Kugbɔmpeepeekaau kun Pɔɔl ŋmàn̄ ki tīī
Teesalooniiki
yabee
Tibɔkilkaal
Teesalooniiki sá Room yab tiŋki kin bi yíì Maseeduwaanee tiŋyil ní. Kì bí Greesi tiŋki ŋgan pú ní. Pɔɔl nín cōom̀ nsanliliiti ki túń Unimbɔti tundee poon ní u tin nyáń kitiŋ gbanti pu. U nìn yíkì Fiiliipi tiŋki ní ki cūtì niin. U nìn náań Kriisitoo nikitil diba niin, ama waa nìn yúntì niin, di sá yii Juuda yab biba nìn bí niin ki jáń nì u. U nìn yíkì niin mpɔmpiin ní ki nín cá Beeree tiŋkin (Atuun 17.1-10). Boon kpataaa ŋyunti ŋun u bí Kɔranti tiŋkinee ní u-tɔntɔnjuti Tiimootee dɔ́miń u-cee ní ki máafì-u Teesalooniiki yab nín bí tin poonee. Niinee ní Pɔɔl ŋmàn̄ Teesalooniiki gbɔŋku kupeepeekaau nee. U nìn máaǹ ki bí Kɔranti tiŋkin ní ki ŋmàn̄-ku. Biciŋfitiibi gbìl̄ ki tīiǹ tɔb yii kugbɔŋu nee sá kun yúntì Dipoompɔndi gbɔnti kɔkɔ kansikinee, ní ki dàkafī yii bi nín màl̄ Yeesu Kriisitooyee, abin 50 boon ní bi ŋmàn̄-ku.
Tibɔti tin bi cáań-u Teesalooniiki tiŋki puee mɔ́ɔkiǹ-u tikpil. U jáam̀ Unimbɔti Teesalooniiki nín kpántì ŋabikamɔnti un ki tīī Kriisitoo yab nikitiŋ ŋin bí kitiŋgbaŋ gbantinee. U sòon̄ ditundi din úǹ u-ba túń bi-kansikinee, ní ki bàà là kí fàtīí ká-bi (1.1–3.13). Nì míǹ kɔkɔee, u tīī-bi kunyannyaau bí nīn gbíntìi pɔ̄ɔntí ki nìkì ki cá nyɔkɔpu nnimbɔtisan poon (4.1-12). U nìn gíti kíí-bi bi nín bālifì-u tibɔti tin bitaŋkpiibi fìkititam pu nì Kriisitoo gítintam tinyool poonee pu (4.13–5.11). U dū tibɔkpaafikaal nì ijaam ní ki kúntì u-gbɔŋku gbanti (5.12-28).
Kugbɔŋu nee yāntì bin kɔkɔ nìn dàkafī tin làá dāá bàń iyuntijoolkaa pooneee béè ibaamɔn. Ku téetí bin kɔkɔ fōō ki kííyee yii kun páb́ee di sá bí lēē seera kɔŋkɔnnee kí dàkà yii bi sá ŋwalifi yab. Bí nīn cáá dimákal foolboon pu yii ŋyunti ŋubɔ dòoń, báà an yaa sá ŋuŋyee, bi làá dāá nīn «bí nì bi-Dindaan baabadal» (4.17).