Fiiliipi 3

Min unil kpántí deedeedaan Unimbɔti nimbiinee

1 Kɔŋkɔnnee m-nabiyaamu, tin kíǹee di sá yii ní nīn fàal̀maan ti-Dindaan pu. An kaa sá-mi digìńdi ḿ fàtīí kùbitī kí lì tin m nìn pée ŋmàn̄-ni dooooyee, an sá tiŋan ní ki tīī-ni. 2 Nín̄ nyím̀maan ni-ba nì bitɔntɔŋkpitib bin bimbim bí kii ibooyee. Bíǹ ceeyee, unil ń gíí dikpancandee di pée sá. 3 Timbi di sá bin gíí digiil tiŋman pu yalee, kun puee Unimbɔti Fam di kpòotī timbi ní ti nóó-u. Yeesu Kriisitoo pu ní timbi fàal̀, kaa máká nisaal tundi pu. 4 Ama m bàà ŋūǹ kí nīn máká nisaal tundi pu. Ubɔ yaa dàkafī yii u ŋūǹ kí dū u-mákal kí páań nisaal tundi puee, man bàà cáá nsan kí dàkafì míǹ kí jītíǹ udaan pu. 5 Bi nín màl̄-mee, iwiin inii dal ní bi gíí-mi dikpancandi. M baasii sá Isirayeel nibul ní, ki sá Beenjameen naakookun, ki sá ujuudajabaamɔn. Juuda yab marab nóotamee, m nìn sá Fariisab kitilin ní^a, 6 ní ki cáá difaŋgiil áli ki sàantí Kriisitoo nikitil^b. A yaa kpēē m nín ŋúb́ Juuda yab marab puee, m nìn bí deedee, kaa yīntì báà tiba. 7 M bàà nìn nyí yii tíǹ gbanti sá-mi tiŋan ní, ama kɔŋkɔnnee, Kriisitoo puee, m kpèé-tì kii tiwan tin kaa cáá ipaatee ní. 8 M nín béè yii m-Dindaan Yeesu Kriisitoo sá-mi tiŋan tin jítiǹ tikɔkɔee, an puee, tin kɔkɔ m nìn pée kpèé yii an sá-mi tiwammɔntiilee, m kíǹ ki kpèé-tì kii tiwan tin kaa cáá ipaatee ní. U-puee m fá tikɔkɔ, ní ki kíǹ ki kpèé-tì kii titampummoolee kí ŋmā kí ká Kriisitoo, 9 man nì u ń ŋá ubaanti. Maa ti máká yii m nín ŋúb́ marabee pu ní m kpántì deedeedaan, ama m nín fōō Kriisitoo ki kííyee pu ní m kpántì deedeedaan, kii Unimbɔti nín yāntì bin fōō-u ki kííyee kpántì deedeedambi puee. 10 Tin m nyàab̀ee di sá ḿ béé Kriisitoo nì u-fìkititam pɔŋŋu. Man nì u ń kpāfì kí jī u-falaau, m-bimbim ń kpú, ḿ nántíǹ Yeesu nín nìn kpíì puee, 11 ki cɔ́tí yii Unimbɔti làá dāá fìkitī ma mun ditaŋkpiilin.

Sāǹ kí bà kigbèenlaŋ

12 An kaa sá yii m fōō tipaal, maa láá kpántì umɔnti ki dóò. Ama Yeesu Kriisitoo u-ba nín cúú-mi puee, m bíi pɔ̄ɔntí kí sāǹ kí cúú m-taatandi paati. 13 Nnabiyaamu, m nyí yii maa láá bàn̄ kí cúú-tì. Tiba ní m ŋáań: di sá yii m súntí tin pu m jítèe, ní ki pɔ̄ɔntí kí bà tin bí nyɔkɔpuee. 14 An puee m sáń kí tin bà kigbèenlaŋ, ní kí tin fōō tipaal tin pu Unimbɔti yíiń-ti yilpu Yeesu Kriisitoo puee.

15 Timbi bin kɔkɔ bīń nnimbɔtisan poonee, tí nīn cáámaan nlandɔkɔ gbanti. Ama ní ni-kansikin biba landɔkɔi yaa tí nyáń i-baaa, Unimbɔti làá dàkà-ni ní béé an nín sá miŋyee. 16 Tin páb́ee di sá yii, nsan ŋun ti pée kíĺ ki nóóyee, tí nīn gbíntì ki nóó-ŋu ki cá.

17 Nnabiyaamu, nín̄ nóómaan m-tabɔbiliŋ kí dū ni-nimbikpeeŋu kí báań bin còom̄ kii ni nín ká timbi còom̄ miŋyee pu. 18 M nìn tùkū-ni, ki làá gíti bùsì kí tùkù-ni nì nsiim, yii binib biba bí, bi-saŋkindi dàkà yii bi ná Kriisitoo un kpíì ndɔpuntikaa puee. 19 Tin dɔ̄ ki cí-bee di sá ditafadaaldi, kun puee bi nóó tin bi-pooŋŋi lèe, kaa nóó Unimbɔti. Tin kɔ̄ntí-bi icooyee^c di mɔ̄ǹ-bi, ní taapu doo wanti pu ní bi dàkafī. 20 Ama timbi sá yilpu tindambiyaamu ní. Ti kā ki cí ti-Dindaan Yeesu Kriisitoo ń nyānní niin kí dāan̄ kí fīī-ti. 21 U làá dāá dū mpɔn ŋun u cáá kí sìntīǹ tiwan kɔkɔ u-taapuee kí cúú ti-wunti tin bí iwɔfinee kí kpántí yilpu wunti kii u-yɔŋu nín bí puee.