
N'ahaŋ áami Sakari.
10 Hahooja hu ni hifin híyemi tíyaŋ ti kalawu,
t'ewahatu i yiyi kajuraay.
11 Náami amalaka ite Atemit áŋaasino ti Sakari,
abe n'asiiŋo inde baatos *ataabul u tindi kásuf ejuraay id.
12 Hi Sakari ajuko hu,
yaano n'efum,
abe n'ákoleyi naane.
13 Bare amalaka u n'aano:
—Sakari,
atum'á̱koleyi,
ábuki Atambatun ájeŋginajeŋgin kalawu kúuwe.
Anaarei Elisabet kabukii añi ahaawa,
abe awe karuwio Saaŋ.
14 Awe katoofan te o dómbokun,
abe keehooje kakontaan naane abukee i.
15 Ábuki akina káyemi an ómbokun t'Atemit.
At'áhujo ébiñ,
nu doon dite káhinu an éewusane.
O kahooju bib nu Búwejet Beenabe bu kane áyihinee.
16 O kábatikanna keehooje bakate *Israyel t'Anahaan u,
eeemo u Atambatun ite únef.
17 Akina kágilanna Atambatun,
abe o kabaju búwejet,
ni sembe naane *Eli *ayiŋana ite Atambatun,
éehin sifaaf su keebukan ni bakañiiin.
Kéejeŋginut ku Atambatun,
akina káhiniiin keesooñ keebaj biyinoor beejakeg.
Akina bifare ésuk i bija t'Anahaan u.
18 Sakari n'aane amalaka u:
—Naŋ neekuuram kaanuku bondu bite nu múniyo?
Ábuki fu ihaana húluj,
anaar'am yooŋ.
19 Amalaka u n'aano:
—Íñj'eemo fu Gabiriyelh,
abe iŋ'isiiŋo hágila Atambatun.
Akina áboñinam fu t'awe kaanuku iibin isoki hirim honde heetoofe hee.
20 Bare á̱yilenut báhamin búuma.
Ho h'a̱yak fu yooŋ bukumbo;
at'aŋk'á̱yini báhamin bija hunak hu bondu biyak hu kabaju.
Abe múniyo,
bo kabaju kane areeŋee.
21 Hahooja hu ti kanahan Sakari kep.
Ni kajahale naane áfiyeina i t'anuuf eenabe u.
22 Bare h'ánuutina hu,
ayinaat káhamin nu boko.
Ni kánandin kaanuku abajeebaj doon d'ajuke t'anuuf eenabe u.
N'aŋ'áhamin nu boko nu sumoŋio,
ábuki akumbakumbo.
23 H'abine hu áami Sakari ahabana hífinooru hoone hite burok bu,
n'ayeet bija t'enuuf te o.
24 Afiyo dikee,
anaar'o Elisabet n'asa har.
N'aŋ'ariiko t'enuuf toko,
ánuutaariit bija kiim hutok.
Aŋ'aane ni hikawo:
25 «Atemit áhinam fee káasuumaay konde!
Ajukerajuker,
n'aane eenuutan ñufuñ ñ'ibaje ñu t'ésuk i.»
Amalaka n'asok kaanuku Yesu kabukiee
26 H'Elisabet ase hu har hu abaj kiim hutok ni hifeeneŋ,
Atambatun n'aboñ amalaka u Gabiriyel t'eke ésuk ite *Gálile,
iŋi kaane yo *Nasaret.
27 T'ake ásuŋgute eesibaree t'áboñino fu,
huruwu hoone Mari.
Asibaro,
huruwio Siseef,
abe ite tu noota nite áyi u *Dafit.
28 Amalaka u n'ayooso t'enuuf te o abe n'aano:
—Íhamin n'awe,
awe a Atemit ásoniyane u!
Atemit ondu n'awe.
29 Mari n'ajahale dómbokun h'ajame hu kirim kondu.
N'aane ni hikawo:
«Kame kasaafu buŋ kondu?»
