2 Teesalooniiki 2

Tin làá bàń kí wàatī Kriisitoo ń gítińee

1 Nnabiyaamu, ti-Dindaan Yeesu Kriisitoo làá gítiń ní ti làá dāá kóoǹ kí kpāfì u-cee. Tibɔti gbanti puee, tin ti cáá kí kpāafì-nee sɔ̀^a. 2 Ní taa yàntī ni-pɔbiliŋ ń bīil̀ binib nín lì yii ti-Dindaan gbanti pūtì kpáàa bāańee pu. Báà ubɔ di yaa bí yii u fōō Unimbɔti cee tibɔti ní ki nāatì-naaa, ubɔ di yaa tí bí yii tibɔti àá kugbɔŋu ní u fōō ti-cee kí dūú nàatī-nee, ní taa fōō kí kíí. 3 Ní taa pée yàntī ubɔ ń dī tiba pu kí ŋmàtiǹ-ni. See binib ń dāá fá Unimbɔti ní utɔŋfiti un ti-Dindaan làá dāá nàan̄ee ń nyā kí jī mpaan, kí wàatī ní ti-Dindaan wiiŋŋu ń nín bàń. 4 Utɔŋfitee kaa dāa kíikí binib ń nóó Unimbɔtaaa, kaa dāa kíikí bí jāam̀ tiba nì tiba. U làá dāá yíí kí mɔ̄tì míǹ ní kí tin kpáàa kɔ́ kí kàl̄ kunimbɔtidiin ní kí dū u-ba kí gíiǹ Unimbɔti^b.

5 Naa téetí yii m nín nìn dáá bí ni-ceeyee, m nìn tùkū-ni an bɔtaaa? 6 Ama tiba di dáá ŋúb́-u ní an bɔtee kaa láá bíi ŋáań kɔŋkɔnnee. Ni mun nyí kudɔŋu kun dáá ŋúb́-uee. An puee, see utɔŋfitee yuntiŋu yaa láa bàn̄ee ní ú nín nyā kí jī mpaan. 7 U-pɔŋŋu bí dibalin ki bíi tūǹ ditundi dooooyee. Ama un ŋúb́-uee yaa láa búntèe, 8 niinee ní utɔŋfitee ń nyā, ní ti-Dindaan ń dāá púfí-u ní ú kpú, ní u-dāantam nín dāa jìl̀ puee ń nàan̄-u^c. 9 Utɔŋfitee làá dāá dāan̄ nì Sitaan pɔŋŋu ní ki ŋáań maamaacib kɔkɔ nì tidaandi nì tinyimɔŋkpaŋkpantiil^d. 10 U dāa cáá tin pée sá ikpitee ki kíiĺ bin wáŋkèe, kun puee bi yíì kaa néeń ibaamɔn in bàà ŋūǹ kí fīī-bee. 11 An pu ní Unimbɔti dū mpɔn ŋun làá yàntī bí gáatée ki tīiń-bi án nín làá ŋá pu bí nīn nóó tinyimɔmbɔtee. 12 Míǹ puee Unimbɔti làá dāá dáaĺ bin yíì kaa fōō ibaamɔn ki kíí ki néeń ikpitee tafal.

Unimbɔti lēē-ni ki yóoǹ kí fīī-ni ní

13 Nnabiyaamu, ti làá nīn pée jáaḿ Unimbɔti ni-pu ní baabadal, nimbi bin ti-Dindaan néeńee. Di sá yii Unimbɔti péé ki lútì-ni ki fīī-ni nì u-Fam min yāntì ni kpántì u-yabee nì ni nín fōō ibaamɔn ki kííyee pu. 14 Míǹ pu ní Unimbɔti dī Tibɔmɔntiil tin ti sòoǹ nì ni nee pu ki yíiń-ni ní nīn cáá ti-Dindaan Yeesu Kriisitoo nyooti. 15 Míǹ puee nnabiyaamu, tibɔti tin ti cáań ki dàkà-ni nee, ní nīn ŋúb́-tì an píkí. An yaa sá tin ti sòon̄ kinyɔkɔneeyaaa, an yaa tí sá tin ti ŋmàn̄-neeyaaa, ní kpāafìmaan-tì tiŋan.

16 Ti-Dindaan Yeesu Kriisitoo u-ba nì ti-Baa Unimbɔti un néeń-ti ki ŋá-ti tiŋan ki tīī-ti dipɔɔsɔŋkil din kaa cáá dikúntilee nì dimákamɔntiilee, 17 ń gbéeǹ ni-pɔbiliŋ kunyannyaau kí tīī-ni mpɔn ní ŋmā kí nīn ŋáań tin ŋān̄ee ni-tuuŋŋi nì ni-bɔsoontam poon.