Luk 2

Naane Yesu abukee i

(Májiye 1.18-25)

Kóŋkeyin, Ogist *áyi ómbokun eeemo u *Rom, n'aane bakate búsuk beejame bu te o fe káhin kuruwu kooniin keekiñjee. 2 Hítiyar dók bondu ni bibaj, abe kóŋkeyin Kiriñus áyemie fu águwernoor ite ésuk i yiyi kaane Siri. 3 Náami huruw fe aŋ'a̱ja ti hikinu húuwe t'á̱nuutina du, huruwu húuwe heekiñjee bo.

4 Siseef n'anuut t'ésuk ite *Nasaret yeeemo i ti *Gálile, n'aja t'eke ésuk ite *Súde eŋ'eenee Betelehem. Bo b'áyi u *Dafit abukee fu, abe Siseef ite tu hubukandin hoone. 5 N'aja bo n'asibaro Mari kaanuku keekiñj kuruwu kooniin. Mari áyemiit fuufio. 6 Bokondu bo Betelehem, náami hunak hoone hite bíyihino bu hireeŋa. 7 N'abaj añi ahaawa, añio átiyar. N'ásik kires éekumbaloolo, abe n'ahurusano ti kásiima, ábuki kareyit t'enuuf i t'emoosoora i tindi kawanan.

Emalaka ni káŋaasin t'ehaawa síkarniina

8 Abajeebaj t'ésuk yendu bakaake burokiin jíhaaw síkarniina. Iŋi kaŋot tu wujiŋ wu keejukar kaahaaw kooniin. 9 Ake amalaka ite Atemit n'áŋaasin tu boko. Meejaaŋe mite Atemit ni mijaaŋan toko fe. Náami kákoleyia dómbokun. 10 Bare amalaka u n'aaniin:

—Atum'árikoleyi, ábuki ibinuunbin ni hirim heetoofe, heeyak kákinineŋ ésuk i fe kikawiin nu kutoof: 11 *Afakana oonuun abukee úmiye ti hikinu hu ti *Dafit ákinaanie du. O aamo fu *Kiris, Anahaan u. 12 Iye a arija fu kámeyi kaanuku b'isokuun bu bite toko: aruun kajuku alekej i kákumbaloole ni kires, abe n'ahurusanee ti kásiima.

13 Kaja kajuku, náami emalaka yite t'etiir bokondu naane iyu úkaan n'áwiyo amalaka, iŋi kasokoroor Atambatun kaane:

14 «Atambatun eeemo u t'etiir-t'etiir ánikanee,

abe káasuumaay koone nu kuwunee

bakan keetoofo ku t'etaam ye!»

Ehaawa yite síkarniina su ni kaja Betelehem

15 H'aamo hu emalaka i kawasiin toko keebatuko t'etiir bufor bu, ehaawa yite síkarniina su ni kaanoor:

—Úja kame bija Betelehem núujuk beebaje bu, b'Atemit áhine bee núumeyi.

16 Ni kamoken keeja. Ni kaŋes ayak abin áami kajuka Mari ni Siseef, n'alekej u ti kásiima ku t'ahurusanee. 17 Hi kajuko hu kahaban, ni kasok b'amalaka u asokiin bu fe t'añi ondu. 18 Keejame ku kirim kite ehaawa yite síkarniina su ni kajahale dómbokun. 19 Bare Mari n'anaŋ bondu fe ti hikawo, aŋ'anoŋk eeyinoor bo. 20 Abe ehaawa i ni kabatuko ti kánikan Atambatun, abe ni kasokorooro iŋi bi kajame bu, abe ni kajuk yooŋ ni ñíkiniin. Ábuki naane amalaka u asokiin i, iyu yooŋ i bibaje fu.

La naissance de Jésus

Añi u n'aruwooree Yesu

21 H'añi u abaje hu kunak hutok ni kíhaaji, areeŋa *kateyanee karam, ni karuwo Yesu naane amalaka u afiye i asok t'íñaayo asaoorut har hu.

Mari ni Siseef ni kaja ni Yesu t'Enuuf ite Atambatun

22 H'aamo hu kunak kite ku Mari kihabanaa, butum asuuja, ni kawar káhinu akina ni Siseef *kaasarah *k'Eluwa yite Moyis esoke ku. Náami keeja ni Yesu bija Serusalem kaanuku éekajinee bija t'Atemit, 23 naane bikiñjee i t'Eluwa yite Atemit. Eenaan: «Aneemak ite ehaawa i tu butoŋ bifeeneŋ, n'enuk yeeniin yeeja i kajabu ebukee éyiine, kákajinee bija t'Atemit.» 24 Ni káhin yooŋ kaasarah ku naane t'Eluwa yite Atemit esoke du. Eenaan: «Sifiririŋ súsuba, man yooŋ múleebaan músuba.»