30 Náami amalaka u eeeno:
—Mari,
atum'á̱koleyi,
ábuki Atambatun atoofanatoofan t'awe.
31 Awe kaharat,
abe awe bíyihino añi ahaawa.
N'aŋ'a̱ruwo Yesu.
32 Akina káyemi an ómbokun.
O kaaniee Añi ite Atambatun eeemo u t'etiir-t'etiir.
Atambatun káhinio éeyemi áyi,
naane Dafit faaf ite noota noone.
33 Akina káyemi áyi ite bakate ku *Israyel hiraanu.
Jáyi joone iti jihabano mayeti.
34 Mari n'aane amalaka u:
—Buŋ bu bondu biyino fu kabaju,
makamu ímeyiit ániine?
35 Amalaka u n'ásafino aano:
—Búwejet Beenabe bu búwaneina t'awe,
abe sembe site Atambatun eeemo u t'etiir-t'etiir kákumbalooli n'ésamunan ite te so.
Iŋ'ite ho aamo fu añi eenabe u a a̱ja u bíyihino kaaniee Añi ite Atambatun.
36 Abukei Elisabet anooto fuufio naane ahaane aa fe,
abe o káyeki añi ahaawa.
Kaanaan yéeni at'aharat hikee,
abe ondu hahiyu ti kiim hutok ni hifeeneŋ.
37 Ábuki abajut doon d'Atambatun ayinaat káhinuj.
38 Náami Mari eeene:
—Íñje ásukateen ite Atemit.
Yala b'a̱soke bee ni bibaj t'íñje.
Abe amalaka u n'aja.
Mari n'aja kájukina Elisabet
39 Tu kunak kondu,
Mari n'arito eeja ahil jab bija t'eke ésuk ite *Súde yeeemo ti birij bu.
40 N'ayooso t'enuuf ite Sakari,
abe n'áhamin n'Elisabet.
41 H'Elisabet ajame hu naane Mari áhamine i ne o,
añio n'afum ti haro.
Búwejet Beenabe bu nu búhoojin Elisabet bib.
42 N'ataŋk t'etiir aane:
—Mari,
awe a Atambatun ahaŋe fu kásoniyan ti haare hu fe,
abe n'ásoniyan yooŋ añi u a a̱ja u káyeki!
43 Íñje ítumbe fu íyemi aañ,
ayak abin áami íñaay ite Anahaan úuma abina t'íñje?
44 Bare fu a̱juk,
ijamajam kaajii h'á̱hamine hu n'íñje,
añi u n'afum ti haram kakontaan taŋ.
45 Atoof t'awe,
awe éeyilene u kaanuku b'Atemit asoki bu,
bo kabaju!
Mari n'asokoroor Atambatun
46 Náami Mari eeene:
—Yaanam yendu ti kasokoroor Atemit,
47 abe búwejet búuma butoofana iŋ'ite Atambatun
*Afakana úuma,
48 ábuki ábaŋinambaŋino,
íñje ii iwenooro.
Áyine hee,
áfiitin t'úmiye,
bakate ku t'etaam ye iti karaan hikee-kee kaanu:
«Atoof t'anaare ondu»,
49 ábuki Atambatun eehaŋe u ebaja sembe
áhinahin t'íñje buroon bómbokun;
huruwu hoone hinabanab.
50 Aŋ'ayubiyen ko kireyi fe
keejoko ku nu sumoŋu súsuba.
51 Áhinahin burok beehahe n'emoŋio:
ayisaloolanayisaloolan kiŋki kayitooro;
52 n'awanan bákayi ku fe ti siriikeey sooniin;
abe bakan keenooto ku doon fe,
n'ajokiin aritank;
53 awunawun keejoñjolate ku ebaj,
abe kusaanum ku,
n'ayeetaniin sumoŋiiin fuufu te so.
54 Abinabin káyokunan *Israyel
bakan koone kéejeŋgino ku.
55 Afiilut káwuforoor *Aburaham ni bakañio kajaku koone,
abe iti kihabano hikee,
naane abine i asok sifaaf únel.
