Fiiliipi 4

1 An puee, m-nabineeŋkaamu mun m mɔ̀ ki bàà là kí gíti kée, nimbi bin tìì-mi dipɔɔpindi ki sá-mi tinyoolee, m-bɔɔbi, ni nín sá ti-Dindaan yabee puee, ní nīn gbíntìi bá ki pɔ̄ɔ̄ míǹ.

Pɔɔl bíi sáŋkí Fiiliipi tiŋki yab

2 M mèé ki gbàam̄ Eefoodii nì Sintiikee yii bí ŋá ubaanti mmɔntiim ti-Dindaan pu. 3 Míǹ puee, sii m-tɔntɔnjutimɔnti, m mèé-si yii á tūtuǹ-mi binimpoobi gbanti liitil, kun puee dikɔ̀ndi din poon m bí ki sòoǹ Unimbɔti bɔtee, binimpoobee mun tútúǹ-mi, bi nì Kleeman nì m-tɔntɔnjutiibi bin kíǹee. Unimbɔti ŋmàn̄ bi-yiŋŋi dimaŋfal gbɔŋkun^a.

4 Ni nín bí ti-Dindaan ŋaan puee, nín̄ fàal̀maan ŋyunti sá kamaa. M gíti bùsī ki tùkù-ni yii, nín̄ fàal̀maan.

5 Ní nīn mɔ̄ báà ŋma cee, ti-Dindaan tóobiń. 6 Ní taa nín̄ yáliŋkí tiba nì tiba pu^b, ama tin kamaa di yaa bāań-nee, ní dū ŋwimmeem nì igbaam kí mèè Unimbɔti tin lóò-nee pu, kí nīn jáaḿ-u u-ŋanti pu. 7 Unimbɔti gbansɔŋfiŋu ŋun wīikí ki jítiǹ unil nyítamee, làá ŋúb́ ni-pɔbiliŋ nì ni-landɔkɔi ni nín sá Yeesu Kriisitoo yabee pu.

8 Nnabiyaamu, m-bɔjoolkaati sèé: ní nīn dàkafī tin máaǹ tinyoolee pu, an dàkà yii tin kɔkɔ sá tiŋmanee, tin kɔkɔ sá bí nyɔ̄ŋkèe, tin kɔkɔ bí deedeeyee, tin kɔkɔ bí circiree, tin kɔkɔ kítì dineendee, nì tin kɔkɔ bi pàkèe. 9 Ní nīn ŋáaḿmaan tin ni bífì ki fōō m-ceeyee nì tin ni gbìl̄ m sòon̄ee nì tin ni ká m ŋáańee, ní Unimbɔti ŋgbansɔŋfi daan ń nīn bí ni-cee.

Pɔɔl bíi jáaḿ Fiiliipi yab bi-wampɔkaati pu

10 M jáaḿ ti-Dindaan, an mɔ́ɔkiǹ-mi tikpil kii m nín ká ni fātìi tí bíi dàkafī m-pu ki tútúǹní-mi miŋyee. Ni nìn pée cáá nlandɔkɔ gbanti m-pu an yúntì, ní mpaan kaa nìn bí ní ŋá ni nín dàkafī m-pu miŋyee. 11 M nín bí ki sòoǹ nì ni pu nee, an kaa sá tiba di lóò-mi. M yaa cááyaaa, m yaa kaa tí cááyaaa, an kɔkɔ mɔ̄ǹ-mi ní. 12 M bífì kí nīn bí disoolin, ki tí bífì kí nīn bí digbíl mun poon. M yaa jíń ki díkáaa, m yaa tí dɔ̄ ŋkùmaaa, m yaa cáá ki lákatàaa, m yaa kaa tí cááyaaa, m bífì kí ŋmèè tin kamaa di yaa pée bāań-mee. 13 M ŋūǹ tikɔkɔ Kriisitoo un tìì-mi mpɔnee pu. 14 Ama ni nín kútì m-pu m jíń falaayee, ni túń ditundi.

15 Fiiliipi tiŋki yab, nimbi ni-ba nyí, m nín kíĺ Unimbɔti bɔti sòontam Maseeduwaan tiŋkin ki dāa yíkèe, Kriisitoo nikitil báà diba kaa ti tútuǹ-mi, see nimbi ŋmaniŋma di kíí ki tīiń-mi tin m bàà làá lóóyee^c. 16 Di sá yii, doooo, min m nìn bí Teesalooniikee, nimbi di nìn tútúǹní-mi ŋfunyɔm kupaau pu^d. 17 M nín sòoǹ tin nee, kaa sá m nyàab̀ ní pɔ̄ń-mi tiba. M nyàab̀ ní nīn tūǹ atummɔnti kí ká ipaati tikpil ní. 18 Tin kɔkɔ ni tīiń-mee, m fōō, m kíǹ ki bí digbíl poon ní. Ni nín tīiń ni-tūtuntam puee, kɔŋkɔnnee m cáá tikɔkɔ nì tikɔkɔ. Ni-tūtuntam min Eepafroodiiti cáań-mee sɔ́fì fíŋfiŋ kii talaaluee, ní ki bí kii saraa un fáatì Unimbɔti u fòol̄ee^e. 19 Kii m-Nimbɔtiu nín cáá tigaajawan tikpil nì tinyool puee, u làá tīī-ni tin kɔkɔ yaa lóò-nee Yeesu Kriisitoo pu. 20 Ti-Baa Unimbɔti ń ká tinyool kí nīn pée cá jaanjaan! Ameeni.

Pɔɔl bíi kàantí Fiiliipi tiŋkin yab

21 Ní jāam̀ bin kɔkɔ pée sá Yeesu Kriisitoo yabee. Ti-nabiyaamu mun bí man cee dooyee mun jáaḿ-ni. 22 Bin sá Unimbɔti yabee kɔkɔ jáaḿ-ni, kí bántée, gɔminakpaan Seesaar dicaŋkun yab jáaḿ-ni.

23 Ti-Dindaan Yeesu Kriisitoo ŋanti ń nīn bí ni-cee.