1 Teesalooniiki 5

1 Nnabiyaamu, an kaa ti bàlifī yii tí ŋmà kí tùkù-ni iyunti in ní an bɔtee làá bàńee. 2 Di sá yii nimbi ni-ba ni nyí ti-Dindaan dāantam bɔti tiŋan yii u làá bàń kii unaayuu nín dòoń kunyeeu puee ní^a. 3 Ŋyunti ŋun binib yaa láa bí ki lì yii: «Ŋgbansɔŋfi, ti ŋmátì dee^b», dicilpu kpalaa niin ní nnaabu ń jēetí bi-pu kí nàan̄-bi. Báà ubɔ kaa dāa ŋmátí, an dāa bí kii imatiŋween nín bàń upɔdaan puee ní. 4 Ama nimbee, nnabiyaamu, naa ti bí dibɔmbɔndin ŋwiin gbanti ń dāá túuǹ-ni kii unaayuu nín tūuntí binib puee. 5 Di sá yii nimbi kɔkɔ sá ŋwalifi biyaamu ní ki bí ŋwiimpu. Taa sá kunyeeu yabaaa, kaa sá dibɔmbɔndi yab. 6 Míǹ puee, tí taa nín̄ gèeǹ kii bin kíǹee nín gèeǹ puee, ama timbi ń fìntī kí nīn ŋúb́ ti-ba. 7 Kunyeeu ní bin gèeǹee gèeǹ, ní bin nyù ki gbéèyee nyù kunyeeu. 8 Ama timbi bin sá ŋwalifin yabee. Ti máaǹ kí nīn ŋúb́ ti-ba tiŋan. Ti máaǹ kí dū ti-fookiiu nì ti-neendi kí dūú pèen̄ kii dijanjabɔkutilee, ní kí dū ti-fiil din pu ti mákée kí cíkiń kii kifuuliiyee^c. 9 Di sá yii Unimbɔti kaa lēē-ti ki yóoǹ tí nīn sá bin pu u làá dāá fōō diŋuulee, ama tí nīn sá bin làá ká difiil ti-Dindaan Yeesu Kriisitoo puee. 10 Úǹ Kriisitoo di kpíì ti-pu, án nín làá ŋá pu báà ti yaa láa bí dimaŋfalinaaa, ti yaa láa kpíìyaaa, u yaa láa gítìńee ti nì u ń kpāfì kí nīn bí mbaantiiminee. 11 Míǹ puee ní nīn tììmaan tɔb kunyannyaau ki kútí tɔb mpɔn kii ni nín pée ŋáań puee.

Tibɔkpaafikaal nì ijaam

12 Nnabiyaamu, ti mèé-ni yii ní nīn tɔ́ bin bí ni-kansikin ki tūǹ ditundi, ki cáá ti-Dindaan bɔti ki dàkà-ni, ki kpòotī-nee. 13 Nín̄ cáámaan bi-pu dineeŋkpaandi atuun ŋin bi bí ni-kansikin ki tūǹee pu. Ŋgbansɔŋfi ń nīn bí ni-kansikin.

14 Ti mèé-ni, nnabiyaamu, yii ní kpāafì biwutijoodambee, kí tīī bifaantidambee kunyannyaau, kí tūtuǹ bin wunti yɔ̄tèe, kí nīn cáá kimɔtii báà ŋma pu. 15 Ní nīn nyíǹ ni-ba ni-jutiibi yaa ŋá-ni ikpitee, ní taa dū ikpiti kí téeǹ-bi, ama nín̄ nyàab̀maan tiŋan diŋál baabadal ki ŋáań ni-jutiibi nì binib kɔkɔ.

16 Ní nīn fàal̀maan baabadal, 17 kí nīn mèé Unimbɔti kí taa gbèen̄. 18 Báà tin kamaa di yaa pée bāańee, ní nīn jáaḿ Unimbɔti. Min Unimbɔti là bin sá Yeesu Kriisitoo yabee ń nīn bée dee.

19 Ní taa kpɔ̀ Unimbɔti Fam tuuŋŋi ni-ni, 20 kí taa kpèè Unimbɔti bɔnaatiliibi bɔti tin bi sòon̄ee fám. 21 Ama, ní kpèè tiwan kɔkɔ kí lēē tin ŋān̄ee, 22 kí nīn nyíǹ ni-ba nì tikpitil kɔkɔ nì ti-bulifi.

23 Unimbɔti un tìì ŋgbansɔŋfee u-ba ń yàntī ní dū ni-ba kɔkɔ kí tīī-u. Ú ŋúb́ ni-Fam nì ni-nammu nì ni-wunti kɔkɔ, án nín làá ŋá pu ti-Dindaan Yeesu Kriisitoo bàńtamee, ní nīn bí circir bí taa láa ká ni-pu ikpiti ibee.

24 Un yíiń-nee làá ŋá míǹ kí tīī-ni kun puee u sá ibaamɔndaan ní.

25 Nnabiyaamu, ní nīn mèé ki tìì ti mun.

26 Ní jāam̀ ti-yab nì kunabitiiu jaamii kí tīī-mi.

27 Nì ti-Dindaan yindi puee, m tùkù-ni yii ní dūmaan kugbɔŋu nee kí kàaǹ nnabiyaamu kɔkɔ nimbiin.

28 Ti-Dindaan Yeesu Kriisitoo ŋanti ń nīn bí ni-pu.