Yesu n'ayooso Serusalem
21
Yesu n'eriboora yeene ni kaja ayak abin áami kalohena Serusalem.
H'aamo hu kareeŋa hikinu hite Befase,
inde hirij hite *Ñúolifiye ñu,
n'aboñ bákasuba tu boko hágila.
2 N'aaniin:
—Arija ti hikinu hondu heeemo hii hágilauun.
Af'ariyooso te ho kep,
aruun kajuku embam t'ekobee,
n'afuw ite te yo.
Árijendin so,
abe n'aribinam ne so.
3 An af'asokuun doon,
arieno:
«Anahaan u asawulasawulo so.»
Toko-toko yooŋ,
n'aŋ'awas so seebin.
4 Iyu i bondu bije fii kaanuku hirim honde *h'ayiŋana ite Atambatun asoke hu heebaj.
Aanaan:
5 «Ariene bakate ku *Siyoŋ:
“Arijuk,
áyi oonuun abin fii t'aruun.
Aŋ'áneeni naane,
abe asirasiro t'afuw ite embama.”»
6 Náami eriboora i bákasuba ku keeja,
abe ni káhin naane Yesu asokiin i.
7 Ni kabin n'embam i,
n'afuw ite te yo.
Ni kanuutan bífartuus booniin kanaŋ ti simbam su,
abe Yesu n'arabo te bo.
8 Bakan keehooje-hooj yooŋ ni katan bífartuus booniin ti bítim bu,
bakaake buŋoy beeleebejane bi káfiitina tu ñunukanuk ñub.
9 Kéeyemie ku hágila Yesu,
ni kéeyemie ku inde hiñaawio n'iŋi kataŋk t'etiir kaane:
«*Añi Dafit ánikaneec!
Awe eebin ii tu huruwu hite Atemit a̱ja á̱soniyanee!
Atambatun eeemo u t'etiir-t'etiir ánikaneed!»
10 Hi Yesu ayoosee hu Serusalem,
ésuk i fe n'étumb ewetekooro naane.
N'iŋi kákandijen kaane:
—Kame an ondu aamo fu aañ?
11 Hahooja hu héeriboorina hu ni Yesu n'iŋi heeniin:
—Yesu fu,
ayiŋana ite Atambatun,
ite u *Nasaret yite i *Gálile.
Yesu n'ákutoor éjulaata i t'Enuuf ite Atambatun
12 Yesu n'ayooso ti haanas hu *t'Enuuf ite Atambatun,
abe n'ákutoor éjulaata i,
ni kiŋki kabin hujoohen hu.
N'ajok sitaabul site etita yite sírirem sue áfiiten,
ni siriikeey site ejoohena yite kúleebaan kite *wusarah wu.
13 Abe n'aaniin:
—Busokeesok ti *Míkiñjin mu kaanuku Atambatun aane:
«Enuuf íima kaaniee *báalawumf.»
Bare aruun árihina yo báanuuseima bite búkuw! g
14 Bakan kéefuume ni kéetime ni kátofin ti Yesu toko t'Enuuf ite Atambatun,
abe n'áhiniin kéekoyi.
15 Eseef ite esaraha i,
*n'émuse yite Eluwa yite Moyis ni kayiŋat hi kajuke hu Yesu n'áhin bondu beehahe bii,
ni naane biñi bu ii kataŋk toko t'Enuuf ite Atambatun kaano:
«*Añi Dafit ánikaneeh!»
16 Ni kaane Yesu:
—Aŋ'a̱jam me naane ii kasok?
Yesu n'aaniin:
—Hee.
Eeman kereŋ arijaŋgajaŋga ti Míkiñjin mu hirim honde heeene hu:
«Atambatun áhinahin biñi bu ni bilekej bu keesokorooroi»?
17 Ahaban,
n'awasiin toko eeja.
N'anuut hikinu hu eeja Betani,
abe n'áŋotin bo.
Yesu ni nífigiye neebukut nu
18 Tifiit nu bújom bu,
Yesu ti bíbatikeina bu ti hikinu hu,
bujoñjol nu bujoko.
19 Ajuka *nífigiye ti kaakaŋa bítim bu,
n'atof areeŋ,
bare búsuus taŋ b'ajuke fu te no.
Náami eeene nífigiye nu:
—A̱roŋut hikee-kee kabuku miriyaay!
—Buŋ bi nífigiye nondu nusooñe fu nisay ahil ii?
21 Yesu n'aaniin:
—Iisokuun bifeeneŋ bu:
af'aribaj káyilen,
abe árihinut sihel súsuba,
aruun káyini káhinu b'íhine bee nífigiye nondu.
Aruun yooŋ kaanu hirij hondu:
«A̱nuut diyu a̱aja á̱tuuso káajuŋeey»,
bo yooŋ kabaju.
22 Af'áriyilen t'Atambatun,
doon d'arilawe fe,
aruun kawuniee do.
Sembe site Yesu, diin tu súnuutina fu?
23 Yesu n'ayooso ti haanas hu *t'Enuuf ite Atambatun,
abe n'áyemi ti kaliiken ésuk i mite m'Atambatun.
Eseef ite *esaraha i,
ni *sifaaf su ni kaja kaŋaaboo abe ni kaano:
—Awe á̱tumbe fu á̱yemi aañ ayak á̱hin naane á̱hine i?
Aañ yooŋ aani fu a̱bin á̱hin iyu?
24 Yesu n'aaniin:
—Íñje yooŋ íikandijenuun bifeeneŋ.
Af'árisafinam ajoŋooree,
n'iŋ'isokuun aañ aanam fu ibin íhin bondu.
25 Aañ aboñe fu Saaŋ *kaboste ku?
Man Atambatun,
man yooŋ kúŋgowulan ku?
Ni káyemi toko ti báhamin boko kumuumiin iŋi kaanoor:
—Uf'úeno:
«Atambatun aboñe fu Saaŋ»,
n'aŋ'aane úne:
«Kame iŋi naŋ n'áriyilenuto fu?»
26 N'úfin úeno:
«Kúŋgowulan ku»,
úkoleyi ésuk i,
ábuki kareyi fe bukuuriinkuur kaanuku Saaŋ *ayiŋana ite Atambatun.
27 Náami keeene Yesu:
—Uni írimeyie?
Yesu n'aaniin:
—Íñje yooŋ it'isokuun aañ aanam fu ibin íhin buroon bondu.
Beekolofanee bite ániine u ni bakañio t'ésubaiin
28 Yesu n'asooñ aane:
—Buŋ b'arisoke tu bonde?
Abajeebaj.
Ake ániine,
bakañio bákasuba.
N'aane aneemak u:
«Áñuumo,
a̱ja a̱rok úmiye t'etool i yite *kireseŋ ku.»
29 Ahaawa u n'aano:
«Aaa,
it'ija»,
bare afiyo dikee,
n'awatanooro,
n'aja arok.
30 Faaf u n'aja ajuk añio ásooboriyan u,
abe n'asoko mo mifeeneŋ mu.
Ahaawa u n'aano:
«Hee faafa,
íñje bija»,
bare ajeit.
31 Yesu n'ákandijen eseef ite *esaraha i,
ni *sifaaf su aaniin:
—Aañ tu boko áhine fu bi faafiin ámaŋie bu?
Ni kaano:
—Aneemak u.
Náami Yesu eeeniin:
—Iisokuun bifeeneŋ bu:
*esaa yite búhal bu,
ni kiŋki kafurukato kajabu kayoosouun ti *Jáyi jite Atambatun.
32 Ábuki Sambatiis abinabin t'aruun,
abe n'áwufooruun bítim beejoŋoore bu.
Áriyilenuto,
bare esaa yite búhal bu,
ni kiŋki kafurukato káyilenoyilen.
Naane arijuke i bondu fe ni ñíkinuun,
ariwatanooreit yooŋ wuhoofoor woonuun áriiyileno.
Beekolofanee bite eroka yite t'etool i kéenafute ku
33 Yesu n'asooñ aane:
—Arisooñ arijam ti beekolofanee bonde:
abajeebaj.
Ake ániine abine áhin etool ite *kireseŋ.
N'asiis yo,
abe n'awak kaayeen t'elaaliñj yómbokun kaanuku iŋi kabin katuusan toko kireseŋ ku.
N'arok yooŋ ásukut bija tu bujukar buj.
Ahaban,
n'aŋes eroka anaŋ toko kaanuku iŋi kabin káruboor ne o,
abe n'aja kátuki.
34 Kireseŋ ku kilaaña,
n'aboñ búsukateen boone t'eroka i kaanuku keesaano húrub hoone.
35 Bare eroka i ni kajok búsukateen boone,
kámiñ ake,
ni kayool aau,
áhaajiyan u ni kámiño nu bujuju.
36 N'asooñ aboñ bakaake búsukateen keehaŋe étiyar i kahooju,
bare eroka i ni káhiniin mo mifeeneŋ mu.
37 Hireeŋ toko,
n'aboñiin añi oone ti kaanu ni hikawo:
«Boko kájeŋgin añi úuma.»
38 Bare h'eroka i kajuke hu añi u,
ni kaanoor:
«Ondu aja fu bibin biŋeñeno n'etool i.
Úyoolo,
n'uŋ'úkini yo!»
39 Ni kajoko,
kañak tíyaŋ etool i,
abe ni kayoolo.
40 Yesu n'ákandijeniin aaniin:
—Ate etool i af'aja abin,
buŋ fíya b'aja fu n'eroka yendu?
41 Ni kaano:
—Akina kayoolu énafuta yendu fe,
abe n'aŋes bakaake eroka anaŋ toko,
bokondu iŋi kabin kasaano húrub hoone kane areeŋee.
42 Yesu n'aaniin:
—Eeman arijaŋgajaŋga bonde beesokee bu ti *Míkiñjin mu?
Meenaan:
«Elaaliñj i y'enuta i káfiitene i yéeni,
yo esooñe fu éyemi meeyane mite enuuf i.
Atemit áhine fu bondu,
abe bijahalajahal úne dómbokunk!»
43-44 Yesu n'áwutiyen aane:
—Iŋ'ite ho h'eenuun fu:
*Jáyi jite Atambatun kanuutanee t'aruun jeesaanee bakaake keeyak káhinu meejake.l