56 Mari n'áriikein bo n'Elisabet areeŋ kiim kíhaaji,
abe n'ayeet.
Buŋ bi Sambatiis abukee fu ariike
57 H'abine hu áami kiim kite ku Elisabet kireeŋa,
n'áyihino añi ahaawa.
58 Ekinoora i n'ebuke yeene ni kajam kaanuku Atemit áhinohin káasuumaay kondu kómbokun kii,
nu hutoofiin dómbokun,
n'akina yooŋ fe.
59 H'añi u abukee hu abaj kunak hutok ni kíhaaji,
ni kaja ne o kaanuku *keeteyano karamm.
Ni kámaŋio karuwoor ni faafo Sakari,
60 bare íñaayo n'aane:
—Aaa!
O kaaniee Saaŋ.
61 Ni kaano:
—Héyi?
An áruwaariitee iyu tu noota núuwe!
62 Ni kákandijen faafo nu sumoŋiiin naane keeyinaat ku báhamin,
kaanuku kéemeyi buŋ b'ámaŋie fu añi u aruwee.
63 Sakari n'áwufooriin nu sumoŋio kaanuku kasaano kaabiliŋgit,
abe n'akiñj te ko:
«Huruwu hoone Saaŋ.»
Ni kajahale kareyi fe.
64 Toko-toko yooŋ,
náami Sakari asooña áyini báhamin.
N'áyemi toko ti kasokoroor Atambatun.
65 Náami ekinoora i kareyi fe kákoleyia.
Tu búsuk bite bu *Súde beeemo bu ti birij bu fe,
bondu taŋ b'ésuk i ef'éhamin.
66 Kiŋki kajam bondu fe,
iŋi kayinoor abe ni kaane:
—Añi ondu eebin fíya éeyemi an buŋ?
Múniyo fu sembe site Atemit súmoomi ne o.
Sakari n'asokoroor Atambatun
67 Sakari,
faaf ite añi u n'ahooj bib nu Búwejet Beenabe bu.
N'áhamin tu huruwu hite Atambatun aŋ'aane:
68 —Úsokoroor Atemit,
Atambatun ite *Israyel,
ábuki áyokunanayokunan bakan koone,
abe n'aramiin.
69 Áboñino úne *Afakana ite sembe,
ite tu hubukandin hite *Dafit éejeŋgino u.
70 Áboñinoboñin afiyee *eyiŋana yeene keenabe ku
keeyiŋan bo.
71 Kaanaan o karamu úne t'enatoora yite y'úne,
ni ti bakan keehuufe ku úne.
72 Asokasok kaanuku o káwufoor sifaaf úne kajaku koone,
abe o bíbaŋino *kaajamoor keenabe ku ki kajamoore ku.
73 Ábuki Atambatun awaatawaat faaf úne *Aburaham aanon:
74 «O karamu úne t'enatoora yite y'úne,
núuyini kájeŋgino t'úkoleyiit an,
75 man úne buroŋ,
n'úyemi te o bakan keenabe,
bakan keejoŋoore.»
76 Añi úuma,
awe bare,
awe kaaniee
ayiŋana ite Atambatun eeemo u t'etiir-t'etiir,
ábuki awe kágilan Anahaan u
a̱afaroo bítim booneo,
77 abe n'á̱wufoor yooŋ bakan koone kaanuku,
t'aboŋketiin du wuhoofoor wu,
toko t'afakaniin fu.
78 Ábuki Atambatun ite úne áneenaneeni aa,
abe n'ajak.
O káboñina úne Afakana,
eeemo naane taanak tu kane túnuutin.
79 O bibin kajaaŋan keeemo ku t'ébaani i,
ni bakan k'eket i eŋolool ku,
éehin úne núuja ti bítim bite káasuumaay kup.
80 Añi u ti kahaatu kep,
abe búwejet boone ti kahaŋu karumu.
N'akin t'eramba i,
bija naane abine i ajab kawaare ku,
bakate ku Israyel iŋi kajuko.