25 Náami abajeebaj Serusalem ake ániine huruwu hoone Simiyoŋ. Ániine ondu ite bifeeneŋ, abe ájeŋginajeŋgin Atambatun. Ámoomi ti kanahan an eeja u kafakan *Israyel. Búwejet Beenabe bu búmoomi ne o, 26 abe búwufoorowufoor kaanuku at'aket t'ajukut *Afakana u a Atambatun asoke u aane o káboñina. 27 Búwejet Beenabe bu ni bitiŋgo eeja *t'Enuuf ite Atambatun. H'aamo hu faaf ite Yesu n'íñaayo kabina n'añi ooniin kaanuku kéehino naane t'Eluwa i esoke du, 28 Simiyoŋ n'ayito tu sumoŋio, abe n'asokoroor Atambatun aane:

29 —Atemit, hahiyu b'a̱soke bu bibaja:

á̱yinooniam kawasu, íñje ásukateen úuwe,

iiket ti káasuumaay.

30 Ábuki ítumba ijuk ni ñíkinam *Afakana u

31 a a̱faree u kaanuku kúŋgowulan ku fe keejuko.

32 O aamo fu meejaaŋe meeja mu kajaaŋan biheet bu bireyi fe,

abe akina kákinineŋ Israyel bakan kúuwe ni kánikanee.

Simiyoŋ n'áhamin tu huruwu hite Atambatun

33 Faaf ite Yesu n'íñaayo ni kajahale dómbokun ti bi Simiyoŋ asoke bii t'añi u. 34 Simiyoŋ n'ásoniyaniin, abe n'aane Mari íñaay ite Yesu:

—Atambatun ajifanajifan añi onde kaanuku eebin eeneyan bakan keehooje *t'Israyel, abe n'aritan bakan keehooje. O káyemi báaluwenum bite Atambatun, bare ésuk i biteñekoo. 35 Akina kasoku mijiniŋga raŋgaw béenuusee bu tu ñúwejet ñite bakan keehooje. N'afin áami awe íñaayo, awe kabaju káseñji kómbokun, anokoor kite kábura kiyayi kiŋaas.

Aana, ayiŋana ite Atambatun

36 Abajeebaj ake anaare eehaane, *ayiŋana ite Atambatun, huruwu hoone Aana. Faafo Fanuwel ite tu hubukandin hite Aser. H'anaare ondu aseñee hu, abaja t'áyino simit hutok nu súsuba, 37 ániine u n'aket. N'aja ayak abin áami abaja simit bakan bakabaakiir ni sibaakiir. Áwasaariit *t'Enuuf ite Atambatun. *Aŋ'awoor káajiim ni kaajiŋgan, abe n'alaw eesokoroor Atambatun. 38 N'ahaŋ áreeŋin t'ewahatu yendu ti káyemie du. N'aŋ'aane Atambatun eyeehen, abe n'aŋ'asok bite bu añi u ésuk i fe kéeyemie ku ti kanahan ku kaanuku Atambatun eefakan Serusalem.

Bibatuko bu bija Nasaret

39 H'aamo hu Siseef ni Mari káhina naane Eluwa yite Atemit esoke i kahaban, ni kabatuko n'añi u bija t'ésuk yeeniin *Nasaret, yeeemo i ti *Gálile. 40 Añi u ti kahaatu kep, ti kahaŋu yooŋ búwesinato, abe Atambatun n'ásoniyano.

Yesu t'Enuuf ite Atambatun, o ti simit sumoŋu nu súsuba

41 Emit-mit fe, kane *efeet ite Kánuutina ku Esipt ereeŋ, faaf ite Yesu n'íñaayo iŋi kaja Serusalem. 42 Hi Yesu abaje hu simit sumoŋu nu súsuba, ni kaja ne o bite efeet i naane ti kafiya. 43 Efeet i ehabanaa, faafo n'íñaayo ni kabatuko kayeet, ti kámeyiit kaanuku añi u áriikeinoriikein Serusalem. 44 Iŋi kaane man Yesu ondu ni bakaniin ki kariboore ku. Náami keeja bújom tujon, abe ni káyemio ti hiŋes t'ebuke yeeniin ni bakaniin. 45 Bare kajukuto, kasooñen ni kabatuko bija Serusalem ti kaŋesio kep. 46 Hunak híhaajiyan hu, ni kajuko *t'Enuuf ite Atambatun, t'ariikee n'émuse yite Esuwif i, o ti kajamataniin abe n'aŋ'ákandijeniin. 47 Keejamo ku ti báhamin bu fe kajahalajahale tu búwesinato boone, ni másafinar moone. 48 Hi faafoiin n'íñaayo kajuko hu, ni kajahale dómbokun. Íñaayo n'aano:

—Áñuumo, kame buŋ b'a̱sooñe fu á̱hin uni iye? Írikolakoleyi faa, íñje ni faafi. Írimoomii ti hiŋes.

49 Yesu n'aaniin:

—Ariiŋesam iŋi naŋ? Árimeyiit kaanuku iwarawar káyemi t'enuuf ite Faafam?

50 Bare kajokut naŋ n'asokiin fu.

51 Náami Yesu eeriboor nu boko, keebatuko bija *Nasaret. Aŋ'ájeŋginiin naane. Íñaayo n'anaŋ bondu fe ti hikawo. 52 Yesu ti kahaatu kep, ti kahaŋu yooŋ búwesinato, abe n'atoof Atambatun n'ésuk i fe kéemeyio ku.

L'Enfance de Jésus