Kugbɔŋu kun Pɔɔl ŋmàn̄ ki tīī
Kooloosi
yabee
Tibɔkilkaal
Kooloosi sá Asii tiŋki kiba ní. Díǹ pu nee kitiŋ gbanti ní bi yíì Tuurkii. Kí nyā Eefeesi tiŋki kí cù niinee, an sá ataŋkpee 200. An bí kii Pɔɔl kaa pée cūtì kitiŋ gbantin ki kée. Eepafrasi u-tɔntɔnjuti un sá Kooloosi tindambikee di sá unipeekaa un sòon̄ niin Kriisitoo Bɔmɔntiitee (Kool. 1.7, 4.12).
Pɔɔl bí sarkan (4.3, 10, 18) ní Eepafrasi cūtì ki tùkū-u yii binib biba dɔ́miń Kooloosi tiŋkin ki dàkà adàkapɔɔn nì marapɔmbi ní ki pūtì kpáàa bíi gáatí Kriisitoo yab bin bí niinee. Binib gbanti ceeyee, kí béé Unimbɔti kí ká difiilee, an sá unil ń nīn jáaḿ ŋfam poon pɔŋyi ní kí gíí dikpancandi. Udaan máaǹ kí nīn ŋúb́ tijikaal nì tinyɔkaal koobiliŋ tiŋan, nì tiwan tikpil mun. Pɔɔl nín gbìl̄ tibɔti gbantee, waa tāaǹ ní ki ŋmàn̄ Kooloosi yab kugbɔŋu kí téetí-bi yii difiil din Unimbɔti dì Yeesu Kriisitoo pu ki tììyee sá dimɔndi ní. Tisiiki nì Ooneesiim pu ní u nìn máaǹ ki dī ki yāntì kugbɔŋu gbanti bàn̄-bi (4.7, 9).
Kugbɔŋu gbanti poonee, u nín jáam̀ Kooloosi yab ki mēē Unimbɔti u-ŋanti pu ki dóòyee, u nìkī ki sòon̄ Kriisitoo pɔŋŋu pu ní. U bí yii Kriisitoo tɔ́kɔ́ ipɔŋkpiti kɔkɔ pu, ní úǹ baba di sá u-nikitil yil (1.15–2.3).
Míǹ boonee ní Pɔɔl kpáafì Kooloosi yab bí nīn nyíǹ bi-ba tinyimɔmbɔti tin biba dɔ́miń bi-cee ki dàkēe (1.15–2.3).
Kí kúntée, dijanluŋkikaal téetí-ti dimaŋfapɔndi din poon ní unil un ŋá mpèé nì Kriisitooyee bée. Báà u yaa sá Kriisitoo nikitilinaaa, u-dicaŋkunaaa, binib bin kansikin u kóòyeeyaaa, bi kāntí dimaŋfapɔndi gbanti u-ni (3.1–4.6).
Tibɔkulfikaal sòoǹ Pɔɔl u-ba bɔti tiba nì ijaan in u dū úǹ u-ba ŋal ki ŋmàn̄ee (4.7-18).
Inyimɔn bɔti dàkatam kpántí kpántí ki nóó nì bi nín dàkà-tì puee nì iyunti in bi dàkà-tèe ní. Ama tinyimɔmbɔti gbantee nín pēē tibɔti tiŋyee di sá tì yàntī Kriisitoo yɔu ń dàkafì yii fookii un u cáá Kriisitoo baba puee kaa ŋmāntì. An pu ní Kooloosi gbɔŋku nee sá ki tīī timbi waanee nib mun. Ku dàkà-ti yii Kriisitoo tɔ́kɔ́ tikɔkɔ pu, ní ki sá un di gbìntī unil kí líí ú nyā kuyuŋun, báà ku yaa pée sá kuŋyee.