Beekolofanee bite eroka yite t'etool i kéenafute ku
12
Hunuut toko,
Yesu n'asooñ áhamin n'eseef ite Esuwif i akolofan.
N'aaniin:
—Abajeebaj.
Ake ániine abine áhin etool ite *kireseŋ.
N'asiis yo,
abe n'awak kaayeen t'elaaliñj yómbokun kaanuku iŋi kabin katuusan toko kireseŋ ku.
N'arok yooŋ ásukut bija tu bujukar bua.
Ahaban,
n'aŋes eroka anaŋ toko kaanuku iŋi kabin káruboor ne o,
abe n'aja kátuki.
Mark 12.1-17
2 Kireseŋ ku kilaaña,
n'aboñ ake tu búsukateen boone t'eroka i kaanuku keesaano húrub hoone.
3 Bare ni kajok ásukateen u kámiñ,
abe ni kayeetano ti kasaanuto doon fe.
4 N'asooñ aboñ ake ásukateen.
Ni kanufan ondu ti hikaw,
abe ni kálafatino.
5 N'aŋk'aboñ ake áhaajiyan.
Ondu,
ni kayoolo.
N'aboñ bakaake úkaan.
Bare ni kámiñ bokonde,
bakaaku ni kayooliin.
6 Náami bare an afeeneŋ taŋ aroŋo fu toko a ayino kaboñu;
o aamo fu añi oone a ámaŋie u.
Náami eeboño ti kaanu ni hikawo:
«Boko kájeŋgin añi úuma.»
7 Bare eroka i ni kaanoor toko:
«Ondu aja fu bibin biŋeñeno n'etool i.
Úyoolo,
abe etool i n'eŋ'éyemi yite i úne!»
8 Ni kajoko kayool,
abe ni káfiiten ehunuŋ i tíyaŋ etool i.
9 Yesu n'ákandijeniin aaniin:
—Naŋ n'ate etool i aja fu káhinu?
Akina bibin,
n'aŋ'ayool eroka yendu fe,
abe n'aŋes bakaake anaŋ toko.
10 Eeman arijaŋgajaŋga bonde beesokee bu ti *Míkiñjin mu?
Meenaan:
«Elaaliñj i y'enuta i káfiitene i yéeni,
yo esooñe fu éyemi meeyane mite enuuf i.
11 Atemit áhine fu bondu,
abe bijahalajahal úne dómbokunb!»
12 Eseef ite Esuwif i ni kaŋes naane kaja i káhinu kaanuku man ni kajok Yesu,
ábuki kámoomi kaanuku h'áhamine hii akolofan,
boko k'asoke fu.
Bare makamu kákolakoleyi hahooja hu,
ni kawaso iyu keeyeet.
Búhal bu
13 Bakaake *t'Efarisiyeŋ i,
ni bakaake ti kéesiiŋooreina ku *n'Erod ni káboñinee ti Yesu kaanuku keebuuto.
14 Káreeŋin ni kaano:
—Ámuse u,
írimoomi kaanuku awe an ite bifeeneŋ.
Á̱koleyiit yooŋ an fe,
ésuk i karare t'awe,
ábuki á̱anaariit man an onde an ómbokun man yooŋ,
abe aŋ'a̱liiken ésuk i múniyo mu ti bítim bite Atambatun.
A̱sok uni fee,
man uf'újaam *áyi ómbokun eeemo u Rom búhal,
n'uŋ'útin *t'Eluwa yite Moyis,
man yooŋ bayi?
Úwarawar kajaamu bo,
man yooŋ aaa?
15 Bare Yesu n'ámeyi kaanuku ti kabuutio ti kaamo fii.
N'aaniin:
—Íñje a ariŋes fee kabuutu?
Arisaanam fee érirem iijuk.
16 Ni káyitino efeeneŋ,
abe Yesu n'aaniin:
—Buhooŋu bonde t'érirem i bite bu aañ,
nu huruwu hu?
Ni kaano:
—*Áyi ómbokun eeemo u Rom.
17 Náami Yesu eeeniin:
—Yooh!
Kame arijaam áyi ómbokun eeemo u Rom buroon b'akino bu,
Atambatun yooŋ buroon boone.
Hirim h'ásafiniin hu ni hijahaliin dómbokun.
Yesu n'awaare ti bíriteina bite t'eket i
18 Bakaake *t'Esaduseyeŋ i ni kabin kajuk Yesu.
(Boko kaamo fu kiŋki kaane keekete ku karoŋut biritoc.)
Ni kaano:
Mark 12.18-34
19 —Ámuse u,
*Moyis akiñjakiñj t'Eluwa i aane úne:
«Ániine eesee af'aket t'abajut añi,
at'o awarawar kasayi anaare u keebaj biñi,
t'áami hahiyu bakate ku at'o eekete ud.»
20 Náami bare abajeebaj bakati kaamo hutok ni bákasuba.
Aneemak u n'asa,
abe n'aket ti kabajut añi.
21 Ásooboriyan u n'asa anaare u;
n'aket yooŋ ti kabajut añi.
Áhaajiyan u yooŋ,
mo mifeeneŋ mu.
22 Kareyi fe hutok ni bákasuba ku ni kaket ti kabajut biñi.
Kaketa kahaban,
anaare u yooŋ n'aket.
