Kugbɔnliliitiiu kun Pɔɔl ŋmàn̄ ki tīī
Teesalooniiki
yabee
Tibɔkilkaal
Teesalooniiki gbɔŋku kuliliitiiu poonee, Pɔɔl sòon̄ tibɔti tin u pée sòon̄ kupeekaau poonee, an dàkà yii Kriisitoo gítintam tinyool poon bɔti. Tibɔtee nìn gbíntìi páb́ Teesalooniiki yab. Bi-kansikin biba nìn lì yii ŋwiin gbanti bāań ki dóò. Biba mun ceeyee, iyuntijoolkaa kaa ti pée dátì, an puee bi nìn yíì kaa ti tūǹ ditundi ní ki kíǹ ki báká bin bí ki tūǹ ditundee pu (3.6-12). Kugbɔŋu nee nìn sá kí nyāntí an bɔti Kriisitoo nikitil din bí Teesalooniiki tiŋkinee poon.
Pɔɔl péé ki jáam̀ Unimbɔti Teesalooniiki yab nín dàkā fookii nì dineendi diŋyee pu. U mēē ti-Dindaan ú tīī-bi dipɔ́ɔǹdi ditundi din pu ní u yíiń-bee pu (1.1-12). Míǹ boon kpalaayee ní u kíĺ kun pu u baasii ŋmàn̄ u-gbɔŋkuee, an dàkà yii Yeesu nín làá fàtīí gítiń nì tinyool poon puee. Ama kí wàatī tíǹ ń bàńee, maamaaci naaciiŋwu ubɔ un u gíti yíì yii «utɔŋfitee» làá nyā. Úǹ di làá dāá dàkà yii ipɔŋkpiti in yíkì ki jáà nì Unimbɔti nì Kriisitooyee bàn̄ laakin i máaǹ kí bèe (2.1-12). Ipɔŋkpiti gbanti nín làá dāá dàkà mpɔn ŋuŋyee puee, an bālifì yii fookiidambi ń nīn ŋúb́ an píkí, kí nīn yú deedee nì Yeesu Bɔmɔntiiti ní kí taa gbèen̄ ŋwimmeem (2.13–3.5). Pɔɔl nyáń biwutijoodambi pu nì u-pɔŋŋu kɔkɔ. Bi máaǹ kí tɔ̄ ditundi kí taa nín̄ kā ki báká ubɔ pu (3.6-15). Dibiindi wimmeem nì ijaam ní u dūu kúntì kugbɔŋu nee (3.16-18).
Dinyɔɔbundi din nyáń diyindi yii: «Un kaa là kí tɔ̄ ditundee kaa máaǹ kí jī muee» (3.10) kpáafí un làá kàaǹ kugbɔŋu nee, ú taa dū fookii ki kpāfì nì ditundi din Unimbɔti dūu ŋúbiǹ u-nibul ti-maŋfal wiiŋyi kɔkɔ poonee.