23 Hunak hite bíriteina bu t'eket i,
anaare u káyemi ite u aañ tu boko,
makamu kareyi fe hutok ni bákasuba ku kasaosa?
24 Yesu n'aaniin:
—Árijuuma fu,
abe árimoomi iŋi naŋ?
Ábuki árimeyiit *Míkiñjin mu,
árimeyiit yooŋ sembe site Atambatun.
25 Keekete ku ifi káritein,
háyine hu iti kasa,
haare hu yooŋ iti kaseño,
bare buroŋ booniin káyemi naane bite emalaka i keeemo ku t'etiir.
26 Hite bíriteina bite keekete ku,
kame arijaŋgeit ti kaawiit ku Moyis akiñje ku,
tu busokee du iŋ'ite añoyi éeyelie u abe ásufeit?
Bikiñjeekiñj kaanuku Atambatun aanaan Moyis:
«Íñj'eemo fu Atambatun ite *Aburaham,
*n'Isak,
ni *Sakobe.»
27 Atambatun,
akina Atambatun ite keeroŋe ku,
bija ni keeenee ku boko kakete fe,
ábuki buroŋ bu t'éketiit ti biraane fu.
Árijuumajuum dómbombokun!
Eluwa yeehaŋe i fe
28 Ake *t'émuse yite *Eluwa yite Moyis ajamajam Yesu ti síjeeŋoor su *n'Esaduseyeŋ i.
N'ajuk kaanuku Yesu ásafiniinsafin áwari aa.
N'átofin abe n'ákandijeno aano:
—Tu suluwa su fe,
yiin ehaŋe fu?
29 Yesu n'aano:
—Yeehaŋe i fe yeemo fu yende yeeene i:
«Arijamatan,
aruun bakate ku *Israyel!
Atemit aamo fu Atambatun ite úne,
akina aamo fu Atambatun unoono.
30 A̱warawar kámaŋi Atemit Atambatun úuwe á̱habanein:
t'eholi,
ti yaan yúuwe,
ti kaayinoor kúuwe,
ni ti sembe súuwe fef.»
31 Ésooboriyan i eemo fu yende:
«A̱warawar kámaŋi áwiyi húŋgowulan naane á̱maŋie i hikawig.»
Abajut eke eluwa yeehaŋe sondu.
32 Ámuse ite Eluwa i n'aano:
—Iyu kep Ámuse u!
B'a̱soke bu bite toko:
Atambatun afeeneŋ taŋ abaje fu,
abajut ake eewayee ne oh.
33 Húŋgowulan awarawar kámaŋi Atambatun t'eholo,
ti yaan yeene,
ti kaayinoor koone,
ni ti sembe soone fe.
Awarawar yooŋ kámaŋi áwiyo húŋgowulan naane ámaŋie i hikawo.
Bondu bihaŋe fu ti kásufu kite sunuk su bija t'Atambatun,
nu *wusarah wu fei.
34 Yesu n'ajuk kaanuku áwasawasi aa ti kásafin koone.
N'aano:
—A̱kamboorut ni *Jáyi jite Atambatun.
H'asoke hu bondu ahaban,
an yooŋ asooñut akañen kákandijeno bike.
Afakana u ahaŋahaŋ Dafit
35 Yesu n'áyemi ti kaliiken ésuk i hirim hu *t'Enuuf ite Atambatun.
N'ákandijen aane:
—Buŋ *b'émuse yite *Eluwa yite Moyis kayino fu kasoku kaane *Afakana u añi *Dafit?
Mark 12.35-44
«Atemit aanaan Anahaan úuma:
“A̱riiko inde *baatosam
ayak abin áami ikalaa enatoora íiwe tuus,
awe á̱ayemi áyi uj.”»
37 Dafit humuumo aŋ'aano «Anahaan u».
Náami buŋ *b'Afakana u ayino fu kasooñu áyemi añio?
Bakan úkaan kámoomi ti kajamatano.
Nu hutoofiin dómbokun.
Áriwasiyoor émuse yite Eluwa yite Moyis
38 Yesu n'aliiken ésuk i aaniin:
—Arinaŋ toko kikawuun *t'émuse yite *Eluwa yite Moyis,
kéemaŋie kee kañaahoor nu wañ wéewarie,
abe ni kámaŋi ésuk i eŋ'erito yeesaafiin ti sifiñjan su.
39 Boko ifi kariiko hágila ti *ñáalawum ñu,
abe hiriy ni hibaj,
boko ifi kajab kariiko keewun ésuk i.
40 Iŋi kamer haare hu ki bákayiniin kakete ku,
keeyit buroon booniin fe.
Abe káyemi ti kalawu,
n'iŋi kafiyo naane,
t'abin aane boko kajake.
Atambatun kaniju tu boko ahaŋ diyu.
Doon d'anaare eebajut u awune du
41 Yesu n'ariiko ajoŋoor ni tindi kajoloŋan sírirem su,
toko *t'Enuuf ite Atambatun,
eejondoman naane hahooja hu uu hujoloŋan toko sírirem su.
Kusaanum keehooje ni kajoloŋan toko seefame-fam.
42 Ake anaare n'áreeŋin.
Abajut doon fe,
áyino yooŋ aketaket.
N'ajoloŋan toko mírirem músuba meejarut doon dómbokun.
43 Yesu n'áruwin eriboora yeene abe n'aaniin: